Baefeso 6 - Sukuma New Testament 2000

Baana na babyaji

¹ A bing'we baana ng'widohya kūlwa ng'wa Seeba ū kū babyaji bing'we, nguno ū mhayo gwenūyū gūtūngīlīgije.

² Ī shilagīlo sha kwandya īsho shilī na wisagījiwa shihayile gīkī, “Nkūjage so na noko,

³ h'ikūkūbeelela ī mihayo; hama ūkūbiza na būlamu būlīhu ū mu sī.”

⁴ Na a bing'we basaabo yaya ū kūbasaayīcha a baana bing'we, alīyo ng'ūbatongeela mu kalangīle na kahūgūlīle ka ng'wa Seeba.

Basese na basaabo-būgonzo

⁵ Ning'we basese ng'widohya ū kū basīng'we-būgonzo mu mīlī; bizagi n'ikūjo na logohano, nū mu ngholó jing'we mubize na kwifunya gītī kūlī Kilisto.

⁶ Yaya ū kūtūmama chiza ūlū balīmubona dūhū, gītī mulī na nghūmbū ja kūyeja banhū. Alīyo ītagi ī milīmo gītī mulī basese ba ng'wa Kilisto, ng'wīyīta na ngholó īmò īyo yīnyegije Mulungu.

⁷ Tūmamagi na moyo gwape gītī mulīntūmamīla Seeba, ītī gītī mukūbatūmamīlaga banhū.

⁸ Nguno mumanile gīkī būlī ng'wene akwanukūla mheela kūfuma kūlī Seeba, kūlwa milīmo yawiza īyo akwītaga; abize nsese nūūlū alī mu wiyabī.

⁹ Na a bing'we basaabo-būgonzo bīītīlagi gīko a basese bing'we, yaya ū kūbadūkagūla. Managi gīkī ū Seeba wabo ūyo alī ng'wigūlū, ūyo na a bing'we alī wing'we, atīītīlaga banhū mhayo mu būsolanhya.

Wilwisha wa bazunya

¹⁰ Hūna lūūlū, ū gwa kūmalīja gūlī gīkī, handatīlagi ū mulī Seeba nū mu nguzu ja būdūla bokwe.

¹¹ Zwalīlagi pyī ī shilanga sha ng'wa Mulungu, hū mukūdūla kwilwisha nayo ī nyasala-sala ya Ng'wanishi.

¹² Nguno ū wilwisha wise būtī bo kwilwisha na banhū ba mīlī, nūūlū shikolo sha kūbonekana. Tūlī na wilwisha na mabūsugi, hamò na mabūdūla mataale. Tūkūlwaga na basugi ba mu sī ī ya giiti īyī, mabità ga myoyo misoso ya mu mapandī ga ng'wigūlū!

¹³ Hūna lūūlū, shizwalīlagi pyī ī shilanga sha ng'wa Mulungu, mubize na būdūla bo kwīmīīla hīgīyī ū mu lūshikū lwabūbi; hama ūlū ng'wamalamaja ū kwīyīta pyī ī yose, handatīlagi.

¹⁴ Na nghana īmīīlagi hīgīyī, ī nghana ng'wīyitunge gītī nshipi mu mikīmbīlī ying'we. Nū būtūngīlīja mubūzwalīle; ū wene hū būkūmulanghana gītī shizwalo sha chūma kū shikuba.

¹⁵ Nīyo mubize mumalīīlile, ī mhola ya Nghūlū Jawiza ng'wīzwale gītī shilatū kū mhambala jing'we.

¹⁶ Mu būlī mhayo gose na gose bizagi na kūzunya, mukūdime gītī lūmūda, hū mukūdūla ū kūgajimya pye a masonga ga moto a ga Ng'wanishi!

¹⁷ Hama būdimagi ū būpīji, nguno ī lyenīlo līl'ihima ling'we; nū mhayo go ng'wa Mulungu, ūyo gūlī lūshū lo ng'wa Moyo Ng'wela.

¹⁸ Lombagi būl'ikanza mu nguzu ja ng'wa Moyo, mu kalombele kose na kwikūmbīlīja kwa būlī mbika. Nīyo bizagi miso ū kū mhayo gwenūyo, mukomeele ū kūbalombela pye a beela.

¹⁹ Nū nene ng'ūnilombela ninhwe mhayo, nongeje kūgūtūmamīla ū nomo gwane mu būgimu, nīkumūche ī mbisīla ya Nghūlū Jawiza.

²⁰ Nguno ū nene ī haha nalī ntūmami ntungwa kūlwa nīmo gwenūyo. Nilombelagi nabize na būdūla bo kūlomeela mu būgimu gīt'ūmo shinigeleelilwe kwīta.

Būgīsha bo kūmalīja

²¹ Ū ndūgū Tikiko ng'wene ntūmami ng'wishigwa wa ng'wa Seeba, h'ūyo akūmumanīkīja pyī ī mihayo yane, ning'we mumane ūmo nakūjīlaga.

²² Nalīntūma kūlwa nguno ya mhayo gwenūyo, gīkī amumanīkīje ī mihayo yise; ning'we mulūngūjiwe ū mu ngholó jing'we.

²³ Mhola na būtogwa na kūsanya shibize hamò ning'we badūgū, kūfuma kūlī Mulungu Sīswe na Seeba Yesu Kilisto.

²⁴ Shigongo shibize hamò na bose abo bantogilwe Seeba wise Yesu Kilisto, mu būtogwa būtī bo kūkenaagūka.