3 Yohana 1 - Sukuma New Testament 2000

Kūgīsha

¹ Nene namhala; Kūlī ntogwa Gayo, ūyo nakūtogilwe mu būtogwa bo nghana.

² Ntogwa, nalīkūlombela wīlūkīlwe mu yose, na hangī ūbize nzubūku wa gīlī-gīlī, gīt'ūmo ūkwīlūkīlagwa mhola mu būpanga wako.

³ Nīyo naayegile no, nguno baalī bizile badūgū bīkaanīla ī nghana yako, ūmo ūkūshimīzīlaga ū mu nghana yenīyo.

⁴ Natī na mhayo gwa kūniyeja kūtinda kwigwa gīkī a baana bane bakūshimīzīlaga mu nghana.

Gwīnda mu kikalīle

⁵ Ntogwa, wabeegije ū kwīta īyo wabīītīlile a badūgū mu wishigwa, nūūlū īkī walī ūtabamanile.

⁶ Baabūkaanīlile ū būtogwa wako ū mu kanisa; hūna lūūlū ūkūbeeja ūlū ūlabalage mu nzīla īyo yigeleelilwe kū būtongi bo ng'wa Mulungu.

⁷ Nguno ū lūgendo lwabo baalūbūkije kūlwa lina lyenīlo; batasolile shose-shose kūfuma ū kū banhū ba mahanga.

⁸ A bise ītwigeleelile kūbanukūla a banhū ba mbika gītī yenīyo, tūbize na būsangī ū mu kwīlwīlīla ī nghana.

⁹ Naamalile kūyandīkīla ī kanisa, kwike ū Diotilefe ū ng'wishatya-shatya alemile ū kūtūdegeleka!

¹⁰ Nose ūlū nalize ko nakwītenda ha ng'wape ī mihayo yakwe īyo akwīyītaga, pyī nī ya kwikala ūtūsondagūla; nguno nīyo atūgelelaga kwīta gīko dūhū, alīyūlema nū kūbanukūla a badūgū, hama na a babo batogilwe ū kūgwīta ū mhayo gwenūyo alīyūbahangīja, wayūbafunya ū mu kanisa!

¹¹ Alīyo ū bebe ntogwa yaya ū kūjilondeela ī nhūngwa ī jabūbi, londeelaga jawiza. Nguno ūyo akīītaga yawiza ng'wene alī wa ng'wa Mulungu, ūyo akīītaga yabūbi, ū ng'wenūyo ataalī ū kūmana ū Mulungu.

¹² Ū Demetilio ū ng'wene bakūnkaanīlaga chiza pye a bose, nī nghana īkūnkaanīlaga, hama na a bise tūlī bakaanīji bakwe; nīyo nū bebe ūbūmanile ū būkaanīji wise gīkī būlī bo nghana.

Kūgīsha kwa kūmalīja

¹³ Nalī nayo mingī ī ya kūkwandīkīla, alīyo natūtogagwa kūkwandīkīla na kalamu ya wino,

¹⁴ nguno nalisagīlwa kūkūbona tūhoye būshū kū būshū. Mhola ībize hamò nangho! Balīkūgīsha a batogwa. Bagīshage a batogwa būlī ng'wene mu lina lyakwe.