Bakolose 2 - Sukuma New Testament 2000

¹ Hūna lūūlū, natogilwe mubūmane ūmo būlī ū būdito bo nīmo gwane ūyo nalī nago kūlwa nguno ying'we a bing'we, na a bana Lodikea, pye na a bangī abo bataalī kūnibona būshū bone.

² Nalī na nghūmbū balūngūjiwe ū mu ngholó jabo, hangī babize na būsangī ū mu būtogwa, nū mu būsabi ū bose ūbo balī nabo kūlwa kūbūmana mu nghana ū witegeleja, nū mu kūmana mu būshikanu bose ū Kilisto, ūyo alī mbisīla ya ng'wa Mulungu.

³ Ū mulī ng'wenūyo h'ūmo būbisilwe pyī ū wibīkīja bo masala nū witegeleja.

⁴ Nalīmuwīla ū mhayo gwenūyū nguno natatogilwe ilonge munhū wa kūmulemba-lemba mu kalūngalūngīle ka kūmuduta.

⁵ Nguno nūūlū īkī natī hamò ning'we ū mu mīlī, alīyo ū mu moyo nalī hamò ning'we; nīyo nalī na būyegi ū kūbūbona ū būgaliili bo kalongeje king'we, nū kūhandatīla kwing'we ū mu kūnzunya ū Kilisto.

Wiyabī wa banhū ba ng'wa Seeba

⁶ Hūna lūūlū ūmo mukang'wanukūlīla ū Kilisto Yesu Seeba, shimīzagi mulī we gīko.

⁷ Komagi miji ū mulī we, ng'wizenge na mujaame ū mu kūzunya gīt'ūmo mulangīlilwe; ng'ongeje kūkūla ū mu mhayo gwa kūlūmba.

⁸ Ilanghanagi atizilonga wa kūmujananīja kūlwa malange ga nyasala-sala, na mihayo midūhū ya nyalomolomo, ya kūlondeela nhūngwa ja mu sī na mihayo ya kūlekwa bakūlūgenji, īyo ītī mu kahelele ka ng'wa Kilisto.

⁹ Nguno pyī ū būshikanu bo ng'wa Mulungu būlī mulī we mu suso ya mīlī.

¹⁰ Na a bing'we mushikanyiwe ū mulī we ū ng'wenūyo, ūyo alī Ntwe gwa būsugi na būdūla bose.

¹¹ Na hangī ū mulī we musaalilwe mu būsaalwa ūbo būtī bo kūbeejiwa na makono mu nzīla ya kwīnja ikoba lya mīlī; alīyo musaalilwe būsaalwa bo ng'wa Kilisto.

¹² Ū mu kūbatīījiwa mukajīkwa hamò nanghwe, na hangī kūlwa kūbiza ū mulī we, mujūūchiwe hamò nanghwe kūlwa nguno ya kūbūzunya ū būdūla bo ng'wa Mulungu ūyo akanjūūcha kūfuma mu bafu.

¹³ Na nghana ng'walī bafu kūlwa būkenaagūji, na būtūsaalwa ū mu nhūngwa jing'we ī ja mīlī; alīyo akang'wīta kūbiza bapanga hamò nanghwe, ūmulekeja pyī ū būkenaagūji wing'we.

¹⁴ Wabūjimangūcha ū būbūūlwa wise ūbo walī wandīkilwe mu shilagīlo īsho shalī shitūchaamile; ūbūbūūcha ūwīnja ūūkabūkomeela ha nsalaba.

¹⁵ Mabūsugi na mabūtaale ūgazuuja magaka, ūgagwesa kūja ha nsalaba, akūboolechaga ū būtindi bokwe kū bose, ūgapyenela henaho, ūgaleka galī buyīkī gitendegesaga!

¹⁶ Hūna lūūlū mutizūnzunīlīja ose-ose ūyo akūmulamulaga kūlwa nguno ya shilīwa nūūlū shakūng'wa, nūūlū mihayo ya kūkūja shikū ndebe, nūūlū makanza ga ng'weji mpya, nūūlū sabato.

¹⁷ Ī mihayo yenīyo īlī nengeeji dūhū gwa mihayo īyo īliza; alīyo ū gwa nghana ng'wene Kilisto.

¹⁸ Mutizūnzunīlīja ose-ose ūyo akūmudalahaga, kūnū ūng'wenhela mihayo ya wibembu bo higūlya-gūlya, na ya kūbalamya bamalaika ūmo abonelile wei ng'wenekīlī. Ū ng'wenūyo adooshiwe maganiko ga mīlī gokwe dūhū, lekanagi nanghwe nguno alī dalali; atizūng'wenheleja kūjimīīja mheela ying'we.

¹⁹ Atadimanile nago ū Ntwe, ūyo pyī ū mīlī gūdimanyiwe hamò kūlwa nguno yago, mu nzīla ya nge na matimba; nose gūkūlishiagwa gīkī gūkūle mu kakūlīle ka kūfuma kūlī Mulungu.

Kikalīle kapya mulī Kilisto

²⁰ Ī gīsī ūlū muchile hamò na Kilisto ū kū mihayo ya mu sī, numho mulī na nguno kī hangī ū kūbiza gītī mulī banhū ba mu sī, nose mukwikalaga musugilwe na shilagīlo sha mu sī; gīkī,

²¹ “Ūtizūkuumya, ūtizūloja, ūtizūdima?”

²² Ī yenīyo ūlū yūlinda yūtūmama īkamalaga ū nīmo, nguno ū ng'wihando gwayo gūlī ha malange ga banhū.

²³ Na nghana ī chene ī yoi īkabonekanaga gītī mitengeke, ūlū munhū atogilwe kwihedeka wei ng'wenekīlī mu mbika ndebe ya kalamīje, nūūlū mu wibembu bo higūlya-gūlya, nūūlū mu mhayo gwa kwiluhya mīlī; kwike ī yoi ītī na būdūla bose-bose bo kūhangīja kwikūmva kwa mīlī.