Bahebrania 12 - Sukuma New Testament 2000

Kwilanga kūfuma kūlī Yesu

¹ Hūna lūūlū īkī tūpīndiwe n'ilunde itaale gīko lya bakaanīji, hū kūhaya tūlekanagi na būlī mhayo gose ūyo gūkūtūdidohyaga, nī shibi īsho shitwitaligīngije. Twiyūmīlīje ū kūpeela ū mu wishiganhīlwa ūbo tūtūūlīlilwe;

² ū kūnū tūnkalalīlile Yesu, ū ng'winhi na nshikanya wa kūzunya kwise, ūyo akiyūmīlīja kūluha ha nsalaba, wīdalaha ī minala kūlwa būyegi ūbo walī atūūlīlilwe; ī haha igashije kū nkono gwa būlyo gw'Isumbī lya būtemi lya ng'wa Mulungu.

³ Ng'wideedenghanyagi ū ng'wenūyo, ūyo akiyūmīlīja mihayo ya būdalahwa būtaale gīko kūfuma kū banhū ba shibi, yaya ū kwinogolelwa nūūlū kūgwa-ngholó.

Mulungu akahūgūlaga baana bakwe

⁴ A bing'we a mininga ging'we gataalī kwidīka kūlwa nguno ya kwilwisha na shibi.

⁵ Hamo mukūgwībaga ū mhayo gwa būganikīji ūbo būkūmuwīlaga gītī mulī baana; gīkī, “Ng'wana wane, ūtizūbūdalaha ū būhūgūji bo ng'wa Seeba, na hangī ūtizūgwa ngholó ūlū ūkūhama.

⁶ Nguno ū Seeba akanghūgūlaga būlī ng'wene ūyo antogilwe; na akantaalaga manasu būlī ng'wene ūyo akang'wisaabaga kūbiza ng'wana wakwe.”

⁷ Hūna lūūlū bizagi biyūmīlīja ū mu būhūgūlwa, nguno īyo akūng'wītīlaga ū Mulungu akūng'wītīlaga īkī mulī baana; angū, alīho ng'wana kī ūyo atahūgūlagwa na ise?

⁸ Alīyo ūlū ng'ūbiza mutīmo ū mu būhūgūlwa ūbo pye a baana basangīlile, numho mutī baana ba mu kaya, mulī baana ba kū mabbaala!

⁹ Hama hangī a higūlya ya yenīyo, aho tūtaalī nabo a basīswe ba mu mīlī tūkabigwaga ūlū balītūhūgūla; angū, ū kwidohya ū kūlī we ūyo alī Sīswe mu myoyo yise gīkī tūpīle, gūtī gwawiza kūtinda?

¹⁰ Na nghana a bene bakatūhūgūlaga ng'wikanza lya shikū ngehu gīt'ūmo babonelile gīkī īlī yawiza, alīyo ū ng'wene akīītaga kūlwa solobo yise, gīkī tūbize na būsangī ū mu wela bokwe.

¹¹ Pye a banhū gūtabayejaga ū mhayo gwa kūhūgūlwa ū ng'wikanza īlo gūlītūmama, nguno gūkaminyaga; alīyo ū kū shikū ja kū būtongi gūkatwajaga matwajo ga mhola na būtūngīlīja, ū mu banhū abo bakilangaga kūfuma mugo.

¹² Hūna lūūlū, gaguzuhyagi a makono a manogoleku, na a mazwi ayo gayogomile.

¹³ Nī nzīla ūmo mhambala jing'we jikūbītaga mujigoloole, ū nemehazu atizūtūnga kūngī, alīyo agunaanwe apīle.

Kūgoyela shigongo sha ng'wa Mulungu

¹⁴ Bizagi na nghūmbū ja kwikala mu mhola nabo pye a banhū; na mushimīzīle mu wela, ūbo munhū atīko kūmona ū Mulungu ūlū atī nabo.

¹⁵ Ilanghanagi gete, atizilonga wa kūleba ū kūshika ū mu shigongo sha ng'wa Mulungu, na lītizilonga ijinji lya būsūngū mulī ose-ose, līkandya kūfuluma; nose līsosohaje banhū bingī.

¹⁶ Atizilonga njingi ose-ose nūūlū nghūnga, gītī Esau, ūyo akaponya būtaale bokwe bo kūbyalwa kwandya, kūlwa nguno ya shilīwa sh'ikanza līmò dūhū.

¹⁷ Nguno mumanile gīkī, ū kū shikū ja kū būtongi akagema ū kūbiza na wingīji ū mu mbango, alīyo ūleng'wa nūūlū īkī akagūkooba na shisoji ū mhayo gwenūyo; atapandīkile gete ū ng'wanya gwa kūgalūka!

¹⁸ Nguno a bing'we mutizile kū lūgūlū ūlo lūdūgije kūkuumiwa, gītī ūlo lwabakaga moto, mutizile kū giiti na būpi, nūūlū kū nyaga ntaale.

¹⁹ Mutizile kwilaka ly'ipembe lya kūdetemya, na mihayo ya magaka gīt'ūmo bakigwīla a bene, bandya kwikūmbīlīja gīkī batizongeja kūwīlwa mhayo gūngī!

²⁰ Nguno bakalemeelwa ū kwiyūmīlīja ū kūgūdegeleka ūyo gwahayiagwa; ī gīkī, “Nūūlū shiinū dūhū ūlū yūlūkuumya ū lūgūlū īkūpondwa mawe!”

²¹ Ūyo gūkabonekana gwenūyo gūkabiza gwa magaka no, kūshisha nose nū Musa ūhaya, “Nogoha, nayūdetema!”

²² A bing'we ng'wizile kū lūgūlū lo Sayuni, kū nzengo go ng'wa Mulungu mpanga, Yelusalemu ya ng'wigūlū; kū būhī na būhī bo bamalaika.

²³ Ng'wizile kwibità, na kanisa ya babyalwa ba kwandya, abo bandīkilwe ng'wigūlū; ng'wizile kūlī Mulungu Namuji wa bose, kū myoyo ya batūngīlīja abo bashikanyiwe.

²⁴ Ng'wizile kūlī Yesu Nsangīja wa Ng'wilagane ipya; kū mininga ayo gakidīka, ayo galī na būsombooji bowiza kūtinda ga ng'wa Abeli.

²⁵ Hūna lūūlū ilanghanagi mutizūnemeela ūyo akūlūngalūngaga; nguno ūlū bakaduuma kūpūlūgūka abo bakaanemeela ūyo wabahūgūlaga mu sī, gūlī mhayo gwa kogohya no ū kū bise ūlū tūndalaha ūyo akūlūngalūngaga nise kūfuma ng'wigūlū;

²⁶ ūyo akītinginya ī sī a makanza gene. Kwike ī haha alīhaya mu kwisagīja gīkī, “Ū lūkangala ū lūngī natūtinginya sī dūhū, alīyo nakūlītinginya nī ligūlū!”

²⁷ Hūna lūūlū ū mhayo ūyū gīkī, “Ū lūkangala ū lūngī,” gūlī na makūlū ga kwīnjiwa ī shikolo īsho shiseemilwe, īsho shidūgije kūtinginyiwa; shisaage dūhū īsho shitūdūla kūtinginyiwa.

²⁸ Ali lūūlū īkī tūlī banukūji ba būtemi būtī bo kūtinginyiwa, tūbizagi na kūlūmba; mhayo ūyo gūkūtūgunaana kūntūmamīla ū Mulungu chiza, mu kwifunya na logohano.

²⁹ Nguno ū Mulungu wise alī moto ūyo gūdūgije kūkenaagūla!