Kukundulwa 21 - Sukuma New Testament 2000

Igūlū ipya na sī mhya

¹ Hūna nūbona igūlū ipya na sī mhya; nguno ī ligūlū lya kwandya nī sī ī ya kwandya shalī shamala kūbīta, nī nyanza yalī ītīho hangī.

² Nū nzengo ng'wela ū gwa Yelusalemu mhya nūgūbona gūlika kūfuma ng'wigūlū kūlī Mulungu, gūbeegelejiwe gītī ntoolwa wigolanyaga kūlwa nguno ya ngoshi wakwe.

³ Niigwa ilaka itaale kūfuma a h'Isumbī lya būtemi līlīhaya gīkī, “Managa gīkī, ū wikalo bo ng'wa Mulungu būlī hamò na banhū, akwikala hamò nabo, babize banhū bakwe; nū wei ng'wenekīlī ū Mulungu akūbiza hamò nabo, abize Mulungu wabo.

⁴ Akūshipyagūla ī shisoji shīnge pyī ū mu miso gabo, na kūtalabiza ho kūcha hangī, nūūlū būpīna, nūūlū nghūngū; pye nūūlū kūluha kūtalabiza ho, nguno ī ya kwandya īkūbiza yamalaga kūbīta.”

⁵ Hūna ūyo walī igashije a h'Isumbī lya būtemi ūhaya gīkī, “Managa gīkī, būlī shikolo nalīshīta shibize shipya!” Hangī ūhaya, “Andīkaga gīkī, ‘Ī mihayo yenīyī īlī ya kūsanyiwa, na ya nghana.’ ”

⁶ Hama hangī ūniwīla, “Yashila! Ū nene nalī Alufa na Omega, Wandījo na Būkalīkījo; ūyo akolilwe notà nakūng'winha ang'we dalali kūfuma mu lwinzī lo minzī mapanga.

⁷ Ū wa kūpyena akūbiza ng'wingīji wayo ī yenīyī, hama ū nene nakūbiza Mulungu wakwe, nū wei akūbiza ng'wana wane.

⁸ Alīyo a booba na a bagomi, na a basoso, na a babūlagi, na a bajingi, na a balogi, na a balamya ba shiikolile; pye na a balomolomo, a bene ū ngabo gwabo gūlī mu nyanza ya kūbaka moto na būgota bo shibiliti, hū kūcha kwa kabīlī.”

Yelusalemu mhya

⁹ Hama wiza ūmò wa bamalaika mpungatī abo baalī na nzweso jokalile sha kūluhya-luhya mpungatī. Aho washika ūniyombya; ūniwīla gīkī, “Nzūgū nakoolekeje ū Ntoolwa, ū nke wa Ng'wana wa Ngholo.”

¹⁰ Hūna ūnibūūcha mu mbika ya shiimoyo, ūnitwala kū lūgūlū lūtaale hangī lūlīhu, ūnoolekeja ū nzengo ng'wela ū gwa Yelusalemu, nūgūbona gūlika kūfuma ng'wigūlū kūlī Mulungu.

¹¹ Gwalī n'ikūjo lya ng'wa Mulungu, ū būlabagīzu wago walī gītī w'iwe lya mpango ntaale, gītī iwe lya yaspi, gītī būpe w'ilole.

¹² Gwalī gūpīndīlījiwe ndugu nhaale hangī ndīhu no; hama gwalī na mibita ikūmi n'ībīlī na bamalaika ikūmi na babīlī baalīho a ha mibita yenīyo, na a mina ga ng'anda ikūmi n'ibīlī ja Baisilaeli gaalī gandīkilwe ho.

¹³ Ū kū lwandī lo kīya yalīko mibita īdatū, nū lo sukuma mibita īdatū, nū lo dakama mibita īdatū, nū lo ng'weli mibita īdatū.

¹⁴ Ī ndugu ya nzengo yalī na misingi ikūmi n'ībīlī; na a mina ga batūng'wa ikūmi na babīlī ba Ng'wana wa Ngholo gaalī gandīkilwe ho.

¹⁵ Ūyo waniwīlaga walī n'idete lya zahabu lya kūpimīla, agūpime ū nzengo nī mibita yago, nī ndugu yago.

¹⁶ Ī mhandī ja nzengo būnè wajo jalī jilenganīlile, ū būlīhu bolī būlenganīlile nū būgalī-galī; aho wagūpima nī lidete lyenīlo gūbiza na būlīhu gītī kilomita 2,400, pyī nū būgalī-galī, nū būgūngūhu ū kūja ū ng'wigūlya.

¹⁷ Aho wīpima ī ndugu ū būgīnu wayo būbiza gītī magūlū makūmi atandatū na atandatū, ū kūlenganīla nī shipimo sha banhū, īsho watūmamīlaga ū malaika ng'wenūyo.

¹⁸ Ī ndugu yenekīlī yalī īzengilwe na yaspi, alīyo ū nzengo, ū gwene gwalī gwa zahabu yawiza ndabagīzu gītī ilole.

¹⁹ Pye ī misingi ya ndugu yalī ītūūlīlilwe būlenji bo mawe ga mpango ntaale, ū nsingi go kwandya yalī yaspi, ū go kabīlī safilo, ū go kadatū kalikedoni, ū go kanè sumaladi.

²⁰ Ū go katanò salidoniko, ū go katandatū salidioni, ū go mpungatī kilisolito, ū go kanaane belilo, ū go kenda topazio, ū gw'ikūmi kilisopulaso, ū gw'ikūmi na gūmò yakonto, ū gw'ikūmi n'ibīlī ametisto.

²¹ Ī mibita īy'ikūmi n'ībīlī yenīyo jalī luulu ikūmi n'ibīlī; būlī mita luulu īmò, hama ī libbalabbala lya mu nzengo lyalī lya zahabu yawiza ya kūng'weka-ng'weka gītī ilole.

²² Natabonile mo hekalu, nguno ū Seeba Mulungu wa būdūla bose, nū Ng'wana wa Ngholo hū ng'wene alī hekalu yamo.

²³ Na hangī ū nzengo gwenūyo gūtī na nguno ya būpe bo līīmi nūūlū bo ng'weji, nguno ī likūjo lya ng'wa Mulungu hū lyene īlo līkagwakīīlaga, hama ū Ng'wana wa Ngholo hū ng'wene ūyo alī talà yamo.

²⁴ A mahanga gakūbiza ga kūshimīzīla ng'wisana lyago; na a batemi ba mu sī bakwenha mo ī likūjo lyabo.

²⁵ Ī mibita ya nzengo gwenūyo ītīko kūlugalwa na hado yaya pyī ī shikū, nīyo būtīho būjikū.

²⁶ Hama ikūjo lya mahanga na būkumīlīja shikwenhwa mo.

²⁷ Būlī shikolo sha malofu shitingīla mo na hado yaya, na a babo bakīītaga ya būsoso, pye na a balomolomo. Bakwingīla mo dūhū abo bandīkilwe mu shitabo sha būpanga ī sha Ng'wana wa Ngholo.