Bahebrania 10 - Sukuma New Testament 2000

¹ Nguno ī shilagīlo shilī nengeeji gwayo dūhū ī mihayo yawiza īyo īkwiza; ī shoi shitī suso yenekīlī ya mihayo yenīyo. Shitūdūla kūbashikanya abo bakegeelaga kwiza kūfunya shitambo sha mbika h'ī yene dūhū gwa-gwa-gwa būlī ng'waka!

² Ī gīsī ūlū ni chene, ī shitambo shenīsho ni shitooyile kale ū kūfunyiwa? Nguno ūlū ni bakeejiagwa mu gīko a balamya, ni batikalaga būshokeja hangī na hangī kūkoyiwa na shibi ū mu ngholó jabo.

³ Alīyo ī shitambo īsho shikafunyiagwa būlī ng'waka shenīsho, shilī na nīmo gwa kūbizūkīja shibi a banhū.

⁴ Nguno a mininga ga nzagamba na a ga mbūli, gatūdūla ū kwīnja ī shibi.

⁵ H'ī chene akiza ū mu sī alīhaya gīkī, “Shitambo na shakwinha, walī ūtī na nghūmbū nasho, alīyo ūkanilonja-longeja mīlī nene.

⁶ Ī shitambo sha kūpemva shitakūyegije, nī shakwinha īsho shikafunyiagwa kūlwa shibi!

⁷ H'ī nguno yene nakahaya gīkī, ‘Lolaga, ū nene nalīho, ū mu shandīkwa handīkilwe kūlwa nguno yane; nizile kwīta īyo ūtogilwe bebe Mulungu.’ ”

⁸ Akandya ūhaya gīkī, “Ī shitambo nī shose īsho shikafunyiagwa walī ūtī na nghūmbū nasho; nī shitambo sha kūpemva, nī shisho shikafunyiagwa kūlwa shibi shitakūyegije;” nūūlū īkī shikafunyiagwa ūmo shihayīlile shilagīlo.

⁹ Hama hangī ūhaya gīkī, “Lolaga, ū nene nizile kwīta īyo wītogilwe”. Hū kūhaya alīlyīnja ī lya kwandya, alīguzuhye ī lya kabīlī.

¹⁰ Hūna lūūlū, tūkwejiagwa kūlwa kahelele kenaka; mu nzīla ya mīlī go ng'wa Yesu Kilisto, ūyo gūkafunyiwa lūkangala lūmò dūhū.

¹¹ Alīyo a bagabīji, būlī ng'wene akīmīīlaga ntondo na ntondo kūlwa kūtūmama na kūfunya shakwinha na shitambo sha mbika h'ī yenīyo dūhū; īsho shitīko kwīnja shibi!

¹² Lelo ū ng'wene aho wamala kūfunya shitambo shimò sha būja na būja kūlwa shibi, akigasha kū nkono gwa būlyo go ng'wa Mulungu.

¹³ Kūfuma ikanza lyenīlo alindīīlile, kūshisha a banishi bakwe bīītwe kūbiza ha kūtūūla mhambala jakwe.

¹⁴ Nguno ū mu kwifunya kamò gīko, akabinha būshikanu wa būja na būja abo bakwejiagwa.

¹⁵ Nū Moyo Ng'wela akūtūkaanīlaga, nguno alandya ūhaya gīkī,

¹⁶ “Īlī hū lyene ī lilagane īlo nakūlagana nabo ūlū jūbīta ī shikū jenījo; alīhaya Seeba. Nakūbatūūlīla shilagīlo shane ū mu ngholó jabo, nū mu maganiko gabo nakūshandīka.”

¹⁷ Na gīkī, “Ī shibi shabo natūshizūkīla hangī na hado yaya, pyī nū būhūbi wabo.”

¹⁸ Nose aho būlīho būlekejiwa ū mu yose īyī, ītīho hangī nguno ya kūfunya shitambo kūlwa shibi.

Būkomelejiwa na būhūgūlwa

¹⁹ Hūna lūūlū badūgū, īkī tūlī na wiyabī kwingīla ū ng'wipandī lyeela no-no-no kūlwa mininga ga ng'wa Yesu,

²⁰ kūbītīla mu nzīla mhya na mhanga, īyo watūbeegegije ya kūbīta ng'wisenge, ūyo gūlī mīlī gwakwe wei ng'wenekīlī,

²¹ nīyo hangī īkī ū mu kaya ya ng'wa Mulungu tūlī na Ngabīji Ntaale gīko,

²² hūna lūūlū, twegeelagi na ngholó ngololoku, hamò na kūzunya kūshikanile. Ī ngholó jise jibize jaseeseebelilwe na kwejiwa, jīnge ū mu maganiko a mabi; nī mibīlī yise ībize yoojiagwa mu minzī meela.

²³ Tūbūdimagi mu būkalalwa ū būkaanīji bo kwisagīlwa kwise, nguno ūyo atwisagīgije ng'wene nsanyiwa.

²⁴ Tūbizagi banhū ba kwiganika mihayo īyo īdūgije kūtūgunaana kūbeeja milīmo yawiza, ya koolecha būtogwa būlī ng'wene kū biye.

²⁵ Yaya ū kūgūleka ū mhayo gwa kwibilinga hamò, ūmo shilī shīmīle sha banhū bamò, alīyo twikomeleja; nīyo ī no-no-no īkī mulībona gīkī lwegeelaga kūshika ū lūshikū lwenūlo!

²⁶ Nguno ūlū tūlinda twīdeeba ī nghana hūna tūshoka hangī kwīta shibi bo makaala, shitīho shitambo shingī īsho shisaagile ho kūlwa nguno ya shibi;

²⁷ ūlū ītī kūlindīīla dūhū nsango gwa kogohya, na moto ūyo gūkūbakenaagūla a banishi.

²⁸ Ose-ose ūyo ūdalaha shilagīlo sha ng'wa Musa atachīlagwa shigongo; ūlū ūkaanīlwa na banhū babīlī nūūlū badatū akabūlagagwa.

²⁹ Al'ū wa kūmpandagīla Ng'wana wa ng'wa Mulungu na kūgadalaha a mininga ayo gakūng'wejaga, na kūnsondagūla ū Moyo wa shigongo, angū, ū ng'wenūyo atigeleelilwe nsango ntaale kūtinda?

³⁰ Nguno tūndeebile ūyo ahayile gīkī, “Ī shiilī yene īlī yane, nakūlīpa nene.” Na gīkī, “Ū Seeba akūbalamula a banhū bakwe.”

³¹ Gūlī mhayo gwa kogohya no ū kūgwa mu makono ga ng'wa Mulungu mpanga!

Lyasaagaga ikanza ido

³² Jizūkagwi ī shikū ja wandījo ūmo ng'waluhīlaga, a makanza gene ng'wandyaga ū kūlyanukūla ī lisana.

³³ Nguno makanza gamò a bing'we benekīlī ng'wasondagūlagwa na kūluhiwa bo hape-hape; makanza gangī ng'wasangīlaga nabo abo bīītīlagwa ī mihayo yenīyo.

³⁴ Nū mu būtungwa ng'wabizaga hamò nabo, ng'walī muzunije nūūlū kūtaajiwa sabo jing'we bo kwiboneelwa. Nīyo ū mhayo gwenūyo ng'walī mugūyegelile, nguno ng'walī mumanile gīkī a bing'we mulī na sabo ya nghana, na ya kūshinga ho.

³⁵ Hūna lūūlū, yaya ū kūbūponya ū būshisha-ngholó wing'we wenūbo, nguno būlī na mheela nhaale no.

³⁶ Shiigelile mubize biyūmīlīja, ng'wīshikīlīje īyo ayītogilwe ū Mulungu, hū mukūpandīka mheela.

³⁷ Nguno lyasaagaga ikanza ido no, hūna ūyo aliza, akwiza; nīyo atūdīlaga.

³⁸ Kwike ū ntūngīlīja wane akūbiza mpanga kūlwa kūzunya; lelo ūlū ūtawa-tawa, ū moyo gwane gūtūnyegela!

³⁹ Alīyo a bise tūtīmo ū ng'wigele lya banhū ba kūtawa-tawa, abo bakūjimīīlaga; tūlī bamò ba babo bakūzunyaga banukūla būpanga.