Baefeso 1 - Sukuma New Testament 2000

Kūgīsha

¹ Nene Paulo ntūng'wa wa ng'wa Kilisto Yesu, kūlwa būtogwa bo ng'wa Mulungu. Kū beela [ba Efeso], abo banzunije Kilisto Yesu.

² Shigongo na mhola shibize hamò ning'we kūfuma kūlī Mulungu Sīswe, na kūlī Seeba wise Yesu Kilisto.

Mbango ja shiimoyo mulī Kilisto.

³ Akumīlījiwe ū Mulungu, ū Ise wa ng'wa Seeba wise Yesu Kilisto; ūyo mulī Kilisto atwīlūkīlile mbango jose ja shiimoyo, kūlwa kikalīle ka ng'wigūlū.

⁴ Nguno ū mulī ng'wenūyo, ū Mulungu atūsolile kūfuma kale kūlwa būtogwa bokwe; kūfuma aho sī ītaalī kūseeng'wa: atūsolile gīkī tūbize banhū beela, na batī na shilingo kū būtongi bokwe.

⁵ Kūfuma kale ū Mulungu ahelile gīkī, tūbize baana bakwe mu nzīla ya ng'wa Yesu Kilisto, kūlenganīla nū wiza bo kasolele kakwe.

⁶ Ū gwenūyo agūhelile kūlwa kūkumīlījiwa kw'ikūjo lya shigongo shakwe, īsho shikang'winha kūtūgaliila no-no-no gīko ū mulī we ū Ntogwa.

⁷ Ū mulī wei ū ng'wenūyo, tūlī na būkomoolwa kūlwa mininga gakwe; hū būlekejiwa bo shibi shise, gīt'ūmo būlī būsabi bo shigongo shakwe,

⁸ īsho akatwīlūkīla: shigongo shitaale no, shikīlile witegeleja na kiganikīle kose!

⁹ Nī mbisīla ya kahelele kakwe ūtūmanīkīja, kūlenganīla nū mumo būlī ū wiza bokwe, ūbo awiganikile ū mulī Ng'wenūyo.

¹⁰ Ū kūlenganīla na a kalongeje kakwe ahelile gīkī, ūlū lyūshikana ī likanza, pyī ī shikolo akūshitūūla ha sīlīlī ya ng'wa Kilisto; pye shibize mulī we: īsho shilī ng'wigūlū nī shisho shilī mu sī.

¹¹ Hama nīyo ū mulī wei tūsolilwe kūfuma kale, kūlenganīla na kahelele kakwe wei ng'wenekīlī, ūyo akatongeelagwa na kalamulīle ka maganiko gakwe.

¹² A bise abo tūlī batongi kūng'wisagīlwa ū Kilisto, tūsolilwe gīkī tūbize ho kūlw'ikūjo na kūkumīlījiwa kwakwe.

¹³ Nū kū bing'we īlī gīko ū mulī we, aho ng'wagwigwa ū mhayo gwa nghana, ī Nghūlū Jawiza ja būpīji wing'we ījo mukajanukūla hūna ng'ūnzunya, mukamenghwa na Moyo Ng'wela wa kwisagījiwa.

¹⁴ Hū ng'wene ūyo alī lūmengho lwa wingīji wise kūshisha būshikīīle ū būkomoolwa wa banhū bakwe kūlwa kūkumīlījiwa kw'ikūjo lyakwe.

Kūlomba kwa ng'wa Paulo

¹⁵ Hūna lūūlū, īkī nane naajiigwile ī mhola jing'we ūmo munsanīgije ū Seeba Yesu, nū būtogwa wing'we ū kū banhū bose,

¹⁶ nakūlūmbaga gwa kūlwa nguno ying'we. Nīyo ū mu kūlomba kwane nataalī gete ū kūng'wība.

¹⁷ Nakūnombaga ū Seeba w'ikūjo, ū Mulungu wa ng'wa Seeba wise Yesu Kilisto, ang'winhe moyo gwa witegeleja, na amukundūlīle, mundeebe gete ūmo alī.

¹⁸ Na a miso ga mu ngholó jing'we gatiimīlwe, muwitegeleje ūmo būlī ū wisagīja bo kitanīle kakwe, nū mumo būlī ū būsabi w'ikūjo lya wingīji bokwe ū kū beela.

¹⁹ Mubūmane nū mumo būlī ū būtaale wa būdūla bokwe ū kū bise abo tūlī bazunya, ūbo būkūtūmamaga kūlenganīla na katūmamīle ka nguzu jakwe,

²⁰ ījo akajitūmamīla ha kūnjūūcha Kilisto kūfuma mu bafu, ūng'wigasha ng'wigūlū kū nkono gwakwe gwa būlyo,

²¹ kwigūlya no-no-no kūkīla mabūsugi gose, na mabūtaale, na mabūdūla, na mabūtongeeji; na būlī lina lyose-lyose īlo līkahayiagwa, ītī ng'wikanza īlī dūhū, alīyo nī līlo līliza.

²² Hūna ū Mulungu ūshitūūla pyī ī shose ha sīlīlī ya mhambala jakwe, hanuma ū ng'wene ūng'wīta kūbiza Ntwe gwa shose kūlwa kanisa,

²³ īyo īlī mīlī gokwe, hū būshikanu bokwe ūyo alī nshikanya wa yose mu shose.