Maliko 3 - Sukuma New Testament 2000

Munhū wa nkono gūhaamalalile

¹ Lwise lūngī wingīla hangī ng'wisinagogi; walīmo na munhū wa nkono gūhaamalalile.

² Bamò abo baalīmo bandya kūnola mu kūng'witega-tega, gīkī bamone ūlū akūmpīja ū munhū ng'wenūyo ha sabato, bapandīke nzīla ya kūnsola būbi.

³ Nanghwe ū Yesu ūng'wīla ū munhū ng'wenūyo gīkī, “Al'īmīīlaga a ha gatī aho!”

⁴ Hūna ūbabūja gīkī, “A ha sabato īzunīlīgije kūbeeja yawiza, nūūlū kūbeeja yabūbi? Kūpīja munhū, nūūlū kūbūlaga?” Būhuumūla sele!

⁵ Ū Yesu ūsaaya no, ūyūbalola-lola pye a bose, ūbasaatwa kūlwa būganghanazu bo ngholó jabo! Hūna ūng'wīla ū munhū ng'wenūyo gīkī, “Gūgoloolage ū nkono gwako.” Nghana ūgūgoloola, gūbiza gwapīla ū nkono gwakwe.

⁶ Ī likanza lyenīlo a Bafalisayo būfuma hanze na ban'ikūlū ba ng'wa Helode, būūkandya kūbeeja long'we ya kūnyagaja!

Kūpīja banhū ha ng'walo gwa nyanza

⁷ Nanghwe ū Yesu na a bahemba bakwe būja kū nyanza, n'ibità itaale lya banhū kūfuma mu Galilaya na Būyudaya lyūbalondeela.

⁸ Bamò baalī ba kūfuma Yelusalemu, bangī Idumea na kū nkīlo gwa Yolodani. Na bangī bafumaga mhandī ja Tulo na Sidoni: mabità na mabità ga banhū būyūnkūūbīja aho bayigwa īyo wayītaga.

⁹ Hūna ūbawīla a bahemba bakwe bang'wegelegeje lyato, batizūnkandīkīja a banhū;

¹⁰ nguno wapījaga bingī no. Nose pye abo baalī na makoye bichiibīlījaga, gīkī nūūlū bankuumye bo kūngwīla.

¹¹ Abo baalī na masamva ūlū bamona bagwaga ū kū būtongi bokwe kūnū balīlīla būhaya gīkī, “Ū bebe ūlī Ng'wana wa ng'wa Mulungu.”

¹² Alīyo ū wei obalemejaga batizūnkumūcha akamanwa.

Batūng'wa ikūmi na babīlī kūsolwa

¹³ Hūna ūlinha mu lūgūlū, ūbitana abo walī abahayile, būnondeela.

¹⁴ Ūbasolanhya ikūmi na babīlī, babize ba kwikala hamò nanghwe, na kūyūbatūma kūja kūlomeela.

¹⁵ Hama babize na būdūla bo kūpeeja masamva.

¹⁶ Hūna lūūlū ūbiza wabasola abo ikūmi na babīlī; baalī: Simoni ūyo akang'winha lina lya Petelo,

¹⁷ na Yakobo ng'wana Zebedayo hamò na Yohana ng'wanong'wawe, abo akabilīka lina lya Boanelige, makūlū gaho bagosha ba kūluma kwa mbula!

¹⁸ Na Andelea na Filipo, na Batolomayo, na Matayo, na Tomaso na Yakobo ng'wana Alifayo, na Tadayo, na Simoni muna Kanaani,

¹⁹ na Yuda Isikaliote, ūyo akabiza nodeeji wakwe!

Yesu na Belizebuli

²⁰ Hūna wingīla mu numba, ibità lya banhū lyūng'okalīīla hangī, kūshisha būgayiwa nūūlū ng'wanya gwa kūlya shilīwa.

²¹ A bang'wawe aho bayigwa ī yenīyo būja ko gīkī bakandime. Nguno bakandya kwiganika gīkī, “Ū ng'wenūyū gabipile a masala.”

²² Baalī biza na balangi ba shilagīlo kūfuma Yelusalemu, a bene būyūhaya, “Ū ng'wenūyū alī na Lībelizebuli,” na gīkī, “A masamva akūgapeejaga mu būdūla w'itaale lya masamva!”

²³ Hūna ū wei ūbitana a banhū būng'wegeela, wandya kūbawīla mu shigemenghejo gīkī, “Īdūlīkanile ginehe ū Shetani ampeeje Shetani?”

²⁴ Na gīkī, “Ū būtemi ūlū būgabanīka hūna wandya kwilwisha boi wenekīlī na wenekīlī, būtūdūla ū kwīmīīla ū būtemi wenūbo.

²⁵ Nūūlū kaya ūlū yūgabanīka hūna yandya kwiyūbūkīla yoi yenekīlī na yenekīlī, ītūlama ī kaya yenīyo.

²⁶ H'ūmo īlī nū kūlī Shetani; nanghwe ūlū wandya kūgabanīka na kwilwisha wei ng'wenekīlī na ng'wenekīlī, atūdūla ū kwīmīīla. Numho ī ngelelo yakwe yashikaga.”

²⁷ Alīyo managi gīkī, “Atīho munhū ūyo adūgije kwingīla mu numba ya ngosha o nguzu, wandya kwīnja shikolo shakwe bo makaala; ūlū atandije tame antunge ū o nguzu ng'wenūyo, h'adūle ū kwīyiboneela ī kaya yakwe.

²⁸ Nalīmuwīla gwa nghana gīkī, a banhū badūgije kūlekejiwa ī shibi ī shingī na shingī, nūūlū būsondagūji ūbo bakūwīta.

²⁹ Alīyo ū wa kūnsondagūla Moyo Ng'wela, ū ng'wene atīko ū kūlekejiwa kūshisha welelo bose, nguno wītaga shibi sha nsango gwa būja na būja!”

³⁰ Akīhaya ī yenīyo nguno bahayaga gīkī, “Alī na moyo nsoso.”

Yesu na bang'wawe

³¹ Hūna ū nina wiza hamò na a baana ba ng'wawe ū Yesu, būshika bīmīīla hanze, būtūmīja itanwe.

³² Banhū bingī baalī bigasha būmpīndya, hūna būng'wīla gīkī, “Alilolaga a hanze aho, ūūyo ū noko na a bazunayo na a balūmbūyo balīkūkooba.”

³³ Nanghwe ūbashokeja alīhaya gīkī, “Nani ū mayū ū nene, na a bazuna bane banani?”

³⁴ Hūna ūyūbalola-lola pye abo baalī bigasha bampīndije, kūnū alīhaya gīkī, “Baaba mulībabona aha a bamayū na a bazuna bane.

³⁵ Nguno būlī ng'wene ūyo akwītaga īyo Mulungu atogilwe, ū ng'wenūyo hū nzuna wane, n'ilūmbū lyane, na mayū.”