Kukundulwa 11 - Sukuma New Testament 2000

Bakaanīji babīlī

¹ Ha numa ninhwa idete lya kūpimīla, lya kūbiza gītī nangha; nūwīlwa gīkī, “Būūkaga wīpime ī hekalu ya ng'wa Mulungu nū ng'walīlo; na a balamya baamo ūbabale.

² Alīyo ī gwalugwa ya hanze īlekage ūtizīpima, nguno ī yene binhilwe banhū ba mahanga; bakūgūtobanga ū nzengo ng'wela ikanza lya myeji makūmi anè n'ībīlī.

³ Bakaanīji bane babīlī nakūbinha būdūla bahange ikanza lya shikū shihūmbī na magana abīlī na makūmi atandatū, kūnū bazwalile shizwalo sha magūnīla.”

⁴ A benaba hū yene ī mizeituni īy'ībīlī; h'a makīndīkīlo ga talà ay'abīlī, abo bakīmīīlaga kū būtongi bo ng'wa Seeba, ū ng'wenekīlī sī.

⁵ Ūlū munhū ūkooba kūbīītīla yabūbi, gūkafumaga moto ū mu milomo yabo gwabakenaagūla a banishi babo; h'ūmo shiigelile achīle ū wa kūgaagaana kūbīītīla yabūbi.

⁶ A boi balī na būdūla bo kūlīlugala ī ligūlū ītizūtūla mbula ū mu shikū ja būhangi wabo. Na balī na būdūla bo kūgagalūcha a minzī gabize mininga; na badūgije kwītūla ī sī na mahūūya ga būlī mbika nghangala jose-jose, gīt'ūmo būtogelwa.

⁷ Hama ūlū būmala kūfunya ū būhangi wabo, īkūgulumūka shiinū kūfuma ng'wishimayenze, yize kwilwisha būlūgū nabo; īkūbapyena ībabūlage.

⁸ Ī mibīlī yabo īkūlambalala hanze ng'wibbalabbala lya nzengo ntaale, ūyo gūkahayiagwa Sodoma na Misili, ū mu kitanīle ka kūfuba; h'ūko akakomelwa nū Seeba wabo.

⁹ Banhū ba ng'anda jose na ndīmi jose na mahanga gose bakwīyiloleela ī mibimba yabo ikanza lya shikū idatū na nusu; nīyo batūzunya gīkī ījīkwe mu shigila ī mibimba yenīyo.

¹⁰ A bikaji ba mu sī bakūyega na kayegele kataale kūlwa nguno yabo a bahangi benabo, bakūyinongha kūlwa kwihoja boi benekīlī na benekīlī, nguno a bahangi benabo baalī babaluhya no a bikaji ba mu sī.

¹¹ Alīyo aho jabīta shikū idatū na nusu, moyo gwa būpanga kūfuma kūlī Mulungu gūkabingīla, būbūūka bīmīīla na magūlū gabo! Abo bakabona bakagwīlwa booba būtaale no.

¹² Hūna a bahangi benabo bigwa ilaka itaale kūfuma ng'wigūlū līlībawīla gīkī, “Linhagi ng'wize kūūnū!” Būsolwa ilunde būlinha kūja ng'wigūlū, kūnū a banishi babo biloleelile.

¹³ Ī likanza lyenīlo yilonga nyahīnga nhaale; īmò ya ng'wikūmi ya nzengo yūkenaagūka, banhū shihūmbī mpungatī būyagala ū mu nyahīnga yenīyo; abo bakasaaga ho bakogoha na kogohele kataale no, būng'winha ikūjo ū Mulungu wa ng'wigūlū.

¹⁴ Būbiza bobīta nū būluhiwa bo kabīlī; alīyo managi gīkī ū būluhiwa bo kadatū būliza wangū.

Ipembe lya mpungatī

¹⁵ Nū malaika wa mpungatī ūlīng'ang'aaja ī lipembe lyakwe; gūhamuka malaka mataale kūfuma ng'wigūlū galīhaya gīkī, “Ū būtemi bo mu sī bobizaga bo ng'wa Seeba wise na Kilisto wakwe, akūsuga shikū ja welelo na welelo.”

¹⁶ Hūna a Banamhala abo makūmi abīlī na banè, abo baalī bigashije ha masumbī gabo g'ikūjo kū būtongi bo ng'wa Mulungu, būgwa bachimīgije kūnū balīnamya Mulungu

¹⁷ balīhaya gīkī, “Tūlīkūkumīlīja Seeba, bebe ūyo ūlī Mulungu wa būdūla bose, ūyo ūlīho, na walīho kūfuma kale. Nguno wabūsolaga ū būdūla wako ū būtaale, hūna ī haha ūlī Nsugi.

¹⁸ A mahanga gaalī gapelanile, na lūūlū nangho lyashikaga ī likanza lya būpelanu wako, nī lya kūlamulwa kwa bafu, na kūbinha mheela a batūmami bako, a bahangi na a beela, na a bangī pye a bose, abo balīkūgije ī lina lyako, bado na bataale; na kūbakenaagūla a bakenaagūji ba sī!”

¹⁹ Hūna yūlugūlwa ī hekalu ya ng'wa Mulungu ū ng'wigūlū, lyūbonekana isandīko lya būlagane bokwe, īlo līlī mu hekalu yakwe; jūbiza ho ndabi na mihilimo na kūpalalūka, na nyahīnga na mbula nhaale ya mawe!