Kukundulwa 7 - Sukuma New Testament 2000

Baisilaeli abo bamenghilwe

¹ Hūna a ha numa ya yenīyo nūbona bamalaika banè bīmīīlaga kū mhandī ja sī būnè wajo. Baalī bīdimīīlile ī miyaga ya sī būnè wayo, bīhangīja ītizīhuuyembela ī sī nī nyanza; nūūlū ītizūhuuyembela ntī gose-gose.

² Nūmona na malaika ūngī aliza kūfuma kū būfuma-līīmi, walī n'imenghelo lya ng'wa Mulungu mpanga; ūbahamukīla n'ilaka itaale a bamalaika a banè, abo baalī bazunīlījiwa kwīkenaagūla ī sī nī nyanza.

³ Ūbawīla gīkī, “Mutizīkenaagūla ī sī nī nyanza nī mitī; kūshisha tūbamenghe kū būshū a batūmami ba ng'wa Mulungu wise!”

⁴ Hūna nūliigwa ī lisaabu lyabo abo bakamenghwa; baalī shihūmbī igana na makūmi anè na shinè (144,000) ba kūfuma mu būlī lūganda lo Baisilaeli.

⁵ Ū mu lūganda lo ng'wa Yuda, būmenghwa 12,000. A ba mu lūganda lo ng'wa Lubeni 12,000. A ba mu lūganda lo ng'wa Gadi 12,000.

⁶ A ba mu lūganda lo ng'wa Asheli 12,000. A ba mu lūganda lo ng'wa Nafutali 12,000. A ba mu lūganda lo ng'wa Manase 12,000.

⁷ A ba mu lūganda lo ng'wa Simioni 12,000. A ba mu lūganda lo ng'wa Lawī 12,000. A ba mu lūganda lo ng'wa Isakaali 12,000.

⁸ A ba mu lūganda lo ng'wa Zabuloni 12,000. A ba mu lūganda lo ng'wa Yosefu 12,000. Na a ba mu lūganda lo ng'wa Benjamini 12,000.

Būhī na būhī wa banhū

⁹ Ha numa ya henaho, aho nataalī nalolile nūbona ibità lya banhū itaale no, atīho nūūlū ūmò ūyo adūgije kūbasolooja; baalī ba kūfuma mu mahanga gose, na ng'anda jose, ba ndūgū jose na ndīmi jose. Baalī bīmīīlile ū kū būtongi w'Isumbī lya būtemi, nū kū būtongi bo Ng'wana wa Ngholo, bazwalile shizwalo shape. Ū mu makono gabo baalī babūūkije matambī ga mitī ya nhende.

¹⁰ Bahamukaga n'ilaka itaale balīhaya gīkī, “Ū būpīji būlī bo ng'wa Mulungu wise ūyo igashije h'Isumbī lya būtemi; hamò na Ng'wana wa Ngholo.”

¹¹ Hūna pye a bamalaika abo baalī balīpīndije ī Lisumbī lya būtemi, na a Banamhala nī Shiseeng'wa shipanga ī shinè, būgwa bachimīgije ū kū būtongi w'Isumbī lya būtemi, būnamya ū Mulungu.

¹² Būhaya gīkī, “Ee, kūkumīlīja na kūgongoola na masala na kūlūmba, n'ikūjo na būdūla na nguzu; shiigeleelilwe kūlī Mulungu wise welelo na welelo: Alichene!”

¹³ Hūna ūmò wa Banamhala ūlūngalūnga; ūniwīla gīkī, “Banani abo bazwalile shizwalo shape benaba, na hangī bafumile halī?”

¹⁴ Nane nūng'wīla, “Seeba wane; ū bebe h'ūyo ūmanile!” Hūna ūniwīla gīkī, “A benaba hū bene abo bafumile mu būluhiwa ū būtaale; ī shizwalo shabo baashifula mu mininga ga Ng'wana wa Ngholo.

¹⁵ H'ī nguno yene balī kū būtongi w'Isumbī lya būtemi lya ng'wa Mulungu, bakūntūmamīlaga līīmi na būjikū mu hekalu yakwe. Nanghwe ūyo igashije h'Isumbī lya būtemi akūbafīīkīja n'iheema lyakwe.

¹⁶ Batalatuuba hangī, nūūlū notà batalakolwa, nūūlū līīmi lītalaboocha, pyī nūūlū miyaga yose-yose ītalabakoya hangī.

¹⁷ Nguno ū Ng'wana wa Ngholo ūyo alī ha gatī y'Isumbī lya būtemi, akūbadīīma na kūbatongeela kū nzwinzī ja minzī mapanga. Ū Mulungu akūshipyagūla ī shisoji shīnge pyī ū mu miso gabo.”