2 Timoteo 3 - Sukuma New Testament 2000

Banhū mu shikū ja kū būkalīkījo

¹ Na mhayo gūngī gūyū gūmanage, ū mu shikū ja kū būkalīkījo gakūbiza ho makanza ga kwihīga.

² Nguno a banhū bakwitogwa boi benekīlī dūhū, hama bakūtogwa sabo; nīyo bakūbiza bikumīlīja, badooshi, badalahi, bashitiigwa kū babyaji babo, batamanile kūlūmba, na batī beela.

³ Bakūbiza batamanile kūsaatwa bichabo, batalekejaga, balembekeja, batī bilanghani, bakalahu mu lūlīmi, batatogilwe mihayo mitengeke.

⁴ Bakūbiza bijomboki, bibonya, bikumīlīja, batogilwe mihayo ya kwiyeja boi benekīlī kūtinda kūntogwa Mulungu.

⁵ Ū mu kūbalola ba kūbiza gītī balī beela, alīyo ī nguzu ja wela bajilemile. A benaba lekanaga nabo gete!

⁶ Nguno bamò babo h'abo batogilwe kūguukuuba kūja mu kaya ja bakīma bachilū-chilū; balī banhū abo bakatongeelagwa na kwikūmva kwa būlī mbika, nguno babunilwe shibi!

⁷ Ahene ū kwilanga bakomeezu, alīyo balemeelilwe ū kūshikīīla a ha nghana yenekīlī.

⁸ Gīt'ūmo Yaanè na Yambule bakalema būtongeeji bo ng'wa Musa; na a benaba nabo bīlemile ī nghana, nguno a masala gabo gamala kūbipa, batīmo ū mu kūzunya.

⁹ Alīyo nahene batūsegenela, nguno ū būbi wabo būkūmanīka kū banhū bose, gīt'ūmo īkajīla nū kū bangī abo.

Kūganikīlwa kwa ng'wa Timoteo

¹⁰ Alīyo ū bebe wīmanile īyo nakwīlangaga ū nene, pyī nī nhūngwa jane ūjimanile; nī yīyo nakwīkoobaga, nū kūzunya kwane, nū būshisha-ngholó bone, nū būtogwa bone, nū wiyūmīlīja bone;

¹¹ pyī nī ya būluhiwa ūbo būkanigwīla nalī Antiokia na Ikonio na Lustila. Ūbūmanile pyī ū būluhi ūbo nabūbītīla kūlwa kwiyūmīlīja, nū mumo wanipīgīja ū Seeba ū mu yose yenīyo!

¹² Na nghana pye abo batogilwe shimīzīle ya wela mulī Kilisto Yesu bakūluhiwa.

¹³ Lelo a banhū babūbi na a bibeeleja, a bene bakongeja kūkūla ū mu būbi, bakongeja kūlemva, na a boi kūlemba banhū!

¹⁴ Alīyo ū bebe shimīzīlaga mo dūhū ū mu mihayo īyo wamala kwilanga na kwīyanukūla; nguno ūmanile ūkilanga kūfuma kūlī nani.

¹⁵ Na hangī ūshimanile kūfuma ha būdo wako ī shandīkwa sheela, īsho shidūgije kūkwīta kūbiza ng'witegeleja kūshisha kwingīla mu būpīji, kūlwa kūnzunya Kilisto Yesu.

¹⁶ Pye ī shandīkwa shihaahīlilwe myūyī ya ng'wa Mulungu, hangī shibeelelile ū mu nīmo gwa kūlanga, kūhama, kūhūgūla, na kūtongeela mu būtūngīlīja;

¹⁷ gīkī ū munhū wa ng'wa Mulungu ashikanyiwe, abize amalīīlile kū būlī nīmo gwawiza.