Bahebrania 2 - Sukuma New Testament 2000

Shiigelile kwilanghana

¹ Hūna lūūlū, a bise shitwigelile kwīdīlīla na būkalalwa būtaale ī mihayo īyo twayigwile, tūtizūselemiwa tūkīleka.

² Nguno ūlū gwalī na nguzu ū mhayo ūyo gūkahayiwa mu nzīla ya bamalaika, na būlī būbi nūūlū būshitiigwa wanukūlaga mheela mu būtūngīlīja;

³ hū kūhaya a bise tūkūpīla ginehe, ūlū tūleka kūbūdīlīla būpīji būtaale gītī wenūbū? Ū boi būkandya būsomboolwa na Seeba ng'wenekīlī, hama ū kū bise būkaanīlwa na a babo bakang'wigwa.

⁴ Ū kūnū ū Mulungu nanghwe akūjaga oolecha būkaanīji bokwe mu kwīta shimanīkījo na mihayo mingī ya kūkumya na ya būdūla, na kūntūma Moyo Ng'wela mu kagabanhīje ka mbika ningī, gīt'ūmo atogelilwe we ng'wenekīlī.

Ng'wenhi wa būpīji

⁵ Nguno ī sī īyo tūkwīhayaga gīkī īkūbiza ho, atītūūlile ha sīlīlī ya būsugi bo bamalaika.

⁶ Alīyo alīho ūmò akaanīlile ng'wipandī ilebe alīhaya gīkī, “Ū munhū nanghwe alī shikolo kī, nose ūng'wizūkwe? Ū ng'wana wa munhū alī kī, nose ūnole?

⁷ Ūkang'wīta kūbiza ha sīlīlī ya bamalaika ng'wikanza ido, ūnzwalīka ngikili y'ikūjo na būkumīlījiwa.

⁸ Pye ī shikolo ūshitūūla ha sīlīlī ya mhambala jakwe!” Nguno ū Mulungu aho washitūūla pyī ī shikolo ha sīlīlī ya būsugi bokwe, atalekeelile nūūlū shimò gīkī shibize shitī ha sīlīlī yakwe. Kwike ī haha tūtaalī ū kūshibona pyī ī shikolo kūbiza ha sīlīlī yakwe.

⁹ Alīyo tūlībona gīkī, ng'wikanza ido ū Yesu akīītwa kūbiza ha sīlīlī ya bamalaika, hūna ūzwalīkwa ngikili y'ikūjo na būkumīlījiwa; nguno akaluhiwa mu kūcha, ībize gīkī ū mu shigongo sha ng'wa Mulungu, alīloje ī licha kūlwa banhū bose.

¹⁰ Ū wei ūyo shose na shose shilīho kūlwa nguno yakwe na mu nzīla yakwe, gūkanyeja ū gwa kūnshikanya mu nzīla ya kūluhiwa ū Ng'winhi wa būpīji, na Ntongeeji o baana bingī kwingīla ng'wikūjo.

¹¹ Nguno ū wei na a babo bakwejiagwa balī na fumo īmò, h'ī nguno yene atīko kūding'wa minala ū kūbahaya gīkī balī baana ba ng'wawe.

¹² Gīt'ūmo alīhayīla gīkī, “Nakūlīkumūcha ī lina lyako ū kū baana ba ng'wise, nakūkwīmbīla ha gatī y'ibità kūlwa kūkūgongoola.”

¹³ Hama hangī, “Nakūntūūlīla we ū kūsanya kwane;” na hangī gīkī, “Nene nalīho aha hamò na a baana abo Mulungu waninhile.”

¹⁴ Hūna lūūlū īkī a baana balī banhū ba mininga na mīlī, nū ng'wene akabiza na būsangī ū mu yenīyo, gīkī ū mu kūcha kwakwe adūle kūnyagaja ū Shetani, ūyo alī na būdūla bo lūfu.

¹⁵ Abatungūle pye abo mu būlamu wabo bose balī mu būsese kūlwa kogoha icha!

¹⁶ Nguno atasolile nīmo gwa kūgunaana bamalaika, alīyo gwa kūgunaana būbyīle bo ng'wa Abulahamu.

¹⁷ H'ī nguno yene akabiza gīt'ūmo balī a baana ba ng'wawe mu mbika jose, gīkī abize Ngabīji Ntaale wa shigongo, ūyo alī nsanyiwa ū mu mihayo ya ng'wa Mulungu; abize shitambo kūlwa shibi sha banhū.

¹⁸ Ū wei īkī akaluha aho akageng'wa, hū kūhaya adūgije kūbagunaana abo bakūgemagwa.