Luka 2 - Sukuma New Testament 2000

Kūbyalwa kwa ng'wa Yesu

¹ Ū mu shikū jenījo shikafunyiwa shilagīlo na Kaisali Augusto, gīkī pye a banhū ū mu sī bandīkwe.

² Ū wenūbo būkabiza wandīkwa bo kwandya aho Kilenio alī nsugi wa Sulia.

³ Hūna lūūlū pye a banhū būja kwandīkwa, būlī ng'wene kū nzengo go ng'wawe.

⁴ Ū Yosefu nanghwe ūbūūka ī Galilaya, kūfuma mu nzengo gwa Nazaleti. Ūlinha kūja Būyudaya kū nzengo go ng'wa Daūdi, gwitanagwa Betelehemu, nguno walī wa numba ya ng'wa Daūdi na būbyīle bokwe.

⁵ Ūja akandīkwe hamò nū Malia ūyo walī anūngije, ū mu shikū jenījo ū Malia ūsangwa alī nda nhaale.

⁶ Aho balī kwenūko lyūshikīīla ī likanza lyakwe lya kūbyala.

⁷ Ūbyala ng'wana ngosha; tangì wakwe. Ūnkumba myenda ya sheleele, hūna ūnaalīkīja ng'wilīīlo lya mitugo, nguno bakagayiwa ū ng'wanya ū mu numba ya bageni.

Bamalaika kū badīīmi

⁸ Ī mhandī jenījo baalīho badīīmi ba ngholo baalī lūgundīīga; baalī kū matogolo bakūlanghanaga madale ga ngholo jabo makanza ga būjikū.

⁹ Bahayimanīla malaika o ng'wa Seeba obilongela, būpīndiwa na būpe w'ikūjo lya ng'wa Seeba, bogoha na kogohele kataale no!

¹⁰ Alīyo ū malaika ūbawīla gīkī, “Mutogohage, nguno nang'wenhela Nghūlū Jawiza, ījo jikūbiza ja būyegi būtaale kū banhū bose.

¹¹ Ī lelo yenīyī, ū mu nzengo go ng'wa Daūdi ng'wabyalīlagwa Mpīja, Kilisto Seeba.

¹² Ī shimanīkījo shing'we shilī gīkī, mukūmona Ng'wana ng'weleele alingīīlilwe myenda ya sheleele, alaajiwe ng'wilīīlo lya mitugo!”

¹³ Kūhayimanīla lilonga ibità itaale lya ng'wigūlū, nū malaika ng'wenūyo wisanja nabo. Būnkumīlīja Mulungu balīhaya gīkī,

¹⁴ “Ikūjo lībize kūlī Mulungu higūlya no, nū mu sī ībize ho mhola ū kū banhū abo banyegije.”

¹⁵ A bamalaika aho bīnga baja ng'wigūlū, a badīīmi benabo biwīla gīkī, “Tūjagi ī Betelehemu tūkagūbone ū mhayo ūyo gwilongaga gwenūyū, ūyo watoolekeja ū Seeba.”

¹⁶ Nghana bihuuta bajile ko, būūkansanga ū Malia nū Yosefu, hamò nū Ng'wana alaalile ng'wilīīlo lya mitugo.

¹⁷ Aho bamona ū Ng'wana bīsomboola ī mihayo yakwe, gīt'ūmo baalī bawīlīlwa.

¹⁸ Pye abo bakigwa īyo bakawīlwa na a badīīmi būkumya no.

¹⁹ Alīyo ū Malia wīsūmbya pyī ī mihayo yenīyo, wībīka mu ngholó yakwe, ūyūyideedenghanya.

²⁰ A badīīmi aho bībona pyī ī yenīyo, būshoka balīnkumīlīja Mulungu, na kūngongoola. Nguno īyo baalī bawīlwa bakībona ī yose, gīkī yalī gīt'ūmo baalī bigwīla.

Yesu kwenhwa mu hekalu ha weleele

²¹ Ū Ng'wana aho washisha shikū inaane būnsaala, būng'winha ī lina lyakwe ī lya Yesu, īlo walī winhwa na malaika kūko ataalī nūūlū kūtungīlwa nda.

²² Jahayūshika ī shikū ja kwejiwa kwabo, būntwala Yelusalemu kūjūntūūla kū būtongi bo ng'wa Seeba, gīt'ūmo shihayīlile shilagīlo sha ng'wa Musa.

²³ H'ūmo yandīkīlilwe mu shilagīlo sha ng'wa Seeba, gīkī, “Būlī ng'wana ngosha ū wa kūhangūla nda ya ng'wa nina, akwitanwa alī ng'wela kūlī Seeba.”

²⁴ Būfunya na shitambo gīt'ūmo shilagīlo sha ng'wa Seeba shihayīlile: nghūūlū ibīlī, nūūlū nghune ibīlī ja mhunda.

²⁵ Ū mu Yelusalemu walīmo ngosha witanagwa Simioni, munhū ntūngīlīja na wa logohano. Walī akūlindīīlile ū kūlūngūjiwa kwa Baisilaeli; nū Moyo Ng'wela walī hamò nanghwe.

²⁶ Nīyo ū Moyo Ng'wela walī wamanīkīja gīkī, atūcha aho ataalī kūmona Kilisto o ng'wa Seeba.

²⁷ Hūna ū Moyo ūtongeela ū munhū ng'wenūyo kūja kū hekalu, ūūkingīla mo. Aho bang'wenha a babyaji bakwe ū Ng'wana ū Yesu, kwiza kwītīlwa gīt'ūmo shalī shīmīle sha shilagīlo, ū munhū ng'wenūyo

²⁸ ūng'wanukūla ū Ng'wana mu makono gakwe. Hūna ūnkumīlīja Mulungu alīhaya gīkī,

²⁹ “Seeba, ī haha lūūlū wanzunīlīja ū nsese wako kwīnga, aje mu mhola gīt'ūmo ūkahayīla.

³⁰ Nguno a miso gane gabūbona ū būpīji wako,

³¹ ūbo ūbalonja-longegije banhū bose.

³² Isana lya kwakīla mahanga, n'ikūjo kūlwa banhū bako a Baisilaeli.”

³³ Ū ise nū nina wa Ng'wana bakīkumya īyo īkahayiwa kūlwakwe.

³⁴ Hūna ū Simioni ng'wenūyo ūbafuuha mbango. Ū nina ū Malia ū ng'wene ūng'wīla, “Managa gīkī, ū Ng'wana ng'wenūyū ahelelilwe nīmo ūyo gūkwenheleja banhū bingī ū mu Baisilaeli kūgwa, na bangī kūgūngūmūka; hama akūbiza shimanīkījo sha kwihalalījiwa.

³⁵ Hangī maganiko ga ngholó ja banhū bingī gakūtendwa ha ng'wape; nīyo nū bebe ū būpanga boko būkūching'wa līlūshū!”

³⁶ Walīho na nghangi nkīma, Ana ng'wana Fanueli; ngikūlū o shikū ningī, o lūganda lo ng'wa Asheli. A ha būnhya bokwe walī watoolwa, wikala nū ngoshi ikanza lya myaka mpungatī,

³⁷ ūchīlwa! Hūna wikala gīko dūhū atatoolilwe, kūshisha myaka makūmi anaane n'īnè. Walī atīngaga ū mu hekalu, wikalaga ng'wenūmo līīmi ji na būjikū pe; nīmo gokwe kūlomba na kūfunga.

³⁸ Nanghwe ī likanza lyenīlo wiza hoi, ūbawīla ī mihayo ya Ng'wana ng'wenūyo, pye a bana Yelusalemu abo baalī balindīīlile būpīji.

Kūshoka Nazaleti

³⁹ Aho bīmala pyī ī myanya gīt'ūmo shalī shihayīlile ī shilagīlo sha ng'wa Seeba, būshoka Galilaya kū nzengo gwabo gwa Nazaleti.

⁴⁰ Ū Ng'wana ūkūla, ūbiza na nguzu, na a masala ūkwīja, hama nī mbango ja ng'wa Mulungu jalī hamò nanghwe.

Yesu mu hekalu ha būdinha bokwe

⁴¹ Būlī ng'waka a babyaji bakwe bajaga Yelusalemu, kū shigukulu sha pasaka.

⁴² Na a haho washisha myaka ikūmi n'ībīlī, būlinha bajile ko gīt'ūmo shalī shīmīle sha shigukulu.

⁴³ Aho jang'wa ī shikū ja shigukulu, būbūūka kūshoka kaya. Alīyo ū ndinha ū Yesu ūsaaga Yelusalemu, kwike a babyaji bakwe baalī batamanile.

⁴⁴ Būshimīza lūgendo lwa lūshikū lūgima, baliganika gīkī nanghwe alīmo dūhū ū ng'wibità lya banhū. Bahayūngayiwa, bandya kūnkooba ū mu badūgū nū mu bimane babo.

⁴⁵ Aho baduuma ū kūmona, būshoka ī Yelusalemu bakūnkoobaga.

⁴⁶ Jūbīta shikū idatū, bahayūja kū hekalu būūkansangīla mo, wigashaga na balangi, alībadegeleka na kūyūbabūja mabūjo.

⁴⁷ Pye abo bang'wigwaga babūkumyaga ū witegeleja bokwe, na a mashosho gakwe.

⁴⁸ A babyaji bakwe aho bamona būdedebala! Ū nina ūng'wīla gīkī, “Bebe Ng'wana, nibūlī watwītīlile mhayo gūlī gīko? Ū nene nū so watūpīnīhagije no, tūkūkūkoobaga!”

⁴⁹ Nanghwe ūbashokeja ūbawīla, “Nibūlī mulīnikooba? Mutamanile gīkī shinigeleelilwe kūbiza mu numba ya ng'wa Baba?”

⁵⁰ Kwike batagwitegelegije ū mhayo ūyo akabawīla gwenūyo.

⁵¹ Alīyo ūshoka nabo, būtulumenha bajile ī Nazaleti, ūyūbigwa mu yose. Ū nina wībīka mu ngholó yakwe pyī ī yenīyī.

⁵² Ū Yesu ūkūla, ongeja ū mu witegeleja, nū mu kūnyeja ū Mulungu, na a banhū.