Bahebrania 6 - Sukuma New Testament 2000

¹ Nose hū kūhaya twīngagi ū mu malange a ga kwandīja ū mu mhayo go ng'wa Kilisto, tūsegejagi twingīle mu mihayo ya nyataale; yaya ū kwikala twishokeela kwilanga mihayo h'iyene dūhū, gītī ya kūgalūka kwīnga mu nhūngwa jichile, na ya kūnsanya Mulungu;

² nūūlū malange ga mihayo ya būbatīījiwa na ya būtūūlīlwa bo makono, nūūlū ya kūjūūka kwa bafu na nsango gwa welelo na welelo.

³ Na nghana ī yenīyo nayo tūkwīyīta ū Mulungu ūlū ūtūzunīlīja.

⁴ Kwike abo bamala kūtiimīlwa, būshiloja nī shakwinhwa sha kūfuma ng'wigūlū, būbiza na būsangī nanghwe nū Moyo Ng'wela;

⁵ būbūloja nū wiza bo mhayo go ng'wa Mulungu, pyī nī nguzu ja ng'wikanza īlo līliza;

⁶ a benabo ūlū būlinda būtala, ītadūlīkanile ū kūbashosha būpya hangī gīkī bagalūke, nguno bakongejaga kūnkoma hangī boi benekīlī ū Ng'wana wa ng'wa Mulungu, na kūndimya minala bo hape-hape!

⁷ H'ūmo īlī nūūlū ī sī, nayo ūlū īkūtūlagwa mbula gwa-gwa-gwa yang'wa minzī, īkūbagunaana a balīmi bayo ūlū yūzwisha īsho shikalīmagwa; ū mu gīko īkwanukūla mbango kūfuma kūlī Mulungu.

⁸ Alīyo ūlū yūbiza ya kūyūzwisha minghwa na kūponeka mo shokolo dūhū, īkūdalahwa; nīyo īkūbiza īlī hihī na kūgwa ng'wizumo; ī nghalīlo yaho īkūpemva nose!

⁹ Kwike nahene badūgū nūūlū īkī tūlīhaya gīko, tūlī na kūsanya gīkī a bing'we ī mihayo ying'we īlī yawiza, īlīmo ū mu būpīji.

¹⁰ Hūna lūūlū īkī ū Mulungu ntūngīlīja, atūdūla ū kwība ūmo shilī ī shītwa shing'we nū būtogwa wing'we ūbo mukoolechaga kūlwa lina lyakwe ū mu kūbagunaana a beela.

¹¹ Alīyo ī nghūmbū jise jilī gīkī, būlī ng'wene ū mu bing'we ooleche būkomeezu wa mbika yenīyo mu kwisagīlwa kūshikanile, kūshisha kū nghalīkījo.

¹² Yaya ū kwinogolelwa, alīyo bizagi balondeeji babo abo bakwingīlaga ū mu wisagījiwa mu nzīla ya kūzunya na kwiyūmīlīja.

Wisagīja bo ng'wa Mulungu būtūleba ho

¹³ Ū Mulungu aho wang'wisagījaga ū Abulahamu walī atīho ntaale ūngī kūtinda we, wa kwitonga mu lina lyakwe; na lūūlū akitonga mu lina lyakwe wei ng'wenekīlī.

¹⁴ Akahaya gīkī, “Nakūkūfuuha nghana, nū būbyīle wako nakūbū kwīja.”

¹⁵ Ali lūūlū ū Abulahamu īkī walī ng'wiyūmīlīja, akapandīka īsho walī wisagījiwa.

¹⁶ A banhū bakitongaga mu lina lya ntaale kūtinda boi; hūna nūūlū būlīho wihalalīja būkūshila, ūlū shūlinda shūtūūlwa ho shilahīlo.

¹⁷ Na lūūlū ū Mulungu akatūūla ho shilahīlo, nguno walī atogilwe no-no-no kūbamanīkīja a bingīji ba mu wisagījiwa, gīkī ū mhayo gwakwe ūyo wamala kūgūhela gūtī gwa magalū-galū.

¹⁸ Hūna ū mu mihayo īy'ībīlī yenīyo īyo ītī ya kūgalūka, īyo Mulungu atūdūla kwīhaya mu būlomolomo, a bise tūkūlūngūjiagwa no-no-no; a bise abo tūkūpeelaga kūja kū būtongi kūjūwanukūla ū wisagījiwa ūbo būtūūlilwe ko.

¹⁹ Ū wisagījiwa wenūbo hū yene ī nghīngī ya kūzunya kwise, mhayo ūyo gūkūtwinhaga mhola na nguzu ja kwingīla mo ū mu gatī, ū kū mpīndo y'isenge.

²⁰ H'ūko watonga kwingīla ū ntongeeji wise ū Yesu; alī kwenūko kūlwa nguno yise gīkī abize Ngabīji Ntaale wa shikū jose ja welelo na welelo, mu mbika ya būgabīji bo ng'wa Melikizedeki.