Bahebrania 7 - Sukuma New Testament 2000

Būgabīji bo ng'wa Melikizedeki

¹ Ū Melikizedeki ng'wenūyū walī Ntemi wa Salemu, na Ngabīji wa ng'wa Mulungu ūyo alī higūlya no. Ū munhū ng'wenūyo, akamanhya nū Abulahamu ūnfuuha mbango. Ī likanza lyenīlo, ū Abulahamu wafumaga kwilwisha būlūgū na batemi balebe, abo akabapyena ūbabūlaga.

² A henaho ū Abulahamu nanghwe ūng'winha īmò ya ng'wikūmi ya shikolo shose; ū kūshomelejiwa kwa lina lyenīlo ī “Melikizedeki”, ī soolo ya mhayo, Ntemi wa būtūngīlīja, hama hangī Ntemi wa Salemu, makūlū gaho Ntemi wa Mhola.

³ Atī na ise nūūlū nina, na atafumile mu lūganda lūlebe, hama ī shikū jakwe jitī na wandījo, nū būpanga bokwe būtī na būkalīkījo. Atūūlilwe kūbiza Ngabīji wa welelo bose, gīt'ūmo alī Ng'wana wa ng'wa Mulungu.

⁴ Hūna lūūlū nolagi ūmo alī ū būtaale ū munhū ng'wenūyo, ūyo sīswe Abulahamu akang'winha īmò ya ng'wikūmi ya shisonzwa.

⁵ Alīyo ūmo gahayīlile a malange, a ba lūganda lwa ng'wa Lawī abo bakanukūlaga nīmo gwa būgabīji, h'abo batūūlīlilwe shilagīlo sha kūsola īmò ya ng'wikūmi kūfuma ū kū banhū. Hū kūhaya kūfuma kū badūgū babo, nguno pye bafumile mu būbyīle bo ng'wa Abulahamu.

⁶ Kwike ū Melikizedeki walī atī wa kūfuma mu lūganda lwabo, ūyo akanukūla īmò ya ng'wikūmi kūfuma ū kūlī Abulahamu; nanghwe ūnfuuha mbango ū Abulahamu, munhū ūyo walī wamala kwinhwa mhayo gwa kwisagījiwa.

⁷ Ali lūūlū, ūyo gūmanīkile gūlī gīkī, ū ndo h'ūyo akafuuhagwa mbango na ntaale; ndūhū ī halalī ū mu mhayo gwenūyo.

⁸ Kwike a henaha galīho mapandī abīlī, ū kwipandī ī līmò tūlībona gīkī īy'īmò ya ng'wikūmi īkanukūlagwa na banhū abo bakachaaga. Alīyo ī lipandī ī līngī, ū ng'wanukūji alīkaanīlwa gīkī atī wa kūcha.

⁹ Nose hū kūhaya gīkī, nū Lawī ūyo akasolaga īmò ya ng'wikūmi, nanghwe wamala kwīfunya kūbītīla mulī Abulahamu.

¹⁰ Nguno walī ataalī ū mu mīlī gwa nkūlūgenji wakwe, aho akamanhya nū Melikizedeki.

Būgabīji būpya

¹¹ Ū mu shikū ja būgabīji bo lūganda lwa ng'wa Lawī, a banhū baalī binhwa shilagīlo sha kūbasuga. Hūna lūūlū ū būshikanu ūlū ni bolī būdūgije kwigela mu nzīla ya būgabīji wenūbo, nibūlī hangī būtūūlwe ho būgabīji būngī bo mbika ya ng'wa Melikizedeki, būleke kūhayiwa gīkī bo ng'wa Alooni?

¹² Hū kūhaya ū būgabīji ūlū būgalūchiwa, nī shilagīlo shiigelile kūgalūchiwa.

¹³ Nguno ūyo alīhayiwa ū mu mihayo yenīyī afumile mu lūganda lūngī gete, ūmo atīmo nūūlū ūmò ūyo walī wabīta kwifunya kūbiza ntūmami wa ha ng'walīlo.

¹⁴ Īlī hape gīkī ū Seeba wise afumile mu lūganda lwa ng'wa Yuda; alīyo hangī ū Musa h'atahayile mhayo gose-gose gwa bagabīji ba mu lūganda lwenūlo.

¹⁵ Nose ū mhayo gwa kūbiza ho ngabīji ūngī wa mbika ya ng'wa Melikizedeki, gūlongeja kūyoolecha hape īyo tūlīyīhaya.

¹⁶ Īkī ū ng'wene atīho kūlwa kūshikīlīja malange ga shilagīlo sha mu mīlī, alīyo mu būdūla bo būpanga ūbo būtī bo kūkenaagūka.

¹⁷ Nguno gūhayiwe hape gīkī, “Ū bebe ūlī Ngabīji wa welelo bose, mu mbika ya būgabīji bo ng'wa Melikizedeki.”

¹⁸ Hūna lūūlū ī shilagīlo īsho shalī shatonga ū kūbiza ho, shikīnjiwa kūlwa nguno ya būgokolo na būgaya solobo washo.

¹⁹ Nguno shitenhile būshikanu bose-bose. Alīyo ī haha tūdūgije kūng'wegeela ū Mulungu kūlwa kwisagījiwa kwawiza ūko kwenhilwe.

²⁰ Hama hangī nīyo shitalekile kūbiza ho shilahīlo, alīyo a bangī abo, a bene binhagwa dūhū ū būgabīji; baalī batalahīlīlagwa.

²¹ Lelo ū ng'wene mu kūfunyiwa shilahīlo, kwīngīīla kūlī we ūyo akang'wīla gīkī, “Ū Seeba wamala kūlahīla, atīko kūgalūcha maganiko hangī, ‘Ū bebe ūlī Ngabīji wa welelo bose.’ ”

²² Ū mhayo gwenūyū gūlīng'wīta ū Yesu kūbiza nghīngī y'ilagane lyawiza kūtinda.

²³ A bagabīji a bangī abo baalī bingī, nguno ī licha lyabahangījaga ū kūshinga ho a ha nīmo.

²⁴ Alīyo ū ng'wene, ū būgabīji bokwe būtī bo kwilekela-lekela, nguno ū wei alī wa kūshinga ho welelo bose.

²⁵ H'ī nguno yene adūgije kūbapīja gete abo bakwizaga kūlī Mulungu mu nzīla yakwe, nguno alī mpanga welelo bose, gīkī abize Nombeji wabo.

²⁶ Na nghana ībeelelile tūbize na Ngabīji Ntaale wa mbika yenīyo, Ng'wela na Ntūngīlīja; ūyo atī na shilingo nūūlū shibi gīt'ūmo balī banhū bangī, nīyo alī higūlya kūtinda pye a mapandī g'igūlū.

²⁷ Ū wei atī gīt'ūmo balī a bagabīji bataale a bangī abo; atagongile kūfunya shitambo būlī lūshikū kūlwa nguno ya shibi shakwe ng'wenekīlī tame, hūna nī sha banhū; ū wei wamala kwifunya ng'wenekīlī kamò dūhū.

²⁸ Nguno ī shilagīlo shikatūūlaga ha nīmo gwa būgabīji būtaale banhū abo balī na būgehelwa, alīyo ū mhayo gwa shilahīlo, ūyo gūkiza ha numa ya shilagīlo, ū gwene gūkantūūla Ng'wana a ha nīmo, ūyo alī nshikanu pyī ī shikū welelo na welelo.