Bahebrania 3 - Sukuma New Testament 2000

Yesu na Musa

¹ Hūna lūūlū badūgū beela, abo mulī na būsangī ū mu kwitanwa kwa ng'wigūlū, ng'wideedenghanyagi ū Ntūng'wa na Ngabīji Ntaale ng'wenūyo; ū Yesu ūyo tūkūnkaanīlaga.

² Ū wei walī ng'wishigwa ū kūlī Mulungu ūyo ansolile, gīt'ūmo walī nū Musa ū mu kaya ya ng'wa Mulungu.

³ Kwike ū Yesu abalilwe kūbiza n'ikūjo kūtinda Musa; gīt'ūmo meeja wa kaya shiigelile akūjiwe kūtinda ī kaya yenekīlī.

⁴ Nguno būlī kaya īkabeejiagwa na munhū nebe, alīyo ū meeja wa shose ng'wene Mulungu.

⁵ Hūna lūūlū ū Musa walī nsanyiwa mu mihayo yose ū mu kaya ya ng'wa Mulungu, gītī ntūmami kūlwa būkaanīji bo mihayo īyo yalī yigelile kūhayiwa kū shikū ja kū būtongi.

⁶ Alīyo ū Kilisto ū ng'wene Ng'wana, nsugi wayo gete ī kaya ya ng'wa Mulungu; a bise hū tūlī ba mu kaya yenīyo, ūlū tūbūhandatīla kūshisha kū ngelelo ū būshisha-ngholó, nū wisagījiwa ūbo tūkūbūyegelaga.

Kwifuula kwa banhū ba ng'wa Mulungu

⁷ Nose h'ī nguno yene ū Moyo Ng'wela alīhaya gīkī, “Ī lelo ūlū muliigwe ilaka lyakwe,

⁸ yaya ū kūganghanaja ī ngholó jing'we; gīt'ūmo ng'wītīlaga mu būshitiigwa wing'we, aho ng'walī kū matogolo ng'wikanza lya kūnigema.

⁹ Aho banigemaga a bakūlūgenji bing'we gīkī banibone; nghana bakashibona ī shītwa shane, kūshisha ikanza lya myaka makūmi anè.

¹⁰ H'ī nguno yene nakashipelanīla ī shibyalīlwe shenīsho; nūhaya gīkī, ‘A benaba balī babūbi gwa ū mu ngholó jabo, nī nzīla jane batajimanile!’

¹¹ Nose nakilahīla kūlwa būpelanu bone gīkī, ‘Batīko kwingīla ū mu kwifuula kwane!’ ”

¹² Ali lūūlū badūgū, ilanghanagi atizilonga nūūlū ūmò wing'we ūyo alī na ngholó yabūbi, ya būtūzunya, nose īnge ū kūlī Mulungu mpanga.

¹³ Ng'wihūgūla būlī lūshikū ūlo lūkūhayiagwa gīkī lelo; atizilonga nūūlū ūmò wing'we wa kūgūna kūlwa shibi.

¹⁴ Nguno tūkūbiza tūlī na būsangī ū mulī Kilisto ūlū tūdimana nako ū kūzunya kwise ū kwa ha wandījo kūshisha kū ngelelo.

¹⁵ H'ūmo gūhayīlile ū mhayo gīkī, “Ī lelo ūlū muliigwe ilaka lyakwe, yaya ū kūganghanaja ī ngholó jing'we, gīt'ūmo ng'wītīlaga mu būshitiigwa wing'we.”

¹⁶ Ī gīsī abo bakigwa alīyo hū būbiza bashitiigwa baalī banani, ūlū batī pye abo bakafuma Misili ha sīlīlī ya būtongeeji bo ng'wa Musa?

¹⁷ Al'abo bakampelanya ikanza lya myaka makūmi anè baalī banani, ūlū bat'abo bakabiza bakenaagūji, abo mibimba yabo īkagwīla kū matogolo?

¹⁸ Al'abo akabilahīlīla gīkī batīko kwingīla mu kwifuula kwakwe baalī banani, ūlū batī abo baalī bashitiigwa?

¹⁹ Hūna lūūlū, tūlībona gīkī a benabo bakalemeelwa ū kwingīla kūlwa nguno ya būtūzunya!