Bagalatia 3 - Sukuma New Testament 2000

Shilagīlo na kūzunya.

¹ Bing'we Bagalatia bachilū-chilū, ī gete nani ūyo wamulogile shi? Tūhaya ahene ū Yesu Kilisto akoolechiwa hape-hape ū kū būtongi wing'we, gīkī wamala kūkong'wa ha nsalaba!

² Natogilwe muniwīle gūyū mhayo gūmò, ū Moyo mukang'wanukūla kūlwa shītwa sha mu shilagīlo, nūūlū kūlwa kūjiigwa ī Nghūlū Jawiza na kūjizunya?

³ Hama nibūlī hangī ng'wachilūhalile gīko? Mukandya chiza mulī Moyo, ī haha mutogilwe kūmalīgīja mu nguzu ja mīlī?

⁴ Gashi ū mu būluhi ū bose ūbo ng'waluhaga, ng'waluhīlaga dalali dūhū? Ūlū nghana mubize ng'waluhīlaga dalali!

⁵ Angū, ū Mulungu ūyo akūng'winhaga Moyo, na akūbeejaga milīmo ya būdūla būtaale mu bing'we, akwītaga gīko īkī mudimile shilagīlo, nūūlū kūlwa kūgwigwa ū mhayo go ng'wa Mulungu na kūgūzunya?

⁶ Ī mihayo yenīyī ījile gīt'ūmo Abulahamu akabalīlwa būtūngīlīja, kūlwa kūnsanya Mulungu.

⁷ Hūna lūūlū, managi gīkī a banhū abo balī mu kūzunya, hū bene a baana ba ng'wa Abulahamu.

⁸ Ī shandīkwa shalī shimanile kwīngīīla kale na kale, gīkī ū Mulungu akūbabalīla būtūngīlīja kūlwa kūzunya a banhū ba mahanga, h'ī chene shikanomeela Nghūlū Jawiza ū Abulahamu gīkī, “Pye a mahanga gakwīlūkīlwa mbango kūfuma mulī bebe.”

⁹ Hū kūhaya a banhū abo balī mu kūzunya, basangīlile ī mbango nanghwe ū Abulahamu, ūyo walī na kūzunya.

¹⁰ Lelo abo basendamīlile shītwa sha mu shilagīlo, a bene pye balī ng'wizumo; nguno gwandīkilwe gīkī, “Azumilwe būlī ng'wene ūyo atūdūla kūshikīlīja kwīyīta pyī īyo yandīkilwe mu shitabo sha shilagīlo.”

¹¹ Īlī hape gīkī atīho munhū ūyo ashikile kūbalīlwa būtūngīlīja ū kūlī Mulungu kūlwa shilagīlo; nguno, “Ū ntūngīlīja akūbiza mpanga kūlwa kūzunya.”

¹² Alīyo ī shilagīlo ī shene shitafumile mu kūzunya, nguno gūhayiwe gīkī, “Ū wa kwīyīta ī yenīyī akūbiza mpanga muyo.”

¹³ Ū Kilisto akabiza izumo kūlwa nguno yise, hūna lūūlū wamala kūtūkomoola a bise, ūtwīnja ū ng'wizumo lya shilagīlo, nguno gwandīkilwe gīkī, “Azumilwe būlī ng'wene ū wa kūnungelejiwa ha līntī.”

¹⁴ Ījile gīko kūlwa gīkī, ū mulī Yesu Kilisto na a banhū ba mahanga bajanukūle ī mbango ja ng'wa Abulahamu, tūkwanukūle mu kūzunya ū kwisagījiwa kwa ng'wa Moyo.

Shilagīlo na kwisagījiwa

¹⁵ Badūgū bane, leki namuwīle shigemenghejo sha banhū; ūlū munhū ūtūūla ilagane atīho ūngī wa kūlīkenaagūla, nūūlū kūlyongeleleja mhayo gūngī.

¹⁶ Hūna lūūlū, ū wisagījiwa ūbo akinhwa ū Abulahamu walī kūlwa nguno yakwe na Myalwa wakwe. Atawīlilwe na “Babyalwa”, gītī bingī. Alīyo kūlwa ng'wa ūmò dūhū: “Na kūlī Myalwa wako,” hū Kilisto.

¹⁷ Ū mhayo ūyo nalīgūhaya gūlī gīkī, ī lilagane līkatonga ū kūtūūlwa nū Mulungu, hūna lūūlū ī shilagīlo īsho shikandya kūtūmama ha numa ya myaka magana anè na makūmi adatū, shitīko kūgūkenaagūla nūūlū kūgwīnja ho ū kwisagījiwa.

¹⁸ Nguno ū wingīji ūlū būlīho kūlwa shilagīlo, būtūdūla kūbiza ho mu nzīla ya kwisagījiwa; alīyo ū Mulungu īkī alī na shigongo, akang'winha wingīji ū Abulahamu mu kūng'wisagīja.

¹⁹ Ī gīsī lūūlū ī shilagīlo shilī na nīmo kī? Ī shoi shikatūūlwa kūlwa nguno ya būhūbi, kūshisha ize ū Myalwa ūyo walī wamala kwisagījiwa. Shikalagīlwa mu nzīla ya bamalaika, shūshikīlījiwa mu nkono gwa nsangīja.

²⁰ Ali lūūlū, atūdūla kūbiza ho nsangīja kūlw'ipandī līmò dūhū, nguno ū Mulungu alī ūmò.

Basese na baana

²¹ Ī gīsī numho lūūlū hū kūhaya ī shilagīlo shiipūganije nū kwisagīja kwa ng'wa Mulungu? Ītūjaga gīko na hado yaya! Nguno ūlū ni shitūūlilwe ho shilagīlo īsho shidūgije kūtwinha būpanga, ū mhayo gwa kūbalīlwa būtūngīlīja mu nzīla ya shilagīlo ni gūlīho.

²² Kwike ī shandīkwa shihayile gīkī, pye a banhū balī ha sīlīlī ya shibi. Ū mu gīko ū kwisagījiwa ūko kūlīho kūlwa kūnzunya Yesu Kilisto, bakwinhagwa bazunya.

²³ Alīyo aho gūtaalī kwiza ū mhayo gwa kūzunya, twalī ha sīlīlī ya shilagīlo, h'īsho shatūlelaga. Twalī tūlugalījiwe hanze yago ū mhayo gwa kūzunya, ūyo yalī gīkī gūloolechiwe.

²⁴ Hūna ī shilagīlo shalī na nīmo gwa kūtūlanga, kūshisha līshike ī likanza lya ng'wa Kilisto, ī lya kūbalīlwa būtūngīlīja kūlwa kūzunya.

²⁵ Ali lūūlū, īkī twashikile ū ng'wikanza lya kūzunya, tūtikala ha sīlīlī ya nangi hangī.

²⁶ Nguno pye a bose mulī baana ba ng'wa Mulungu kūlwa kūnzunya Kilisto Yesu.

²⁷ Īkī pye abo mubatīījiwe mulī Kilisto, munzwalile ū Kilisto.

²⁸ Būtīho būsolanhyiwa a ha gatī ya Nyudaya nū w'ihanga līngī, na a ha gatī ya nsese nū yūyo alī mu wiyabī, nūūlū a ha gatī ya ngosha na nkīma; nguno ū mulī Kilisto Yesu pye a bose mulī būmò.

²⁹ Hū kūhaya ūlū mulī ba ng'wa Kilisto, numho mulī ba būbyīle bo ng'wa Abulahamu, hūna lūūlū mulī bingīji gīt'ūmo kūlī ū kwisagījiwa.