Matayo 1 - Sukuma New Testament 2000

Kwihela kwa shibyalīlwe sha ng'wa Yesu Kilisto

¹ Ūyū kūlī kwihela kwa shibyalīlwe sha ng'wa Yesu Kilisto wa lūganda lwa ng'wa Daūdi, mu būbyīle wa ng'wa Abulahamu.

² Ū Abulahamu walī ise wa ng'wa Isaka, Isaka ūmyala Yakobo, Yakobo ūmyala Yuda na baana ba ng'wawe.

³ Yuda ūmyala Falesi na Zala, kūfuma mulī Tamali. Falesi ūmyala Hezelomu, Hezelomu ūmyala Alamu.

⁴ Alamu ūmyala Aminadabu, Aminadabu ūmyala Naasoni, Naasoni ūmyala Salimoni.

⁵ Salimoni ūmyala Boazi kūfuma mulī Lahabu, Boazi ūmyala Obedi kūfuma mulī Luzi, Obedi ūmyala Yese.

⁶ Ū Yese akamyala ntemi Daūdi, Daūdi ūmyala Solomoni kūfuma mulī nkīma ūyo walī nke wa ng'wa Ulia.

⁷ Ū Solomoni ūmyala Lehoboamu, Lehoboamu ūmyala Abia, Abia ūmyala Asa.

⁸ Asa ūmyala Yosafati, Yosafati ūmyala Yolamu, Yolamu ūmyala Uzia.

⁹ Uzia ūmyala Yotamu, Yotamu ūmyala Ahazi, Ahazi ūmyala Hezekia.

¹⁰ Hezekia ūmyala Manase, Manase ūmyala Amosi, Amosi ūmyala Yosia.

¹¹ Yosia ūmyala Yekonia na baana ba ng'wawe; ū mu shikū jenījo a banhū būsaamiwa, būtwalwa Babuloni.

¹² Aho lyabīta ī likanza lya kūsaamījiwa Babuloni, ū Yekonia akamyala Salatieli, Salatieli ūmyala Zelubabeli.

¹³ Zelubabeli ūmyala Abiudi, Abiudi ūmyala Eliakimu, Eliakimu ūmyala Azoli.

¹⁴ Azoli ūmyala Akimu, Akimu ūmyala Eliudi.

¹⁵ Eliudi ūmyala Eleazali, Eleazali ūmyala Matani, Matani ūmyala Yakobo.

¹⁶ Ū Yakobo akamyala Yosefu ū ngoshi wa ng'wa Malia, ū nina wa ng'wa Yesu, ūyo akitanagwa Kilisto.

¹⁷ Hūna lūūlū, ū kūfuma ū kūlī Abulahamu kūshika halī Daūdi, ī shibyalīlwe ī shose shilī ikūmi na shinè; nū kwīnga a halī Daūdi kūshika ng'wikanza lya banhū kūsaamījiwa Babuloni, shibyalīlwe ikūmi na shinè. Hama nū kūfuma ū ng'wikanza lya banhū kūsaamījiwa Babuloni kūshika halī Kilisto, nasho ikūmi na shinè.

Kūbyalwa kwa ng'wa Yesu Kilisto

¹⁸ Hūna lūūlū, ū kūbyalwa kwa ng'wa Yesu Kilisto kūkaja gīkī, ū nina ū Malia walī alūnjiwe na Yosefu; alīyo aho bataalī kwitoola, ūbonwa alī nda kūlwa būdūla bo ng'wa Moyo Ng'wela!

¹⁹ Ū Yosefu aho wagūdeeba ū mhayo gwenūyo, ūbona aneke. Alīyo īkī walī munhū ntūngīlīja, akandya kwiganika nzīla ya kūneka chiza; atizūngoola.

²⁰ Kwike aho ataalī ūyiganika ī mihayo yenīyo, malaika wa ng'wa Seeba ūng'wilongela mu shilooti; ūng'wīla gīkī, “Yosefu ng'wana wa ng'wa Daūdi, ūtogohage ū kūnsola ū nke wako ū Malia; nguno ū Ng'wana ūyo alī ū mu nda yakwe alīho kūlwa būdūla bo ng'wa Moyo Ng'wela.

²¹ Akūbyala Ng'wana ngosha, ū bebe ūkūng'wilīka ī lina lyakwe Yesu; nguno hū ng'wene ūyo akūbapīja a banhū bakwe kūfuma mu shibi shabo.”

²² Ī yose yenīyī īkaja gīko kūlwa kūshikīlījiwa kwa mhayo ūyo Seeba walī wagūhaya kūfuma kale kūbītīla mulī nghangi wakwe; gīkī,

²³ “Munhya ng'wilindu akūbūūcha nda, na akūbyala ng'wana ngosha, ūyo bakūng'wilīka ī lina lyakwe Emmanueli.” Makūlū gaho, “Mulungu alī hamò na bise.”

²⁴ Ū Yosefu aho wamisha kūfuma ū mu tūlo, wīta gīt'ūmo akawīlīlwa nū malaika wa ng'wa Seeba; ūnsola ū nke wakwe.

²⁵ Kwike atalaalile nanghwe kūshisha ūmyala ū Ng'wana, hūna ūng'wilīka ī lina lyakwe ī lya Yesu.