Kukundulwa 5 - Sukuma New Testament 2000

Ng'wana wa Ngholo na shitabo

¹ Hūna nūbona shitabo ū mu nkono gwakwe ū gwa būlyo, ūyo walī igashije a h'Isumbī lya būtemi. Shalī shandīkilwe ū mu gatī na a higūlya, hama shūtungwa matungījo mpungatī.

² Kūhayimanīla nabona malaika wa nguzu alīhamuka n'ilaka itaale alīhaya gīkī, “Nani ūyo igeleelilwe kūgataligūla a matungījo gasho ī shitabo, na kūshikundūla?”

³ Atigelile nūūlū ūmò, pye hose na hose ū ng'wigūlū nū mu sī, nūūlū ni mu gatī ya sī; atilongile wa kūdūla kūshikundūla ī shitabo shenīsho, nūūlū kūshilola dūhū yaya!

⁴ Nakalīla no nguno akagaya nūūlū ūmò, ūyo igeleelilwe kūshikundūla ī shitabo shenīsho, nūūlū kūshilola!

⁵ Alīyo ūmò wa Banamhala ūniwīla gīkī, ūtalīlage; nolage ūyo alī Shimba ya lūganda lo ng'wa Yuda, ūyo alī Nji go ng'wa Daūdi. Ū ng'wenūyo hū mpyeni, hū ng'wene akūgataligūla a matungījo mpungatī ga shitabo shenīsho, ashikundūle!

⁶ Hūna a ha gatī-gatī y'Isumbī lya būtemi nūmona Ng'wana wa Ngholo wīmīīlaga, walī apīndiwe nī Shiseeng'wa shipanga ī shinè, hamò na a Banamhala. Wabonekanaga gītī gīkī walī wasīnzwa, na walī na mapembe mpungatī na miso mpungatī. Ī yenīyo h'ī Myoyo ya ng'wa Mulungu īyo īkatūmagwa kūja hose pyī ū mu sī.

⁷ Ūshika ūshisola ī shitabo ū mu nkono gwa būlyo gwakwe ūyo walī wigasha h'Isumbī lya būtemi.

⁸ Aho washisola ī shitabo, ī Shiseeng'wa shipanga ī shinè na a Banamhala abo makūmi abīlī na banè būgwa ū kū būtongi bokwe ū Ng'wana wa Ngholo. Būlī ng'wene walī na ndono; na baalī na nzweso ja zahabu jokalile ngazu go ng'waso gwawiza, hū būlombi wa beela.

⁹ Bandya kūhelelekeja kwīmba lyīmbo ipya; balīhaya gīkī, “Wigeleelilwe ū bebe kūshisola ī shitabo, nū kūgataligūla a matungījo gasho, nguno ūkasīnzwa. Hūna kūlwa mpango gwa mininga gako wankomoolelile banhū ū Mulungu, kūfuma mu ng'anda na ndīmi jose, na mahanga gose.

¹⁰ Wabīītile kūbiza būtemi kūlwa ng'wa Mulungu wise; ūbīīta kūbiza bagabīji, na bakūbiza basugi ū mu sī.”

¹¹ Hūna nūbona, hama niigwa n'ilaka itaale lya bamalaika baalī balīpīndije ī Lisumbī lya būtemi, nī Shiseeng'wa shipanga na a Banamhala. Ī lisaabu lyabo baalī būhī na būhī, makūmi ga mashihūmbī, nghangala mashihūmbī makūmi!

¹² Bahamukaga n'ilaka itaale balīhaya gīkī, “Ū Ng'wana wa Ngholo ūyo walī wasīnzwa igeleelilwe kwanukūla būdūla na būsabi na masala, na nguzu. Hangī igeleelilwe ikūjo na kūgongoolwa, na kūkumīlījiwa!”

¹³ Hama pyī ī shiseeng'wa īsho shilī ng'wigūlū na mu sī, nū mu gatī ya sī, nī sha mu nyanza: pye gete ī shose īsho shilī musho nūshiigwa shilīhaya gīkī, “Ū kūlī we ūyo igashije h'Isumbī lya būtemi, nū kūlī Ng'wana wa Ngholo, shiigeleelilwe kūbiza ho būkumīlīja, n'ikūjo, na būgongooji, na būdūla; kūshisha welelo na welelo!”

¹⁴ Nasho ī Shiseeng'wa shipanga ī shinè shūhelelekeja shilīhaya, “Alichene.” A Banamhala abo makūmi abīlī na banè būgwa ha sī būnamya.