Bakolose 3 - Sukuma New Testament 2000

¹ Hūna lūūlū ūlū ng'wamala kūjūūchiwa hamò na Kilisto, īkoobagi īyo īlī kwigūlya, ūko alī ū Kilisto, igashije kū nkono gwa būlyo go ng'wa Mulungu.

² A maganiko ging'we galogejagi kū mihayo ya kwigūlya, yaya ū kū ya mu sī.

³ Nguno a bing'we muchile, nīyo ū būpanga wing'we būbisilwe mulī Mulungu hamò na Kilisto.

⁴ Ūlū lyūshika ī likanza lya koolechiwa ū Kilisto ūyo alī būpanga wise, na a bing'we hū mukwilonga ū ng'wikūjo hamò nanghwe.

⁵ Ali lūūlū, jibūlagagi ī nhūngwa jing'we ī ja kashimīzīle ka mu sī, gītī: būjingi, būsoso, būhahaalīzu, kwikūmva kwabūbi, kwikūmva sabo, (ūyo gūlī mhayo gwa kūlamya shikolo).

⁶ Nguno ū būpelanu bo ng'wa Mulungu būkabizīīlaga a bashitiigwa kūlwa mihayo yenīyo.

⁷ Na a bing'we h'ūmo ng'washimīzīlaga aho ng'walī mutaalī ū mu mihayo yenīyo.

⁸ Alīyo ī haha īponyagi gete ī mihayo gītī: būpelanu, būkalī, būbi; nū mu milomo ying'we wīnge ū būsondagūji nū būdūkani.

⁹ Yaya ū kwilemba, nguno ng'wanzuulile ū munhū wa kale hamò nī shītīle shakwe,

¹⁰ ng'ūnzwala munhū mpya, ūyo akongejaga kūbeejiwa būpya ū mu witegeleja, ongeje kūbiza mu suso ya Mūmbi wakwe.

¹¹ Ū mu mhayo gwenūyū atīho wa kūbalwa gīkī ūyū Nyunani nūūlū Nyudaya; ūyū asaalilwe nūūlū atasaalilwe, nūūlū gīkī ūyū misa, ūyū muna mahanga, ūyū nsese, ūyū ntungūlwa, alīyo ū Kilisto alī shose mu bose.

¹² Hūna lūūlū a bing'we basolwa, abo mulī beela na batogwa ba ng'wa Mulungu, zwalagi nhūngwa ja kwisaatwa, kwichīla shigongo, widohya, būlyehu na wiyūmīlīja.

¹³ Ng'wiyūmīlīja būlī ng'wene ū kū biye, nīyo ng'wilekeja ūlū alīho munhū alī na mhayo gwa kūnsaayīla ng'wiye, na a bing'we ng'wiyītīla gīt'ūmo wang'wītīla a bing'we ū Seeba.

¹⁴ A higūlya ya yose yenīyo tūūlagi ho būtogwa, nguno ū wene būkūbanīgije pyī ī yose mu būshikanu bose.

¹⁵ Hūna ī mhola ya ng'wa Kilisto īzunīlījagi īsuge ū mu ngholó jing'we, gīt'ūmo kitanīlwe king'we kalī mu mīlī gūmò; na bizagi banhū ba kūlūmba.

¹⁶ Nū mhayo go ng'wa Kilisto gūbize mo ū mu bing'we, nīyo gūmukwīlīle. Mudūle kūyilanga na kwihūgūla bing'we benekīlī na benekīlī mu witegeleja bose: mu Zabuli na mīmbo, na mīmbo ga mu moyo; hamò na kūng'wīmbīla Mulungu na būyegi ū mu ngholó jing'we.

¹⁷ Nīyo būlī gwene ūyo mukūgwītaga, ībize mu kayombele nūūlū mu shītwa; pye yītagi mu lina lya ng'wa Seeba Yesu, kūnū mukūnkumīlījaga Mulungu Sīswe mulī we.

Nhūngwa ījo jibeelelile kūlwa bazunya

¹⁸ A bing'we bakīma ng'widohya ū kū bagoshi bing'we gīt'ūmo shiigelile kūlī Seeba.

¹⁹ Na a bing'we bagosha batogagwi a bake bing'we, nīyo yaya ū kūbakalīhīla.

²⁰ A bing'we baana ng'ūbigwa mu yose a babyaji bing'we, nguno ū mhayo gwenūyū gūlī gwawiza ū kūlī Seeba.

²¹ Na a bing'we bababa yaya ū kūbasaayīcha a baana bing'we batizūgwa ngholó.

²² A bing'we basese ng'ūbigwa mu yose a basīng'we-būgonzo mu mīlī, ītī ng'wikanza īlo balīmubona dūhū, gītī bachooji ba kūyeja banhū, alīyo ng'ogohagi Seeba na ngholó īmò.

²³ Būlī gwene ūyo mulīgwīta gwītagi kūfuma mu gatī ya ngholó, gītī mulīntūmamīla Seeba, yaya ū kūbiza gītī mukūbatūmamīlaga banhū.

²⁴ Managi gīkī mukwanukūla mheela ya wingīji kūfuma kūlī Seeba, nguno mukūntūmamīlaga Seeba Kilisto.

²⁵ Alīyo ūyo akwītaga yabūbi, akwanukūla īyo yigeleelilwe būbi wa nhūmamīle yakwe, būtīho būsolanhyiwa a ha gatī ya banhū.