Filimoni 1 - Sukuma New Testament 2000

Kūgīsha

¹ Nene Paulo ntungwa kūlwa ng'wa Kilisto Yesu, na ndūgū Timoteo. Kūlī ntūmami ng'wichiswi ntogwa Filimoni,

² n'ilūmbū lise Afia, hamò na nshilikale ng'wichiswi Alikipo; nī kanisa īyo īkibilingaga mu kaya yako.

³ Shigongo na mhola shibize hamò ning'we kūfuma kūlī Mulungu Sīswe, na kūlī Seeba wise Yesu Kilisto.

Būtogwa na kūzunya kwa ng'wa Filimoni.

⁴ Nakūnūmbaga ū Mulungu wane, būl'ikanza ūlū nalīkūhaya ū mu kūlomba kwane.

⁵ Nguno nakūjiigwaga ī nghūlū ja kūzunya kwako, nū būtogwa wako ūmo ūntogelilwe ū Seeba Yesu, na a beela pye a bose.

⁶ Na lūūlū nalīkūlomba ū būzunya wako ūbūtūmamīle mu būsangī, hūna ūkwīdeeba mu nghana pyī ī yawiza īyo īlī yise mulī Kilisto.

⁷ Naayegile no, hangī naalūngūjiwe no ndūgū wane, kūlwa būtogwa wako; nguno ojizalabanije ī ngholó ja beela.

Paulo kūnombela Onesimo

⁸ Hūna lūūlū, nūūlū īkī ū mulī Kilisto nalī nabo ū būgimu bo kūkūlagīla īyo yigelile wīyīte,

⁹ alīyo īlī yawiza nakūlombe, kūlwa nguno ya būtogwa. Ū nene Paulo na būnamhala bone gīkī, ūyo ī haha nalī ntungwa kūlwa ng'wa Kilisto Yesu.

¹⁰ Nalīkūlomba kūlwa nguno ya ng'wa Onesimo, ū ng'wana wane mulī Kilisto; ūyo naamyalile mu būtungwa bone.

¹¹ Na nghana walī atī na solobo ū kūlī bebe ī kwandya; alīyo ī haha alī na solobo ū kūlī bebe nū kūlī nene.

¹² Ū munhū ng'wenūyo nūūlū īkī nalīkūshokeja; alīyo ī chene ū wei alī būpanga bone gete.

¹³ Nīyo naalī natogilwe kwikala nanghwe nene, ayūnigunaana ha ng'wanya gwako ū mu nīmo gwa Nghūlū Jawiza, aho nataalī natungilwe.

¹⁴ Kwike naabonile ītī chiza nīīte mhayo gose-gose aho nataalī kūgamana a maganiko gako; ūtizīīta mhayo gwawiza mu būhadīkījiwa, alīyo wīte mu kwifunya.

¹⁵ Nguno hamo h'ī chene akakwīngīla ng'wikanza iguhī, gīkī abize wako shikū jose ja welelo na welelo;

¹⁶ alīyo ītī mu būsese. Ī haha akīlile a ha būsese; ū kūlī nene alī ndūgū ntogwa, lelo ū kūlī bebe na kūtinda ho: ū mu mīlī nū mulī Seeba!

¹⁷ Hūna lūūlū, ūlū ūlīnisanya gīkī nalī ntūmami ng'wiyo, ng'wanukūlage gītī ūlīnanukūla nene.

¹⁸ Hama nūūlū wakūhūba mhayo gose-gose, nūūlū hamo alī na būgasa kūlī bebe, būbalīlage kūlī nene.

¹⁹ Nene Paulo nandīka na nkono gwane ng'wenekīlī gīkī nakūlīpa, natī na nguno ya kūhaya gīkī ū bebe hū ūlī na būgasa ū kūlī nene.

²⁰ Alichene ndūgū wane, nigunaanage mu gīko ū mulī Seeba, ūbūyeje mulī Kilisto ū būpanga bone.

²¹ Nalīkwandīkīla mu kūsanya gīkī ūkwīta na kūtinda ūmo nalīkūwīlīla, nguno nabūmanile ū wigwi boko.

²² Hama nīyo nalisagīlwa nakūshoshiwa kū bing'we kūlwa kūlomba kwing'we; ali lūūlū, nilonja-longejage na ha kūshikīla.

Kūgīsha kwa kūmalīja

²³ Ū Epafula ū ntungwa ng'wichane mulī Kilisto Yesu alīkūgīsha,

²⁴ na a batūmami bichane a ba Maliko nū Alistako nū Dema, hamò nū Luka, nabo balīkūgīsha.

²⁵ Shigongo sha ng'wa Seeba Yesu Kilisto shibize hamò na moyo gwako: Alichene.