Maliko 5 - Sukuma New Testament 2000

Munhū wa Gelasa kwīngījiwa masamva

¹ Bakaja būūkashika kū nkīlo gwa nyanza, mu sī ya Bagelasa.

² Ū Yesu aho wafuma ū mu lyato, haho na haho ūmanhya na munhū w'isamva, alīfuma kū mashigila.

³ H'ūko wikalaga, na walī atīho munhū nūūlū ūmò ūyo walī adūgije kūmohya nūūlū ni bo kūtūmamīla nyololo.

⁴ Nguno nghangala ningī wabohiagwa na nhendele nūūlū minyololo; alīyo wītīnaga dūhū ī minyololo, nī nhendele wajibīnzagūla! Walī atīho munhū nūūlū ūmò wa kūdūla kūngheeba.

⁵ Na lūūlū pyī ī shikū wikalaga kū mashigila na mu ngūlū; līīmi ji na būjikū pe akūhoyookaga, kūnū akwichūbagūlaga na mawe.

⁶ Aho wanoleela ū Yesu ataalī ka kūle, ūmpeeleela ūūkantugīja mazwi,

⁷ kūnū alīlīla n'ilaka lya higūlya alīhaya gīkī, “Bebe Yesu Ng'wana wa ng'wa Mulungu ūyo alī higūlya no, ūlī na mhayo kī nū nene? Nilahīlīlage mu lina lya ng'wa Mulungu gīkī ūtūniluhya!”

⁸ Akahaya gīko nguno ū Yesu walī wamala kūlīlagīla ī lisamva gīkī, “Nfumage ū munhū ng'wenūyo.”

⁹ Hūna ūmūja gīkī, “Ī lina lyako ūlī nani?” Nanghwe ūng'wīla, “Ī lina lyane nalī Mabità, nguno tūlī bingī.”

¹⁰ Hama gūndayīīla ū Yesu gīkī atizūgafunya hanze ya sī yenīyo.

¹¹ Līkasangwa lyalīho idale itaale lya ngulubī jadīīmaga hihī na lūgūlū.

¹² Hūna lūūlū a masamva gūndayīīla ū Yesu galīhaya gīkī, “Tūtwalage ū mu ngulubī ījo tūkingīle mu jene!”

¹³ Nanghwe ūgazunīlīja nghana a masamva genayo, gūfuma gūja gūkingīla ū mu ngulubī jenījo. Ī lidale na būtaale walyo liyita nhambo kūjīlīīla kū lūgegu lo nyanza, jūkagwīla ng'wenūmo jūng'wa nhuli jūchīla mu nyanza, jalī gītī shihūmbī shibīlī!

¹⁴ A badīīmi bajo būpeela nhambo, būja būūkagūkumūcha ū mhayo gwenūyo ū mu nzengo, nū kū magūngūli. Banhū būfuma kūja kūgūlola ūyo gūkilonga.

¹⁵ Aho bashika a halī Yesu, būnsanga ū munhū ūyo walī na mabità ga masamva igashije, nīyo azwalile shizwalo, na a masala gadeekanaga. Bakogoha no!

¹⁶ Hūna a bambonà būbasomboolela īyo īkang'wilongela ūyo walī na masamva; pyī nī ya ngulubī.

¹⁷ A banhū ba kwenūko būng'wikūmbīlīja ū Yesu īnge ū mu sī yabo.

¹⁸ Aho wingīla mu lyato, ū munhū ūyo olī na masamva ūng'wikūmbīlīja gīkī nanghwe anondeele.

¹⁹ Alīyo atanzunīlīgije. Ūng'wīla gīkī, “Jaga kaya kū bang'wing'we, ūkabasomboolele īyo wakūbeegejaga ū Seeba, ūmo wakūchīlaga shigongo.”

²⁰ Nanghwe nghana wīnga a henaho ūja Dekapoli, ūūkandya kwīkumūcha īyo akīītīlwa na Yesu, būyūkumya pye a banhū!

Būdūla bo kūpīja na kūjūūcha

²¹ Hūna ū Yesu ūkīla nyanza hangī bo mu lyato, aho washika hangī ū kū nkīlo, ūsanga ibità itaale lya banhū, baalī banindīīla haho bbihī nī nyanza. Wahayika ū mu lyato, a banhū būng'witinja.

²² Kūhayimanīla wiza munhū ūmò, ntaale w'isinagogi; lina lyakwe Yailo. Aho wamona ū Yesu, ūngwīla mu magūlū.

²³ Ūng'wikūmbīlīja mu kwidohya, alīng'wīla gīkī, “Kashīke kane kalīsaata, nīyo kalī mandetendete, nzūgū ūkatūūlīle makono kapīle, kīnge ū mu nhabaala!”

²⁴ Ūbūūka ūja hamò nanghwe, nī libità na būtaale walyo nalyo lyūnondeela; banhū būyūnshiteleja.

²⁵ Walīho nkīma nebe, wakoyiagwa būsaatu bo ngeji, nose ūmala myaka ikūmi n'ībīlī.

²⁶ Wikalaga akūsīngījaga mu bafumu, alīyo baalī balemeelwa ū kūngunaana, ūlū ītī kūmaja shikolo shakwe dalali dūhū, na kūmanūng'ongegeja makoye!

²⁷ Aho walwigwa ū lūkumo lwa ng'wa Yesu, wiza nanghwe akūchiibīlījaga ū ng'wibità lya banhū; wizīīla kū numa ūshika wīkuumya ī nghanjo ya ng'wa Yesu.

²⁸ Nguno wiwīlaga gīkī, “Nūūlū nūkuumya shizwalo shakwe dūhū nakūpīla!”

²⁹ Na nghana haho na haho ū ngeji goya, a mininga gakwe gūkama, wiyigwa ū mu mīlī gokwe gīkī, opīla a makoye gakwe genayo.

³⁰ Ī likanza lyenīlo ū Yesu wibona nguzu jang'wīnga, wikībūka ū kū numa ūbabūja a banhū alīhaya, “Nani okuumya shizwalo shane?”

³¹ A bahemba bakwe būnshokeja balīhaya, “Nibūlī ūlībūja nani onikuumya, alīyo ūlībabona gīkī a banhū bakūshitelejaga?”

³² Ū wei wandya kwilalangīja pye a hose, amone ūyo akagwīta ū mhayo gwenūyo.

³³ Ū nkīma ng'wenūyo ogoha wandya kūdetema, nguno akagūmana ūyo gūkang'wilongela; wiza ho ūshika ūgwa mu magūlū ga ng'wa Yesu, ūnsomboolela pyī ī yose gīt'ūmo īlī.

³⁴ Nanghwe ūng'wīla gīkī, “Nshīke wane, ū kūzunya kwako kwakūpījaga, jaga mu mhola, a makoye gako gakwīngaga.”

³⁵ Aho ataalī ūyomba gīko kwimanīla biza banhū, bakatūng'wa kūfuma ū kū ng'wa ntaale w'isinagogi; būshikīla kūhaya gīkī, “Ū nshīke wako wazumalīka, numho ūtaalī na mhayo kī gwa kūnkoya ū Nangi?”

³⁶ Ū Yesu aho wagwigwa ū mhayo gwenūyo ūng'wīla ū ntaale w'isinagogi gīkī, “Ūtogohage, bebe ng'wene sanyaga dūhū.”

³⁷ Na lūūlū ū Yesu atabazunīlīgije banhū bangī ū kūshikīīla ho hamò nanghwe, ūbasola ba Petelo na Yakobo, nū Yohana ū ng'wanong'wawe wa ng'wa Yakobo.

³⁸ Aho bashika a ha ng'wa ntaale w'isinagogi, ūsanga yabizaga myanda-myanda ya yoge; banhū bakūfuutagīlaga, na kūtūla nghūngū.

³⁹ Ūbawīla, “Nibūlī mulīyoganya na kūlīla gīko? Atachile ū ng'wana, alaalile dūhū!”

⁴⁰ Būnseka nyachilū-chilū kūlwa kūndalaha. Alīyo ū wei ūbafunya hanze pye a bose. Ūbasola dūhū a babyaji ba ng'wana, na a babo bakashikīīla nanghwe hoi; wingīla nabo ūmo walī ū ng'wana.

⁴¹ Ūshika ūndima nkono ū ng'wana; hūna witana alīhaya, “Talita kumi!” Makūlū gaho, “Ng'wanikī nalīkūwīla būūkaga!”

⁴² Na nghana haho na haho ū ng'wanikī ūbūūka, wandya kūshimīza, nguno walī wa myaka ikūmi n'ībīlī. Bakakumya na kakumīje kangī nako.

⁴³ Hūna ūbakomeleja no-no-no, gīkī atizilonga wa kūgūmana ū mhayo gwenūyū, hama ūbawīla bang'winhe shilīwa.