Bagalatia 1 - Sukuma New Testament 2000

Kūgīsha

¹ Nene Paulo ntūng'wa, ūyo būtūng'wa bone būtafumile kū banhū, nūūlū natatūmilwe na munhū. Alīyo natūmilwe na Yesu Kilisto hamò na Mulungu Sīswe, ūyo akanjūūcha ū Yesu kūfuma mu bafu;

² na a badūgū a bose abo balī hamò nane: Kū kanisa ja Galatia.

³ Shigongo na mhola shibize hamò ning'we kūfuma kūlī Mulungu Sīswe, na kūlī Seeba wise Yesu Kilisto;

⁴ ūyo akifunya wei ng'wenekīlī kūlwa nguno ya shibi shise, ūshikīlīja īyo yalī īhelilwe na Mulungu Sīswe, kūlwa kūtūkomoola twīnge ū ng'wikanza lya būbi ī lya shikū īji.

⁵ Ikūjo lībize kūlī Mulungu welelo na welelo: Alichene.

Jitīho Nghūlū Jawiza jingī

⁶ Nalīkumya no ū kūbona gīkī ng'wanekile wangū gīko ūyo akang'witana kūlwa shigongo sha ng'wa Kilisto, ng'ūgalūkīla mbika yīngī ya nghūlū jawiza.

⁷ Kwike ī jenījo jitī Nghūlū Jawiza; alīyo balīho dūhū banhū balebe bandije kūmuyebenganya, nguno batogilwe kūjihūbya ī Nghūlū Jawiza ja ng'wa Kilisto!

⁸ Alīyo nūūlū tūkabiza bise, nūūlū ūbiza malaika wa kūfuma ng'wigūlū wiza kūmulomeela mbika yīngī ya nghūlū jawiza ījo tūtamulomeelile bise, ū ng'wenūyo ni azumagwe!

⁹ Ūmo tūhayīlile kūfuma ha wandījo, nī haha h'ūmo nalīhayīla hangī; gīkī, ose-ose ūyo ūmulomeela mbika yīngī ya nghūlū jawiza kūleka ījo ng'wajanukūla, ni azumagwe!

¹⁰ Ī gīsī ū nene nalīkooba kī, kūkumīlījiwa na banhū, nūūlū na Mulungu? Nūūlū hamo nalīkooba kūyeja banhū? Ūlū ni nataalī nūkooba kūyeja banhū ni natī nsese wa ng'wa Kilisto na hado yaya!

Paulo na nīmo gwa būtūng'wa

¹¹ Leki namuwīle badūgū bane gīkī, ī Nghūlū Jawiza ījo nakamulomeela, jalī jitafumile kūlī munhū.

¹² Natajanukūlile kūfuma kūlī munhū, nūūlū natajipandīkile mu nzīla ya kūlangwa; alīyo mu nzīla ya kūkundūlīlwa na Yesu Kilisto.

¹³ Nguno a bing'we ng'wajiigwaga ī nhūngwa jane ūmo jalī a makanza gene, gīkī aho naalī nataalī nadimile a kazunīje ka Bayudaya, nīluhyaga na kaluhīje kangī nako ī kanisa ya ng'wa Mulungu, hama nīyo nīkenaagūlaga kībi no!

¹⁴ Ū mu kazunīje ka Bayudaya naalī kū būtongi; ū ng'wihanga lya ng'wise naalī nabalebije bingī a b'ilika lyane, nīyo naalī njangīīzu no ū kū malange ga bakūlūgenji bane!

¹⁵ Alīyo ūyo walī anisolile kwīngīīla kale, kūfuma mu nda ya ng'wa mayū, aho gwanyeja gwa kūnitana kūlwa shigongo shakwe,

¹⁶ akanoolekeja ū Ng'wana wakwe; nūmona. Hūna ūnīīta kūbiza wa kūja nakūnkumūchaga mu mahanga. Ī likanza lyenīlo natandije kūja nakūbūgīlīja banhū.

¹⁷ Natajile nūūlū Yelusalemu, ū kū banhū abo baalī binhwa kwandya ū nīmo gwa būtūng'wa aho nataalī ū nene, alīyo nakaja kū sī ya Balabu, hanuma nūshoka hangī Damasko.

¹⁸ Yahayūbīta myaka īdatū hū nūja ī Yelusalemu gīkī nakibone na Kefa; nikala nanghwe ikanza lya shikū ikūmi n'itanò.

¹⁹ Alīyo a batūng'wa a bangī natibonile nabo, ūlū atī Yakobo dūhū, ū nzunaye wa ng'wa Seeba.

²⁰ Managi gīkī ī yenīyī nalīng'wandīkīla kū būtongi bo ng'wa Mulungu, natūlomalomaga nūūlū hado!

²¹ Nakīīta nūja kū mapandī ga Sulia na Kilikia.

²² Nīyo ū būshū bone bolī būtaalī nū kūmanīka ū mu kanisa ja ng'wa Kilisto ī ja mu sī ya Būyudaya.

²³ Bakandya kwigwa lūkumo lone dūhū gīkī, “Ūyo walūtūluhyaga ī kwandya, ī haha alīkūlomeela ū kūzunya ūko walūkūkenaagūlaga”.

²⁴ Būyūnkumīlīja Mulungu kūlwa nguno yane.