Maliko 6 - Sukuma New Testament 2000

Yesu kūleng'wa mu nzengo go ng'wawe

¹ Hūna lūūlū ū Yesu wīnga a henaho, ūja kū nzengo go ng'wawe, na a bahemba bakwe būnondeela.

² Aho yashika sabato wingīla ng'wisinagogi, wandya kūlanga. Abo bakang'wigwa bingī būyūkumya balīhaya gīkī, “Bing'we ū ng'wenūyū wīfunije halī pyī ī yenīyī? Winhilwe masala kī a genaya ga kūbeeja na makono gakwe mihayo ya koolecha būdūla būtaale gīko?

³ Ū ng'wenūyū atī ng'wene ū selemala ū ng'wana Malia, ū nkūlūye o ba Yakobo na Yosefu na Yuda na Simoni? Tūhaya hū ng'wene ūyo na balūmbūye tūkwikalaga nabo ng'wenūmu ūmu!” Yūbatabanya ī mihayo yakwe, bipama!

⁴ Nanghwe ū Yesu ūbawīla gīkī, “Ū nghangi atadalahagwa hose-hose ūlū ītī mu nzengo go ng'wawe na mu badūgūye, na mu kaya ya ng'wawe!”

⁵ Nose ū ng'wenūmo akaduuma ū kwīta nūūlū mhayo gwa koolecha būdūla, ūlū ītī kūbatūūlīla makono basaatu bagehu dūhū na kūbapīja.

⁶ Akakumya no kūlwa nguno ya būtūzunya wabo! Ha numa ū Yesu wandya kūja hose pyī ū mu machalo akūlangaga.

Kūtūng'wa kwa bahemba ikūmi na babīlī

⁷ Wahayīta nose ūbitana abo ikūmi na babīlī, ūbatūma babīlī-babīlī, ūbinha na būdūla bo kūheeba myoyo misoso.

⁸ Hangī ūbakomeleja, gīkī batizūbūūcha mbūūkanwa jose-jose ja kūja najo mu nzīla, ūlū ītī nangha dūhū. Yaya nūūlū shilīwa, nūūlū ifulushi, nūūlū mbogoshi ya hela.

⁹ Alīyo ī shilatū bazwale, kwike batizūzwala nghanjo ibīlī.

¹⁰ Ūbawīla gīkī, “Ūlū ng'ūshikīla ha kaya ndebe, ikalagi henaho kūshisha ng'wīnge ī lipandī lyenīlo.

¹¹ Hangī ūlū ng'ūshika ipandī ilebe alīyo būlema ū kūng'wanukūla nūūlū kūmudegeleka, īngagi. Ūlū mulīnga ī lipandī lyenīlo, lūkung'unhagi nū lūbuubu ūlo lūlī kū mhambala jing'we, koolekeja gīkī bakūgwīlwa nsango.”

¹² Na nghana bakaja balīlomeela, gīkī a banhū bagalūke.

¹³ Būpeeja na masamva mingī, na basaatu bingī būbabila maguta, būbapīja.

Kūcha kwa ng'wa Yohana Matīīja

¹⁴ Ū ntemi Helode wīyigwa ī mihayo yenīyo, nguno ī lina lya ng'wa Yesu līkakumūka. Bangī bahayaga gīkī, “Yohana Matīīja wajūūkile kūfuma mu bafu, h'ī nguno yene ū būdūla ū bose ūbū būkūtūmamaga mulī we.”

¹⁵ Kwike bangī banghayaga, “Eliya.” Bangī gīkī, “Nghangi, gīt'ūmo baalī a bahangi ba kale.”

¹⁶ Alīyo ū Helode aho wigwa ūhaya, “Tambala shilanga ū Yohana ūyo nakamuta ntwe wajūūkile!”

¹⁷ Nguno ū Helode, hū wei ūyo walī walagīla ūding'wa ū Yohana ūponyiwa mu jeela, kūlwa nguno ya ng'wa Helodia ūyo akantoola, alīyo walī nke o ng'wa Filipo ng'wanong'wawe.

¹⁸ Ū Yohana akanghama ū Helode ūng'wīla gīkī, “Ītī yawiza ū bebe ū kūnsola ū nke o ng'wanong'wing'we!”

¹⁹ Ū mhayo gwenūyo gūkansaayīcha no ū Helodia, ūmpelanīla ū Yohana, ūntungīla nhungī; ūng'wikanwa kūmūlaga. Kwike walī waduuma ūmo īītīle.

²⁰ Nguno ū Helode olī ang'ogohile ū Yohana, olī andeebile gīkī olī munhū ntūngīlīja na ng'wela, na lūūlū olī amaladile. Ahene ozwanganaga ūlū ong'wigwa, alīyo ondegelekaga na būyegi.

²¹ Kwike nose līkigela ī likanza, nguno lūkashika lūshikū lwa kwizūkwa kūbyalwa kwakwe ū Helode. Ūbeeja shigukulu, ūlaalīka banamhala b'ibanza lyakwe na bataale ba bashilikale, hamò na banangwa ba mu Galilaya.

²² Hūna nshīke wa ng'wa Helodia wingīla kūbabinīla, ūnyeja no ū Helode, pye na a bageni bakwe. Ū ntemi ūng'wīla ū ng'wanikī gīkī, “Nilombage shikolo shose-shose nakūsambe!”

²³ Nīyo ūng'wilahīlīla na kūng'wilahīlīla alīhaya gīkī, “Ūdūgije kūnilomba shose-shose, nūūlū īkabiza nusu ya būtemi bone nakūkwinha dūhū!”

²⁴ Ū ng'wanikī ūfuma ū mu chumba, ūūkamūja nina gīkī, “Nalombe kī?” Nanghwe ūnshokeja, “Ntwe go ng'wa Yohana Matīīja!”

²⁵ Haho na haho ū ng'wanikī ūshoka ū kūlī ntemi; wiza ūng'wīla, “Nalītogwa ī haha yenīyī ūnisambe ntwe go ng'wa Yohana Matīīja, gūlī ng'wilangahe!”

²⁶ Ū ntemi akazwangana kīngī nasho, alīyo īkī walī wamala kūlahīla, nīyo hangī kū būtongi wa babo walī wabalaalīka kwiza kū shilīwa, ūlemeelwa ū kūnemeja.

²⁷ Nghana haho na haho ū ntemi ūtūma mūlagi, ūlagīla gwenhwe ng'wilangahe ū ntwe go ng'wa Yohana; ū mūlagi ūja ū mu jeela ūūkamuta ū ntwe.

²⁸ Ūgūtūūla ng'wilangahe wiza ūng'winha ū ng'wanikī, ū ng'wanikī nanghwe ūūkang'winha nina!

²⁹ Aho bigwa a bahemba ba ng'wa Yohana biza būgūsola ū mīlī, būūkagūjīka!

Kūlisha banhū shihūmbī shitanò

³⁰ A batūng'wa būshoka ū kūlī Yesu, bibilinga būnsomboolela pyī īyo bakīīta, nī yīyo bakalanga.

³¹ Hūna ūbawīla, “ūbīngīlagi a banhū tūje kūūnū kūlembeezu mukifuule ho hado.” Nguno a banhū baalī bingī no, bizaga lwīsī-lwīsī; ūlū balīnga aba bashika bangī haho na haho. Nose yalī shilambu nūūlū kūpandīka ng'wanya gwa kūlya.

³² Nghana bingīla mu lyato būja kwipandī ilembeezu, ūko baalī batīko banhū.

³³ Alīyo bamò aho bababona būdeeba ūko bajaga, bandya kūfuma hose-hose ū mu mizengo būyūpeela lo magūlū bajile koi, būbatanga ū kūshika ko.

³⁴ Ohayika ū Yesu ū mu lyato, aho olībona ī libità ūmo lyalī ū būtaale, ūbasaatwa. Nguno baalī gītī ngholo jitī na ndīīmi, wandya kūbalanga mihayo mingī.

³⁵ Aho lyandya kūbiza lya mhīndī būng'wegeela a bahemba bakwe, būng'wīla gīkī, “Ū ng'wenūmu tūlī ng'witogolo dūhū, nīyo nī likanza lyaja.

³⁶ Hambū-hambū ni wabalaga a banhū baje kū migūnda hihī-hihī mu chalo ūmu bakigūlīle na shilīwa!”

³⁷ Alīyo ū wei ūbashokeja ūbawīla, “Binhagi a bing'we ī shilīwa.” Nabo būnshokeja būhaya, “Kolaga hamo shi tūje tūkagūle migatī ya denali magana abīlī hū twize tūbinhe balye?”

³⁸ Ūbabūja, “Mulī na migatī yīnga? Alijagi mukalole!” Aho badeeba būng'wīla, “Ītanò na ndīlo ibīlī.”

³⁹ Hūna ūbalagīla babawīle a banhū bigashe mu magele-magele ha sī ha maswa, nguno gaalī manīlīzu.

⁴⁰ Na nghana bigasha pyī chiza-chiza, mu magele-magele ga kūbiza aho bigasha banhū igana, aho makūmi atanò.

⁴¹ Wīsola ī migatī īyo ītanò yenīyo, nī ndīlo būbīlī wajo. Ūlangamīla ng'wigūlū ūlūmba, wīmeganya ī migatī īyo ītanò yenīyo, ūbinha a bahemba bakwe būbagabanhya a banhū. Nī ndīlo ījo ibīlī najo gīko, ūbagabanhya pye a bose.

⁴² Būlya bigeja pye a bose.

⁴³ Hūna būgasoleela a mamenyagūlwa, pye na a ga ndīlo, bokaja matangwa ikūmi na abīlī.

⁴⁴ Ī lisaabu lya bagosha abo bakalya ī migatī yenīyo baalī shihūmbī shitanò.

Yesu ūshimīza higūlya ya nyanza

⁴⁵ Haho na haho ū Yesu ūbakomeleja a bahemba bakwe kwingīla mu lyato batonge kū nkīlo, baje Betisaida; ū wei amalīje kūlīlaga ī libità lya banhū.

⁴⁶ Wahayūmala ū kūbalaga, ūlinha mu lūgūlū kūjūlomba.

⁴⁷ Aho būlingīla ū būjikū, ī lyato lyūsangwa līlī kū gatī-gatī ya nyanza, ū wei alī iyene kū sī nyūmu.

⁴⁸ Ūbabona balīkoya ū kūbuga nguno ū nyaga gwabafumīīlaga kū būtongi. Hūna mu madilū mataale ga ngoko ja kwandya, ūbasanga ko alīshimīza higūlya ya nyanza. Wīta gītī alīhaya kūbabītīīla;

⁴⁹ aho bamona alīshimīza higūlya ya nyanza, bakiganika līnghangi būyoganya balīlīla.

⁵⁰ Nguno pye bakamona bogoha kīngī nasho! Alīyo ū wei ūbayombya haho na haho alībawīla, “Timbyagi ngholó, mutogohage nalī nene.”

⁵¹ Hūna ūlinha nanghwe ū mu lyato, goya na koya ū kūhuuyemba ū nyaga. Bakakumya no būjinjimala,

⁵² nguno baalī bataalī ū kūyitegeleja ī mihayo ya migatī. Ī myoyo yabo yalī ītaalī midito.

Kūpīja basaatu Genesaleti

⁵³ Hūna būshika ha ng'walo gwa kū sī ya Genesaleti, būkola henaho.

⁵⁴ Aho bika ū mu lyato haho na haho a banhū būndeeba.

⁵⁵ Bandya kūpeela kūja hose-hose ū mu mapandī genayo; būyūbenha a basaatu, abo baalī batadūgije kūshimīza, būyūbatūūla ha būlīīlī bababūūcha babatwala būlī kwene ūko bang'wigwīlaga.

⁵⁶ Nguno wajaga hose-hose: kū magūngūli, mu mizengo, pyī nū kū matogolo. Akaja na kwigūlilū, nū kwene būng'wenhela bingī abo baalī na makoye, būyūng'wikūmbīlīja bakuumye nūūlū ha neno ya shizwalo shakwe dūhū. Na nghana būlī bene abo bankuumyaga bapīlaga.