Luka 5 - Sukuma New Testament 2000

Kwitanwa kwa bahemba ba kwandya

¹ Lwise lūngī ū Yesu walī wīmīīla ha ng'walo gwa nyanza ya Genesaleti, a banhū būng'okalīīla kūdegeleka mhayo go ng'wa Mulungu.

² Ūbona mato abīlī galī a ha ng'walo gwa nyanza; alīyo a bategi baalī bagaleka, boojaga mitego ha mhūjo.

³ Wingīla mu līmò lyago, lyalī lya ng'wa Simoni, ūng'wīla alīsegeje ho hado, lībize gītī lyagwīngīla ū ng'walo. Hūna wigasha mo, wandya kūbalanga a banhū.

⁴ Aho wamala ū kūlanga ūng'wīla ū Simoni gīkī, “Bugaga ūje kū būjiba, ūkategele kwene ī mitego ying'we, mukūgwasha.”

⁵ Nanghwe ū Simoni ūng'wīla, “Seeba twakoyaga no būjikū pe, alīyo ndūhū nūūlū kūgwasha shose-shose; kwike īkī ūlīhaya, nahene naje ko nakītege ī mitego.”

⁶ Aho wīta gīko būgwasha ndīlo ningī no, nose ī mitego yabo yandya kūtandūka!

⁷ Baalī na bichabo mu lyato līngī, būbashinyela bize babambīlīje. Aho bashika būgokaja pyī būbīlī wago a mato, nose gūyūhaya kūtubīla kūlwa būdito bo ndīlo!

⁸ Ū Simoni aho wabona gīko, ūtuja mazwi ū kū būtongi bo ng'wa Yesu ūhaya gīkī, “Īngaga Seeba ūnileke ū nene, nguno nalī munhū wa shibi!”

⁹ Nguno aho bapandīka ndīlo ningī gīko, akakumya no, pye na a bangī abo walī nabo.

¹⁰ Pye na a bategi biye ū Simoni, a ba Yakobo nū Yohana, a bitūnja ba ng'wa Zebedayo nabo bakakumya no. Hūna ū Yesu ūng'wīla ū Simoni gīkī, “Ūtogohage; kūfuma haha ūkūbiza nzubi wa banhū, kūbingīja mu būpanga.”

¹¹ Aho bagakoja ha ng'walo a mato, būleka pyī ī shikolo, būnondeela wei.

Kwejiwa kwa munhū wa mbiji

¹² Ikanza ilebe walī mu nzengo gūmò gwaho, walīho ngosha ūmò walī watowa mbiji, aho wamona ū Yesu, winama kūshisha ha sī; kūnū alīng'wikūmbīlīja alīhaya, “Seeba ūlū ūtogwa ūdūgije kūneeja!”

¹³ Ū Yesu ūgoloola nkono ūnkuumya; kūnū alīng'wīla gīkī, “Natogagwa elaga!” Haho na haho ī mbiji jūng'wīnga.

¹⁴ Hūna ūnkomeleja ū munhū ng'wenūyo gīkī atizūng'wīla munhū nūūlū ūmò, alīyo ūng'wīla, “Jaga ūkiyooleche kūlī ngabīji, ūkafunye na shakwinha kūlwa kwejiwa kwako, gīt'ūmo Musa alagīlile; būbize ho būkaanīji kūbo.”

¹⁵ Ū lūkumo lokwe lūkasambaala, būyūng'okalīīla banhū bingī kwiza kūndegeleka, na kūpījiwa ndwala jabo ja būlī mbika.

¹⁶ Kwike ū wei wisundaga waja kū mapandī gatī na banhū, kūjūlomba iyene.

Kūpījiwa munhū wa būsaatu wa mangwisha

¹⁷ Na lūshikū lūngī hangī walangaga, baalī bigasha ho na Bafalisayo hamò na balangi ba shilagīlo, ba kūfuma mu magūngūli gose, a ga mu Galilaya, nī Būyudaya; pye na Yelusalemu. Ū būdūla bo ng'wa Seeba bolī hamò nanghwe kūlwa kūpīja basaatu.

¹⁸ Kūhayimanīla bashika bagosha babūūkije munhū ha shilago, walī na būsaatu wa mangwisha; ī nghūmbū jabo jalī kūnshisha ha būtongi bo ng'wa Yesu.

¹⁹ Alīyo īkī a banhū baalī bingī būgayiwa ī nzīla ya kūnshisha aho walī ū Yesu. Būlinha kwigūlya ya numba būūkagahega a malongo na a mazengo, hūna būng'wicha nī shilago shakwe būntūūla ha gatī-gatī ha būtongi bo ng'wa Yesu.

²⁰ Ū Yesu aho wakūbona ū kūzunya kwabo, ūhaya, “Bahebu, olekejiagwa ī shibi shako.”

²¹ A balangi ba shilagīlo na a Bafalisayo bandya kūng'ung'uula balīhaya, “Ū munhū ng'wenūyū ni nani ī gete agūhayaga mihayo ya nyagimu gīko? Nani ūyo adūgije kūlekeja shibi ūlū atī Mulungu dūhū!”

²² Ū Yesu ūbūdeeba ū būng'ung'uuji wabo, hūna ūshosha alībawīla gīkī, “Nibūlī mukūng'ung'uulaga ū mu ngholó jing'we?

²³ Ī gīsī, ū nogu ni gūlī ginehe? Ū gwa kūhaya gīkī, ‘Walekejiagwa ī shibi shako;’ nūūlū hamo ū gwa kūhaya gīkī, ‘Būūkaga ūshimīze?’

²⁴ Ali lūūlū, shiigelile mumane gīkī ū Ng'wana o Munhū alī nabo ū būdūla bo kūlekeja shibi ū mu sī.” Hūna ūng'wīla ū nsaatu gīkī, “Nalīkūwīla būūkaga, ūshibūūche ī shilago shako ūje kaya.”

²⁵ Nghana ūbūūka haho na haho mu būtongi wabo, ūshibūūcha ī shilago īsho walī ashilaalīlile, ūgumha ajile kaya akūnkumīlījaga Mulungu.

²⁶ Pye būgwīlwa idedebaja, bogoha no; būyūnkumīlīja Mulungu gwike, kūnū bakwiwīlaga gīkī, “Lelo twabona mihayo ya kūkamaaja!”

Kwitanwa kwa ng'wa Lawī

²⁷ Yahayūbīta ī yenīyo, ūfuma wīnga a henaho; ūmona ntobisha wa goodi, lina lyakwe Lawī, igashije ng'witobisījo lya goodi; ūng'wīla, “Nilondeelage.”

²⁸ Ūshileka pyī ī shikolo, ūbūūka ūnondeela.

²⁹ Ū Lawī aho washika ha ng'wakwe ūmeegeja shigukulu shitaale ū Yesu. Lyalīho n'ibità itaale lya batobisha ba goodi na banhū bangī; nabo bigasha ū kūlya ī shilīwa.

³⁰ Kwike a Bafalisayo na a balangi babo ba shilagīlo būyūduguma ū kū bahemba bakwe; bakūbawīlaga gīkī, “Nibūlī mukūlyaga na kūng'wa hamò na batobisha ba goodi, būyaga na banhū ba shibi?”

³¹ Alīyo ū Yesu ūshosha ūbawīla, “A banhū a bapanga batī na nguno na nfumu, alīyo a basaatu h'abo bakankoobaga.

³² Ū nene natizile kwitana batūngīlīja, alīyo ba shibi; gīkī bagalūke.”

Shīmīle sha kūfunga

³³ Hūna būng'wīla gīkī, “Nghangala ningī a bahemba ba ng'wa Yohana bakabizaga na ikanza lya kūfunga na kūlomba, pye na a ba Bafalisayo bakīītaga ī gīko; lelo a bako bene ni bakūlyaga na kūng'wa dūhū shi!”

³⁴ Nanghwe ū Yesu ūbawīla gīkī, “Mudūgije kūbīīta bafunge a bageni ba ha būkwīlīma, alīyo nū ntooji ataalī hamò nabo?

³⁵ Jikūshika ī shikū ja kwīngījiwa ū ntooji, ū mu shikū jenījo hū bakūyūfunga!”

³⁶ Ūbawīla lūsumo gīkī. “Atīho ūyo akatandūlaga shilaka kwīnga ha ng'wenda mpya wasumīīla ha ng'wenda nkūlūkūlū. Ūlū wīta gīko akūbiza wagūtandūla nū mpya, yūkenaagūka būbīlī wayo; nguno ū ng'wenda ū nkūlūkūlū gūtizunīlīja nī shilaka ī shipya.

³⁷ Na hangī atīho ūyo akabīkaga divai mhya ng'wibīkīlo ikūlūkūlū, ūlū wīta gīko, ī divai ī mhya īkūlītandūla ī libīkīlo ī likūlūkūlū; yidīka ha sī ī divai, nī libīkīlo lyūkenaagūka.

³⁸ Alīyo ī divai ī mhya shiigelile ībīkwe ng'wibīkīlo ipya.

³⁹ Nūūlū hangī atīho munhū wa kūng'wa shakūng'wa sha kale hūna hangī ūshoka kwikūmva shisūhya; nguno akūhaya gīkī ī sha kale shinonu!”