Matayo 26 - Sukuma New Testament 2000

Long'we ya kūmūlaga Yesu

¹ Ū Yesu aho wakalīcha ū kūsomboola ī mihayo ī yose īyī, ūbawīla a bahemba bakwe,

² “Mumanile gīkī jasaagaga shikū ibīlī īshike pasaka; na lūūlū itegelejagi gīkī, ū Ng'wana wa Munhū akūtūūlwa mu makono ga babūlagi akong'we ha nsalaba.”

³ Ī likanza lyenīlo a bagabīji bataale na a banamhala baalī batobanīla ha ng'wa Kayafa, ūyo walī ntaale wa bagabīji.

⁴ Balomanaga balīkooba nzīla ya kūndima ū Yesu mu nyasala-sala bamūlage.

⁵ Kwike bakiwīla gīkī, “Yaya ū ng'wikanza lya shigukulu, batizīīta nsambo a banhū.”

Yesu kwitīīlwa maguta

⁶ Ū Yesu aho alī Betania, ha ng'wa Simoni munhū wa mbiji,

⁷ akigasha kūlya shilīwa. Kūhayimanīla nkīma ūmò wang'wegeela, abūūkije jūbba ya alabasta, ya maguta ga mpango ntaale; ūshika ūng'witīīla kū ntwe ū Yesu a maguta genayo.

⁸ A bahemba bakwe aho babona gīko būsaaya no; būhaya, “Al'ū būkenaagūji ūbū nabo bo mbika kī hangī?

⁹ Īkī a maguta genaya gaalī gashikile kūjinjiwa, shilonga shikolo shingī būgabanhyiwa bahabī!”

¹⁰ Alīyo ū Yesu aho wadeeba ūhaya gīkī, “Nibūlī mulīnkoya ū mayū ng'wenūyū? Ū nīmo ūyo wanibeegeja nene gwenūyū gwawiza.

¹¹ Nguno a bahabī a bene mulī nabo gwa-gwa-gwa, alīyo ū nene natūbiza hamò ning'we shikū jose.

¹² Ūmo wanitīīlīla maguta gīkī, wagūbila ū mīlī gone kūlw'ikanza lya kūjīkwa.

¹³ Nalīmuwīla gwa nghana gīkī, hose-hose ū mu sī ūko jikūlomeelwa ī Nghūlū Jawiza jenīji, nū mhayo ūyo wagwīta gwenūyū gūkūhayiwa kūlwa kūng'wizūkwa.”

Wijomboki bo ng'wa Yuda

¹⁴ Hūna ūmò wa babo ikūmi na babīlī, lina lyakwe witanagwa Yuda Isikaliote, ūja ū kū bagabīji bataale.

¹⁵ Ūūkababūja gīkī, “Mukūninha kī nalang'oolekeje ū Yesu mundime?” Būnsoloogeja shilingi makūmi adatū.

¹⁶ Nghana kūfuma ikanza lyenīlo wandya kūkooba ng'wanya gwa kūnodeela ū Yesu kūbo!

Kūlya pasaka na bahemba

¹⁷ A ha lūshikū lo kwandya lo migatī ītī na shibimbya, a bahemba bakang'wegeela ū Yesu būmūja gīkī, “Ūtogilwe kwīlīīla halī ī pasaka tūje tūkakūlonja-longeje?”

¹⁸ Nanghwe ūbawīla, “Jagi ū mu nzengo, alīmo munhū nebe; mushike mung'wīle, ‘Ū Nangi alīhaya gīkī: Ī likanza lyane lyegeelaga, nakwiza na a bahemba bane a ha ng'wako, tūlīīle henaho ī pasaka.’ ”

¹⁹ A bahemba būja būūkīīta gīt'ūmo akabalagīīlīla ū Yesu; bīlonja-lonja ī pasaka.

²⁰ Ī mhīndī wiza wigasha hamò nabo abo ikūmi na babīlī.

²¹ Aho balīlya kwimanīla obawīla alīhaya, “Nalīmuwīla go nghana gīkī, ūmò wing'we akūnilodeela!”

²² Bakapīnīhala no būyūmūja; būlī ng'wene wahaya, “Hamo nene Seeba?”

²³ Nanghwe ūshosha ūhaya gīkī, “Ū nodeeji one alīkoja nanghwe ī nhonge jakwe ūmo nalīkoja ū nene!

²⁴ Na nghana ū Ng'wana wa Munhū ajile gīt'ūmo andīkīlilwe, alīyo alī mu kwihīga kūtaale no ū munhū ūyo alīnodeela ū Ng'wana wa Munhū. Yalī hambū-hambū ū munhū ng'wenūyo ūlū ni olī atabyalilwe!”

²⁵ Nose nū Yuda, ūyo olī nodeeji okwe, ūbūja gīkī; “Nangi, hamò nene?” Ū Yesu ūng'wīla, “Bebe wagūhaya!”

Kūtūūlwa sangīla

²⁶ Hūna lūūlū aho balīlya, ū Yesu ūsola ngatī. Ūlūmba hūna ūgūmeganya, ūbinha a bahemba kūnū alīhaya gīkī, “Anukūlagi mulye; ū gwenūyū mīlī gwane.”

²⁷ Ūsola na shikombe, wahayūmala kūlūmba ūbinha kūnū alībawīla, “Shing'welagi pye a bose.

²⁸ A genaya galī mininga gane g'ilagane, ayo galidīka kūlwa banhū bingī, nguno ya būlekejiwa bo shibi.

²⁹ Alīyo nalīmuwīla gīkī, kūfuma haha natūng'wa hangī matwajo ga nzabibu kūshisha mu lūshikū lwa kūng'wa mapya nalī hamò ning'we mu būtemi bo ng'wa Baba.”

³⁰ Aho bamala bīmba lyīmbo, hūna būfuma hanze būja kū lūgūlū lo mizeituni.

Petelo akūnema Yesu

³¹ Hūna ū Yesu ūbawīla gīkī, “Ū būjikū bo lelo īyī, pye a bose mukūnipeela; nguno gwandīkilwe gīkī, ‘Nakūntūla ū ndīīmi, jibbalasane ī ngholo.’

³² Kwike ūlū najūūka nakūtonga kūja Galilaya, namutange ū kūshika ko.”

³³ Alīyo ū Petelo ūshosha alīng'wīla gīkī, “Nūūlū bakakūleka pye a bangī, ū nene ng'wene ngilo ū kūkūleka.”

³⁴ Nanghwe ū Yesu ūng'wīla, “Nalīkūwīla gwa nghana gīkī, ū būjikū wenūbū aho nghungulume ītaalī kūhīla, ū bebe ūkūbiza onilemaga nghangala idatū!”

³⁵ Ū Petelo ūng'wīla hangī gīkī, “Ū nene nūūlū yūnigeleelwa kūcha nangho, natīko ū kūkūlema!” Na a bahemba a bangī pye būhaya gīko.

Kūlomba mu Getisemani

³⁶ Aho bashika h'ipandī litanagwa Getisemani, ū Yesu ūbawīla a bahemba bakwe gīkī, “Igashagi henaha naje aho nakalombe.”

³⁷ Hūna ūnsola ū Petelo na a bitūnja ba ng'wa Zebedayo a babīlī; ūgwīlwa būpīna būdito būminya no.

³⁸ Ūbawīla gīkī, “Ī ngholó yane īlī na būpīna būdito no, bo kūshisha mu kūcha. Lembeelagi henaha ng'wikale miso hamò nane.”

³⁹ Ūja ha būtongi ho hado, ūūkiponeja ha sī, winama kūshisha ha sī ū būshū bokwe, ūlomba alīhaya gīkī, “Baba ūlū īlīdūlīkana, ī shikombe īshi shinibītīīle; kwike īt'ūmo natogelilwe nene, alīyo ūmo ūtogelilwe bebe!”

⁴⁰ Wahayūshoka aho baalī a bahemba, ūbasanga balaalaga, ūng'wīla ū Petelo gīkī, “Ng'walemeelwa ū kwiyūmīlīja kwikala miso hamò nane nūūlū ikanza lya sa īmò dūhū?

⁴¹ Ikalagi miso mulombe mutizingīla mu kūgeng'wa; nguno ū moyo gūkalalilwe, alīyo ū mīlī ng'winogolelwa!”

⁴² Ūja hangī lūkangala lo kabīlī ūūkalomba alīhaya, “Baba, ūlū ītadūlīkanile ī shikombe shenīshi shibīte natashing'wile, ni īshikīīlage īyo wītogilwe bebe!”

⁴³ Aho washoka nī hangī ūbasanga balaalile, nguno a miso gabo gaalī gadidoha.

⁴⁴ Ūbaleka, ūja ūūkalomba hangī lūkangala lo kadatū, ūhaya mihayo h'ī yene dūhū.

⁴⁵ Wahayūshoka hangī a ha bahemba ūbawīla, “Nī haha mutaalī mulaalile mukwigoloolaga dūhū? Managi gīkī lyegeela ī likanza, ū Ng'wana wa Munhū atūūlwe mu makono ga banhū ba shibi.

⁴⁶ Būūkagi tūje, angū mulībona gīkī wegeela ū nodeeji wane!”

Kūlodeelwa na kūding'wa kwa ng'wa Yesu

⁴⁷ Aho ataalī ūyomba gīko, kūhayimanīla washika ū Yuda, ūyo walī ūmò wa babo ikūmi na babīlī. Wiza n'ibità itaale lya banhū babūūkije mapanga na milangha, bafumile kū bagabīji bataale na banamhala.

⁴⁸ Ū nodeeji olī obinha shimanīkījo; ūbawīla gīkī, “Ūyo nalambipe hū ng'wene, ndimagi!”

⁴⁹ Haho na haho ūng'wegeela ū Yesu; ūhaya, “Mhola Nangi!” Hūna ūmbipa.

⁵⁰ Nanghwe ū Yesu ūng'wīla, “Ng'wichane, gwītage ūyo gwakwenhaga!” A banhū benabo būnsanga hoi ū Yesu, būndima na makono gabo būnghaja.

⁵¹ Ūmò wa babo baalī nū Yesu olī na līlūshū, ūlīdima, hūna ūlīsopoola; wahayūlīhubenga lyūbītīla gūtū go ntūmami o ngabīji ntaale, gūtīnīka!

⁵² Ū Yesu ūng'wīla, “Bebe, lūshoshage mu shilalo ū lūshū lwako, nguno pye abo bakabūūchaga shū bakayagalaga bo shū.

⁵³ Nūūlū hamo ū bebe ūliganika gīkī natadūgije kūnomba ū Baba mabità ga bamalaika ūninha ga kūkīla nūūlū h'ikūmi na abīlī ī haha yenīyī?

⁵⁴ Hama lūūlū numho gūkūshikīlījiwa ginehe ūyo gwandīkilwe gīkī, ‘Shiigelile ībize chene?’ ”

⁵⁵ A banhū abo baalī biza kūndima ū Yesu baalī ibità itaale; ī likanza lyenīlo ūbayombya alībawīla gīkī, “Ng'wiza ū kūnidima mubūkije mapanga na milangha gītī nalī nsambo? Īkī ng'walī mutūnidimaga a makanza ayo nalūdīlaga nigashaga mu hekalu būlī lūshikū nakūlangaga!

⁵⁶ Kwike pyī ī yose yajaga gīko kūlwa kūshikīlījiwa kwa shandīkwa sha bahangi.” Būmpeela pye a bahemba, būneka!

Yesu ng'wibanza lya Bayudaya

⁵⁷ Hūna lūūlū aho bandima ū Yesu, būntwala kū ng'wa Kayafa, ūyo walī ntaale wa bagabīji; h'ūko baalī bibilingīla a balangi ba shilagīlo na a banamhala.

⁵⁸ Nū Petelo ūnkūūbīja alī ka kūle ho, kūshisha nanghwe ūshika nose a ha ng'wa ntaale wa bagabīji. Wingīla ū mu gwalugwa, wigasha na batūmami, gīkī ayībone ī ngelelo ya mihayo.

⁵⁹ Ū ntaale wa bagabīji nī libanza ī lyose būyūkooba-kooba būkaanīji bo nyalomolomo, gīkī bapandīke nzīla ya kūmūlaga ū Yesu.

⁶⁰ Alīyo batapandīkile, nūūlū īkī bingī bakayīmīīla kūfunya būkaanīji bo nyalomolomo. Nose bigela banhū babīlī;

⁶¹ būhaya, “Ū ng'wing'wana ng'wenūyū walikalaga ūhaya gīkī, ‘Nadūgije kwīsambagūla ī hekalu ya ng'wa Mulungu, hama nīzenga hangī ng'wikanza lya shikū idatū!’ ”

⁶² Kwimanīla wīmīīla ū ntaale wa bagabīji; ūmūja gīkī, “Nibūlī ūtūshoshaga nūūlū mhayo ū mu yose īyo balīkūkaanīla a benaba?”

⁶³ Alīyo ū Yesu akikala ahuumūlile sele dūhū. Hūna ū ntaale wa bagabīji ūng'wīla gīkī, “Ī haha nalīkwilahīja mu lina lya ng'wa Mulungu mpanga, tūwīlage ūlū gīkī ū bebe hū ūlī Kilisto, ū Ng'wana wa ng'wa Mulungu!”

⁶⁴ Nanghwe ū Yesu ūng'wīla, “Bebe ng'wenekīlī wagūhaya, nīyo nalīmuwīla gīkī, kūfuma haha mukūmona ū Ng'wana wa Munhū igashije kū nkono gwa būlyo gwa būdūla, aliza na malunde ga ng'wigūlū.”

⁶⁵ Hūna ū ntaale wa bagabīji ūtandūla nghanjo yakwe, kūnū alīhaya; “Ng'wabona, wagima! Numho tūtaalī na nguno kī hangī nabo a bakaanīji? Angū ng'wawigwa ū būgimu wene!

⁶⁶ Ī gīsī lūūlū muliganika ginehe?” Būshosha balīhaya, “Wigeleelagwa kūcha ū ng'wenūyū!”

⁶⁷ Bandya na kūnswīla mate kū būshū, na kūntūla mapī;

⁶⁸ kūnū balīng'wīla, “Kilisto, nani wakūtūla? Alimanījaga!”

Petelo kūnema Yesu

⁶⁹ Hūna ū Petelo aho igashije hanze ū mu gwalugwa ng'wenūmo, kwimanīla ntūmami ūmò nkīma wang'wegeela. Ūng'wīla gīkī, “Nū bebe walikalaga nanghwe ū Yesu, ū muna Galilaya!”

⁷⁰ Ūlema no, nīyo kū būtongi wa bose; kūnū alīhaya, “Bebe mayū, ū nene natūgūmanaga ūyo ūlīgūhaya!”

⁷¹ Wīnga a henaho ūja ng'wibīndo; nū ng'wenūmo ntūmami ūngī nkīma ūmona. Nanghwe ūbawīla abo baalīho a henaho gīkī, “Nū ng'wenūyū olikalaga nanghwe ū Yesu ū muna Nazaleti!”

⁷² Ūlema hangī; lelo wilahīla na kwilahīla alīhaya, “Ū nene nataamanile ū munhū ng'wenūyo!”

⁷³ Banhū balebe baalī bīmīīla ha mhūjo. Aho lyabīta ikanza iguhī, nabo būng'wegeela ho ū Petelo; būng'wīla gīkī, “Ī gete nghana nū bebe ng'wing'wana ūlī ūmò wabo, īkī na a kayombele kako kaloolecha chene!”

⁷⁴ A henaho lūūlū wandya kūzuma na kwitonga, kūnū alīhaya gīkī; “Ū nene nataamanile gete ū munhū ng'wenūyo!” Haho na haho yūhīla nghungulume!

⁷⁵ Nanghwe ū Petelo ūgwizūkwa ū mhayo go ng'wa Yesu ūyo walī wang'wīla gīkī, “Aho nghungulume ītaalī kūhīla, ū bebe ūkūbiza wanilemaga nghangala idatū.” Gūnchima no, ūfuma hanze ūūkalīla mu kūsaatwa kūtaale!