Maliko 9 - Sukuma New Testament 2000

¹ Hangī ongeja kūhaya, “Nalīmuwīla gwa nghana gīkī, balīho bamò ū mu banhū abo bīmīīlaga aha batūloja icha na hado yaya, kūshisha babūbone ū būtemi bo ng'wa Mulungu būliza mu būdūla.”

Yesu kūgalūka ihanga

² Ha numa ya shikū itandatū ū Yesu ūbasola ba Petelo na Yakobo na Yohana, benabo dūhū, ūbatongeela ajile mu lūgūlū lūlīhu, ūlinha nabo. Kūhayimanīla ī lihanga lyakwe lyagalūka balolile.

³ Nī shizwalo shakwe sheela pe, shiyūng'weka-ng'weka; atīho nfuji nūūlū ūmò ū mu sī ūyo adūgije kweja gīko.

⁴ Būbilongela ba Eliya na Musa, bandya kūlūngalūnga nanghwe ū Yesu.

⁵ Hūna ū Petelo ūng'wīla ū Yesu gīkī, “Nangi, yabeelela īkī twabiza tūlīho aha, ī gete tūzenge maheema adatū, līmò lyako, līmò lya ng'wa Musa, na līmò lya ng'wa Eliya.”

⁶ Bakogoha no, ūbbaha ūyūhaya mihayo īyo walī atīmanaga.

⁷ Bahayimanīla bafīkījiwa ilunde, n'ilaka ligela kūfuma ū ng'wilunde līlīhaya, “Ūyū ng'wene Ng'wana wane Ntogwa, ng'wigwagi wei.”

⁸ Hama hangī bahayimanīla haho na haho boya kūmona ose-ose, ūlū atī Yesu dūhū hamò nabo.

⁹ Aho balika ū mu lūgūlū, ūbahana batizūng'wīla munhū ose-ose īyo bakībona yenīyo, kūshisha aho Ng'wana wa Munhū alajūūke kūfuma mu bafu.

¹⁰ Na nghana ū mhayo gwenūyo bakagūlanghana gūbiza gwabo dūhū, kwike bakayibūja-būja a makūlū ga kūjūūka kūfuma mu bafu.

¹¹ Bakīīta nose būmūja balīhaya, “Nibūlī a balangi bakahayaga gīkī, shiigelile ize Eliya tame?”

¹² Nanghwe ūbashokeja alīhaya gīkī, “Ū Eliya ū ng'wene nghana ntongi ū kwiza, kūlwa kūlonja-lonja yose. Al'ī gīsī nibūlī ū Ng'wana wa Munhū andīkīlilwe gīkī, shing'wigeleelilwe aluhiwe no-no-no, na kūleng'wa?

¹³ Alīyo nalīmuwīla gīkī, ū Eliya wamalile ū kwiza, nīyo būng'wītīla gīt'ūmo batogelilwe; ūmo andīkīlilwe!”

Nyanda kwīngījiwa isamva

¹⁴ Aho bashika ū kū bahemba a bangī, būbasanga bapīndiagwa ibità itaale; baalīho na balangi ba shilagīlo bihalalījaga nabo.

¹⁵ A banhū aho bamona bakakumya, alīyo haho na haho būmpeeleela kūjūngīsha.

¹⁶ Nanghwe ūbabūja, “Mulihalalīja mhayo kī nabo?”

¹⁷ Ūmò ū ng'wibità lyenīlo ūnshokeja alīhaya gīkī, “Nangi, kaka kitūnja kane nakwenhelaga, kalī n'isamva lya būshimuumu.

¹⁸ Ūlū lyakadadīla līkakagalagajaga, kayūfuluuta ifulo dūhū, ū kūnū kaligadagūja a mino, nose kaakaba! Naalī nabawīla a bahemba bako balīpeeje, alīyo balīlemeelagwa!”

¹⁹ Ū Yesu ūbashokeja alīhaya, “Bing'we shibyalīlwe sha būtūzunya, nakwikala nalī ning'we kūshisha nanalī? Nakwiyūmīlīja hamò ning'we kūshisha nanalī? Ng'wenhagi halī nene aha!”

²⁰ Būntwala a halī Yesu. Ū nyanda aho wamona dūhū ū Yesu, lyūntaalīka ha sī ī lisamva, wandya kūfuluuta ifulo.

²¹ Ū Yesu ūmūja ū ise o nyanda gīkī, “Alī na makanza kī gandimile a makoye genaya?” Nanghwe ūnshokeja, “Kūfuma ha būnīgīnī bokwe.

²² Nīyo nghangala ningī līkakagwisījaga na mu moto, nūūlū mu minzī, gīkī līkabūlage. Ūlū ūdūgije kwīta mhayo gose-gose, tūkūlīlagwe ūtūgunaane!”

²³ Nanghwe ū Yesu ūng'wīla, “Gīkī ūlū ūdūgije? Angū pyī ī yose īdūlīkanile ū kūlī munhū wa kūzunya!”

²⁴ Haho na haho ū ise o nyanda ūlīla alīhaya, “Baba nazunije, kwike nīngījage ū būhana-hani bone!”

²⁵ Ū Yesu aho wabona gīkī ī libità lya banhū lyandya kwiza līlīpeela nhambo, ūlīhama ī lisamva, ūlīwīla, “Bebe moyo nsoso gwa būshimuumu na būgulu, nalīkūlagīla ūnfume, nīyo ūtizūnshokela hangī.”

²⁶ Lyūnghaja hangī ū nyanda, wandya kūfuluuta ifulo, hūna lyūnfuma, lyūneka gītī waacha, nose a bingī būyiganika gīkī hamo waacha.

²⁷ Alīyo ū Yesu, ūndima ū nkono gokwe, ūngūngūmūla, wīmīīla.

²⁸ Hūna ū wei wingīla mu kaya. Aho wasaaga iyene na bahemba bakwe dūhū, būmūja gīkī, “Nibūlī a bise twalī twalemeelagwa ū kūlīpeeja?”

²⁹ Nanghwe ūbashokeja gīkī, “Ī mbika gītī īyī ītīko kūfuma na hado yaya ūlū ītī mu kūlomba.”

Kūbawīla hangī ya kūcha na kūjūūka kwakwe

³⁰ Aho bīnga a henaho būbītīla Galilaya. Ū Yesu walī atatogilwe munhū adeebe.

³¹ Nguno obalangaga a bahemba bakwe gīkī, “Ū Ng'wana wa Munhū akūtūūlwa mu makono ga babūlagi bamūlage, alīyo ūlū ūcha akūjūūka ha numa ya shikū idatū.”

³² Kwike batagwitegelegije ū mhayo gwenūyo, hama nū kūmūja baalī bogoha.

Ū ntaale kūbatinda pye

³³ Bakīīta būshika Kafalanaūmu, aho bingīla mu kaya ūbabūja gīkī, “Ū mu nzīla ng'walihalalījaga mihayo kī?”

³⁴ Būhuumūla sele, nguno ū mu nzīla bihalalīgījaga mhayo gwa būtaale; gīkī nani ū ntaale kūbatinda pye a biye.

³⁵ Aho wigasha ūbitana abo ikūmi na babīlī, ūbawīla gīkī, “Ūlū munhū ūtogwa kūbiza wa kwandya, shiigelile abize kū numa ya bose, na ntūmami wa bose.”

³⁶ Hūna witana kanīgīnī ūkawīla kīmīīla hamò nabo, wanoga ūkakumbatīla na makono gakwe. Hūna ūbawīla gīkī,

³⁷ “Ūlū munhū ūng'wanukūla ūmò wa banīgīnī gīt'ūyū mu lina lyane, wananukūlaga nene. Hama ūyo ūnanukūla nene, atananukūlile nene dūhū, alīyo wang'wanukūlaga ūyo anitūmile.”

Ūyo alī kū lwandī lwise

³⁸ Kūhayimanīla ū Yohana wang'wīla gīkī, “Nangi, twalī twamonile ng'wing'wana alīpeeja masamva mu lina lyako; tūnemeja nguno atī ūmò wise!”

³⁹ Nanghwe ū Yesu ūng'wīla, “Yaya ū kūnemeja, nguno atīho munhū wa kūbeeja mhayo gwa būdūla mu lina lyane, hūna hangī ūshoka kūnihaya kībi haho na haho.

⁴⁰ Ūyo atī ng'wilwisha wise, ū ng'wenūyo alī kū lwandī lwise.

⁴¹ Nguno būlī munhū ūyo ūng'winha a bing'we minzī ga kūng'wa, īkī mulī ba ng'wa Kilisto, nalīmuwīla gwa nghana gīkī, ū ng'wenūyo atūjimīīja ī mheela yakwe.”

Mihayo ya kwipamya banhū

⁴² “Na hangī ūlū munhū ūng'wenheleja kwipama nūūlū ūmò wa bado-bado abo banisanije nene benaba, īkūbiza hambū-hambū atungīlījiwe ū mu nhingo yakwe iwe lya kūshela, akaponejiwe mu nyanza shimu, achīle ng'wenūmo.

⁴³ Hūna lūūlū, nūūlū nkono gwako ūlū gūkwipamya, gūbbutage, īlī hambū-hambū wingīle ū mu būpanga ūlī nemehazu, kūtinda kūbiza na makono abīlī alīyo ūponyiwa mu nsango gwa moto gwa būja na būja. [

⁴⁴ Ū ng'wenūmo jilīmo shagembe jitachaaga, nū moto gwamo gūtajimaga.]

⁴⁵ Nūūlū lūpambala lwako ūlū lūkwipamya lūbbutage, īlī hambū-hambū wingīle ū mu būpanga ūlī gigī, kūtinda kūbiza na mhambala ibīlī, alīyo ūponyiwa mu nsango gwa moto, [

⁴⁶ ūko shagembe jabo jitachaaga, nū moto gūtajimaga.]

⁴⁷ Nūūlū liso lyako lyūkwenheleja kwipama, līkobolage ūlyīnje ho. Nguno īlī hambū-hambū wingīle ū mu būtemi bo ng'wa Mulungu ūlī na songo, kūtinda kūbiza na miso abīlī alīyo ūponyiwa mu nsango gwa moto.

⁴⁸ Ūko shagembe jabo jitachaaga, nū moto gūtajimaga!

⁴⁹ Nguno būlī ng'wene akūbītiwa mu munhu ejiwe ū būsoso bokwe, gīt'ūmo shitambo shikeejiagwa bo kūtūūlīlwa munhu.

⁵⁰ Na nghana ū munhu gūlī ng'wiza, alīyo ūlū gūlinda gūsūūka, ī gīsī mukūgūtwīla kī gūsandūke hangī? Na lūūlū bizagi na munhu ū mu bing'we, hū mukwikala mulī mhola būlī ng'wene na biye.”