Bafilipi 4 - Sukuma New Testament 2000

¹ Hūna lūūlū badūgū bane abo namusaatilwe, abo mulī būyegi bone na ngikili yane, handatīlagi batogwa ū mulī Seeba.

Mihayo ya būkomeleja.

² Nalīng'wikūmbīlīja ū Eudia nū Sintike babize na būsangī ū mulī Seeba.

³ Alichene, nū bebe ntūmami ng'wichane ntūngīlīja nalīkwikūmbīlīja ūbagunaane a bashīke benabo, nguno nabo balī hamò nane ū mu nīmo gwa kūjilwīlīla ī Nghūlū Jawiza; pyī nū Kelementi, na a batūmami bichane a bangī, abo mina gabo galī mu shitabo sha būpanga.

⁴ Yegelagi mulī Seeba gwa-gwa-gwa; nalīhaya hangī gīkī yegagi.

⁵ Ū wiyūmīlīja wing'we būmanīke kū banhū bose, ū Seeba alī hihī.

⁶ Yaya ū kwikala mukwiganīlījaga mu mhayo gose-gose, alīyo īyo mukwīkoobaga manyagi ū Mulungu mu kūlomba kose na kwikūmbīlīja, hamò na kūlūmba.

⁷ Hūna ī mhola ya ng'wa Mulungu īyo īkīlile witegeleja bose īkūjilanghana ī ngholó jing'we na a maganiko ging'we mulī Kilisto Yesu.

⁸ Badūgū, ū gwa kūmalīja gūlī gīkī, yose-yose īyo īlī ya nghana, yose-yose īyo yigeleelilwe logohano, yose-yose īyo ītūngīlīgije, yose-yose īyo yigeleelilwe kūlwa wela, yose-yose īyo īdūgije kūkumīlījiwa, yose-yose īyo īdūgije kwanukūlwa; ūlū būlīho wiza bose-bose, ūlū līlīho ikūjo lyose-lyose, yideedenghanyagi ī mihayo yenīyo.

⁹ Ng'wīta īyo mukilanga na kwīyanukūla, īyo mukayigwa na kwībona kūfuma kūlī nene; nanghwe ū Mulungu wa mhola akūbiza hamò ning'we.

Mihayo ya winhi wa Bafilipi

¹⁰ Ī haha nalī na būyegi no ū mulī Seeba, nguno ng'wagūbūūkīlīgije hangī ū mhayo gwing'we ū gwa kūniganika, mhayo ūyo mulī nago kwīngīīla kale; kwike dūhū ng'walī mutaalī ū kūpandīka ū ng'wanya.

¹¹ Natūhayaga gīko īkī nalī mu makoye; nguno ū nene naagūbītīla ū gwa kūbiza mu mbika jose na jose ja kikalīle.

¹² Nabūmanile ū būbi wa būgayiwa nū wiza wa būsabi, būlī mhayo naagūbītīla, pyī ī yose nīmanile; nalūmanile ū lwigūto, nū lūtuubo nalwitegelegije. Nagūmanile ū gwa kūkwīlīlwa, nū gwa kūgehelwa nagūmanile.

¹³ Nadūgije kwīyīta pyī ī yose mulī we ūyo akaniguzuhyaga.

¹⁴ Kwike ahene ng'wabeegije no ū kūsangīla hamò nane ū mu būluhi bone.

¹⁵ A bing'we Bafilipi mumanile gīkī kūfuma a ha wandījo wa nīmo gwa Nghūlū Jawiza, aho nīnga Makedonia yalī ītīho kanisa yīngī īyo yasangīlaga hamò nane ū mu mhayo gwa kūfunya na kwanukūla, ūlū ītī bing'we bike.

¹⁶ Nguno na a haho naalī Tesalonike mukanitūmīla kamò nūūlū kabīlī gīko, kūlwa kūnigunaana.

¹⁷ Ītī gīkī nalī nchooji wa shakwinhwa, alīyo nalīgayegela a matwajo ayo galongeja kūkwīla kūlwa kūng'wenhela mbango a bing'we.

¹⁸ Ī shose īsho nalī nasho shinigelile na kūtinda ho. Aho nanukūla nī shisho akenha Epafuladito kūfuma kū bing'we nongeja ū kūkwīja; ī shoi shilī ng'waso gwa kūnungha chiza, shitambo shizunīlījiwe sha kūnyeja Mulungu.

¹⁹ Ū Mulungu wane akūng'winha pyī īyo īng'wigeleelilwe kūbiza nayo gīt'ūmo būlī būsabi w'ikūjo lyakwe mulī Kilisto Yesu.

²⁰ Ikūjo lībize kūlī Mulungu Sīswe kūshisha welelo na welelo: Alichene!

Būgīsha wa kūmalīja

²¹ Būlī ng'wela ngīshagi mulī Kilisto Yesu. Balīmugīsha a badūgū abo balī hamò nane.

²² Nīyo pye a beela balīmugīsha, ī no-no-no a ba mu kaya ya ng'wa Kaisali.

²³ Shigongo sha ng'wa Seeba Yesu Kilisto shibize hamò na myoyo ying'we: Alichene.