Matayo 14 - Sukuma New Testament 2000

Kūcha kwa ng'wa Yohana Matīīja

¹ Ū mu shikū jenījo ū Helode aho wigwa ū lūkumo lwa ng'wa Yesu,

² ūyūbawīla a batūmami bakwe gīkī, “Tambala shilanga ū ng'wenūyū Yohana Matīīja, wajūūkile kūfuma mu bafu. H'ūyo akwenhelejaga yītwe mihayo ya koolecha būdūla būtaale gīkī!”

³ Na lūūlū, ū Helode hū ng'wene ūyo walī wandima ū Yohana ūntunga na ūmponya mu jeela, kūlwa nguno ya ng'wa Helodia, ūyo walī nke wa ng'wa Filipo ng'wanong'wawe.

⁴ Ū Yohana akanghama ūng'wīla gīkī, “Ītī yawiza ū bebe ū kūnsola ū nkīma ng'wenūyo!”

⁵ Nose olī atogilwe kūmūlaga kūlwa mhayo gwenūyo, kwike olī abogohile a banhū, nguno bamonaga ū Yohana gīkī walī nghangi.

⁶ Alīyo nose lūkashika lūshikū lo kwizūkwa kūbyalwa kwakwe ū Helode, nshīke wa ng'wa Helodia ūbabinīla chiza pye a bose, ūyega no ū Helode.

⁷ Ī likanza lyenīlo, ūng'wīla ū ng'wanikī gīkī akūnsamba shikolo shose-shose īsho alanombe; nīyo ūng'wilahīlīla.

⁸ Ū ng'wanikī nanghwe kūlwa kūsamīlījiwa na nina, ūhaya gīkī; “Aha nalī aha nisambage ntwe go ng'wa Yohana Matīīja, gūlī ng'wilangahe!”

⁹ Ū ntemi ūzwangana no, alīyo īkī walī wamala kwilahīla, nīyo kū būtongi wa bageni abo walī wabalaalīka kwiza kū shilīwa, ūkalīla kūlagīla dūhū gīkī ū ng'wanikī inhwe ū ntwe!

¹⁰ Ūntūma munhū ūja ū mu jeela, ūūkamuta ū ntwe ū Yohana!

¹¹ Būng'wenhela nghana ū ng'wanikī gūlī ng'wilangahe, biza būng'winha; nanghwe ūntwalīla nina!

¹² A bahemba bakwe ū Yohana biza būgūbūūcha ū mimba gokwe būūkagūjīka, ha numa būja ū kūlī Yesu, kūjūng'wīla ū mhayo gwenūyo.

Banhū shihūmbī shitanò būlishiwa

¹³ Ū Yesu aho wagwigwa ū mhayo gwa kūcha kwa ng'wa Yohana, wingīla mu lyato wīnga a h'ipandī lyenīlo; ūja kwipandī lītī na banhū gīkī akalembeele iyene kwenūko. Alīyo a banhū aho bigwa būyīnga ū mu mizengo mabità na mabità, bakūnondeelaga lo magūlū.

¹⁴ Wahayūkola a ha ng'walo ūgabona a mabità ga banhū ūbasaatwa, ūbapīja a basaatu babo.

¹⁵ Aho lyabiza lya mhīndī, a bahemba bakwe būng'wegeela būng'wīla gīkī, “Ū ng'wenūmu tūlī ng'witogolo dūhū, nīyo nī likanza lyaja. Hambū-hambū ni wabalaga a banhū baje kū machalo bakigūlīle na shilīwa!”

¹⁶ Alīyo ū Yesu ūbashokeja alīhaya gīkī, “A banhū batī na nguno ya kūja, binhagi a bing'we ī shilīwa.”

¹⁷ Nabo būng'wīla, “Tūtī na shilīwa sha kwigela a henaha, tūlī na migatī ītanò na ndīlo ibīlī dūhū.”

¹⁸ Nanghwe ūbawīla, “Nenhelagi aha ī shenīsho.”

¹⁹ Hūna ūlagīla a banhū bigashe ha maswa. Wīsola ī migatī yenīyo būtanò wayo nī ndīlo īj'ibīlī. Ūlangamīla ng'wigūlū, ūlūmba, ūshimeganya ūbinha a bahemba bakwe, a bahemba nabo būbagabanhya a banhū.

²⁰ Pye bakalya bigeja; aho bashisoleela īsho shikasaaga, bokaja matangwa ikūmi na abīlī ga mamenyagūlwa.

²¹ Abo bakalya baalī bagosha gītī shihūmbī shitanò, kūleka kūbisaaba a bakīma na a baana.

Yesu ūshimīza higūlya ya nyanza

²² Hūna ī likanza lyenīlo, ū Yesu ūbakomeleja a bahemba bakwe kwingīla mu lyato, batonge kūja kū nkīlo gwa nyanza. Ū wei ūsaaga alīmalīja kūbalaga a banhū.

²³ Aho wamala ū kwilaga nabo, ūlinha mu lūgūlū iyene kūjūlomba; nose wila ū būjikū ataalī ko iyene dūhū.

²⁴ Ī likanza lyenīlo ī lyato lyalī kū būjiba kūle nī sī, līkūkoyiagwa mahuuli, nguno ū nyaga gwabafumīīlaga kū būtongi.

²⁵ Mu madilū mataale ga ngoko ja kwandya, bahayimanīla ū Yesu wabasanga alīshimīza higūlya ya nyanza.

²⁶ A bahemba aho bamona alīshimīza higūlya ya nyanza, bogoha no. Būlīla balīhaya, “Līlo līnghangi!”

²⁷ Alīyo haho na haho ū Yesu ūbayombya alībawīla; “Timbyagi ngholó, mutogohage nalī nene.”

²⁸ Hūna ū Petelo ūng'wīla, “Seeba ūlū ūlī bebe, niwīlage nane nize aho ūlī henaho nalīshimīza higūlya ya minzī.”

²⁹ Nanghwe ū Yesu ūng'wīla, “Nzūgū.” Ū Petelo wika nghana ū mu lyato, wandya kūshimīza ajile aho walī ū Yesu.

³⁰ Kwike aho wagūkalalīla ū nghuyembo gwa nyaga ogoha, wandya kūlibīla; ūlīla alīhaya, “Seeba nangūhīlage!”

³¹ Haho na haho ū Yesu ūgoloola nkono ūnzubūla, kūnū alīng'wīla gīkī, “Bebe wa kūzunya kūdo, nibūlī wiganīlīja?”

³² Aho bingīla būbīlī wabo ū mu lyato, gūlembeela na kūlembeela ū nyaga.

³³ Pye a bose abo baalī ū mu lyato būnamya kūnū balīhaya gīkī, “Nghana ūlī Ng'wana wa ng'wa Mulungu!”

Kūpīja basaatu Genesaleti

³⁴ Bahayūkīla ī nyanza, būshika kū sī ya Genesaleti.

³⁵ A banhū ba kwene būndeeba ū Yesu, bandya kūlagīja hose-hose ū mu mapandī ga hihī-hihī, bang'wenhele pye abo baalī basaatu.

³⁶ Būyūng'wikūmbīlīja bakuumye nūūlū ha neno ya shizwalo shakwe dūhū. Na nghana pye abo bakuumyaga bapīlaga.