Bagalatia 5 - Sukuma New Testament 2000

Wiyabī wa bazunya

¹ Ū Kilisto watūtungūla gīkī tūbize mu wiyabī, hū kūhaya īmīīlagi muhandatīle, yaya ū kūshoka kūtungwa ijoki lya būsese hangī!

² Ali lūūlū itegelejagi, ū nene Paulo nalīmuwīla gīkī, ūlū mulayūsaalwa, ū Kilisto akūbiza atī na solobo ū kū bing'we.

³ Hama nīyo hangī nalīnkaanīla būlī munhū ūyo alasaalwe; gīkī, akūbiza alī na būgasa bo kūshishikīlīja pyī ī shilagīlo.

⁴ Na hangī nīyo abo mukūkoobaga kūbalīlwa būtūngīlīja kūlwa shilagīlo, ng'wamalile kūpamīlwa hanze ya ng'wa Kilisto, mutīmo ū mu shigongo.

⁵ Alīyo a bise ū mulī Moyo, tūkūlindīīlile mu kūzunya ū kwisagīlwa kwa kūbalīlwa būtūngīlīja.

⁶ Nguno ū mulī Kilisto Yesu ū mhayo gwa kūsaalwa nūūlū kūleka kūsaalwa gūtī na solobo yose-yose, ū mhayo ū ntaale gūlī gīkī; ū būzunya wiyooleche mu shītwa sha būtogwa.

⁷ Ahene ng'walūjaga nago chiza ū mhayo, alīyo hīmba nani hangī wamulyile matū nose ng'ooyile ū kwīdīlīla ī nghana!

⁸ Ū būlemva-lemva wenūbū būtafumile kūlī ng'witani wing'we.

⁹ Managi gīkī ī shibimbya nūūlū shikabiza shido na ginehe, shikabūdudumyaga pyī ū būsu ūlū shūlubanījiwa mo!

¹⁰ Kwike nalīnsanya Mulungu gīkī mutīko kūgalūcha a maganiko ging'we, na gīkī ūyo akūmuyebenganyaga ng'wenūyo akūgwakūla nsango, h'ūmo abizile.

¹¹ Ī gīsī badūgū, ū nene ūlū nataalī nakūlomeelaga mhayo gwa kūsaalwa, nibūlī nataalī nūluhiwa? Nguno ūlū gūlī chene, numho gūtīho mhayo gwa kūgwipamya ū nsalaba!

¹² Ū nene nalībona ni bichembage boi dūhū abo balīmuyebenganya benabo!

¹³ A bing'we badūgū ng'wamala kwitanwa kwingīla mu wiyabī, kwike yaya ū kūbūtūmamīla ū wiyabī wing'we mu kūyeja mīlī, alīyo ng'wigunaana mu būtogwa.

¹⁴ Nguno pyī ī shilagīlo shikashikīlījiagwa mu mhayo ūyū gīkī, “Ntogagwe nzenganwa ng'wiyo gīt'ūmo witogelilwe bebe ng'wenekīlī.”

¹⁵ Alīyo ūlū ng'wikale mukwigombagūlaga na kwilumagūla bing'we bike, langhanagi mutizimala!

Mīlī na Moyo shiipūganije

¹⁶ Na lūūlū nalīmuwīla gīkī, shimīzīlagi mulī Moyo, hū mukoya ū kwīta ya kwikūmva kwa mīlī.

¹⁷ Nguno ū kwikūmva kwa mīlī gwipūganije nī nhūngwa ja ng'wa Moyo, ī nhūngwa ja ng'wa Moyo najo jipūganije nū kwikūmva kwa mīlī. Ī mihayo būbīlī wayo yenīyī yipūganije no, nose mutūdūla ū kwīta gīt'ūmo mutogelilwe.

¹⁸ Alīyo ūlū ng'ūtongeelwa na Moyo, shitūmusuga ī shilagīlo.

¹⁹ Hūna lūūlū, ī shītīle sha mīlī shimanīkile; shilī mu mihayo gītī: būjingi, būsoso, būmalahya,

²⁰ witongeleja, būlogi, wanishi, būyombo, wilu, būpelanu, wikenya, halalī, wisambaaja,

²¹ ibūba, būng'wi bo shikoji, būlaku; nī yīngī īyo yikolile na yenīyo. Ī mihayo yenīyo nalīmuwīla nghana-nghana gīt'ūmo nakamuwīlīla nī kwandya, gīkī abo bakīītaga mihayo īlī gīko, batingīla ū mu būtemi bo ng'wa Mulungu.

²² Alīyo ī litwajo lya ng'wa Moyo līlī: būtogwa, būyegi, mhola, wiyūmīlīja, wiza-ngholó, būdīlīji, kūzunya,

²³ wilanghani, būlyehu; ū kū mihayo gītī yenīyī shitīho shilagīlo.

²⁴ A ba ng'wa Kilisto Yesu bamala kūshikoma ha nsalaba ī shīmīle sha mīlī, pyī nū būhahaalīzu nū kwikūmva kwago.

²⁵ Hūna lūūlū ūlū tūlī mulī Moyo, nū kūshimīza tūshimīzīlagi mulī Moyo.

²⁶ Tūtadooselagi midūhū, kūnū twiyūbūkīla na kwiyītīla wilu bise benekīlī na benekīlī.