2 Timoteo 1 - Sukuma New Testament 2000

Kūgīsha

¹ Nene Paulo ntūng'wa wa ng'wa Kilisto Yesu, kūlwa būtogwa bo ng'wa Mulungu, gīt'ūmo kūlī kwisagīlwa kwa būpanga ūbo būlī mulī Kilisto Yesu.

² Kūlī Timoteo ng'wana wane ntogwa. Shigongo na wiza na mhola shibize hamò nangho kūfuma kūlī Mulungu Sīswe, na kūlī Kilisto Yesu Seeba wise.

Wishigwa kūlwa nguno ya Nghūlū Jawiza

³ Nakūnūmbaga Mulungu ūyo nakanamyaga na ngholó neela, gīt'ūmo bakūlūgenji bane bīītīlaga. Nataalī ū koya ū kūkwizūkwa ūlū nalīlomba līīmi na būjikū.

⁴ Na hangī nataalī nūshizūkwa ī shisoji shako, hūna lūūlū nalī na nghūmbū no ja kūkūbona nayege.

⁵ Nū kūzunya kwako ū kwa nghana nakūkwizūkagwa, ūko kwalī mulī mamayo Loisi ī kwandya, na mulī noko Eunike; ūko namanile hape gīkī nū mulī bebe kūlīmo.

⁶ Hūna lūūlū kūlwa mhayo gwenūyū, nalīkwizūkīja gīkī, ī shakwinha sha ng'wa Mulungu īsho ūkanukūla kūfuma aho nakakūtūūlīla makono, shizalabanyage shandye kūtūmama.

⁷ Nguno ū Mulungu atatwinhile moyo gwa booba, alīyo gwa būdūla na būtogwa na masala madeekanu.

⁸ Hū kūhaya yaya ū kūding'wa minala ū kūnkaanīla ū Seeba wise, nū nene ūyo nalī ntungwa kūlwa nguno yakwe; alīyo zunyaga ū kūbiza mo ū mu būsangī bo kūluha kūlwa nguno yajo ī Nghūlū Jawiza, mu būdūla bo ng'wa Mulungu,

⁹ ūyo watūpīja. Hangī watwitana mu kwitana kwela, ītī kūlwa wiza bo shītīle shise; alīyo kūlwa kasolele kakwe na shigongo shakwe, gīt'ūmo atwinhīlile mulī Kilisto Yesu kūfuma kale, kūko ikanza lītaalī kwandya kūbiza ho.

¹⁰ Īsho ī haha shamalile koolechiwa kūlwa nguno ya kwilonga kwakwe ū Kilisto Yesu mpīja wise, ūyo wakwīngije ū kūcha, wenha būpanga na būtūūcha mu nzīla ya Nghūlū Jawiza.

¹¹ Ū nene nakatūūlwa kūbiza nkumūcha wajo ī Nghūlū Jawiza jenījo, na ntūng'wa na nangi wa kūjilanga kū banhū.

¹² H'ī nguno yene nakūluhaga gīkī; alīyo natūding'wa minala īkī nandeebile ūyo nansanije, hama namanile hape gīkī adūgije kūshilanghana īsho nashibīka kūlī we, kūshisha lūshikū lwenūlo.

¹³ Īyūmīīlage ī mihayo īyo wa kūfuma kūlī nene, nguno īlī mu kwihela kwa kūgunaana, īlanghanage mu kūzunya na būtogwa mulī Kilisto Yesu.

¹⁴ Ī shawiza īsho ūbīkījiwe, shilanghanage mu nguzu ja ngwīyigwa Moyo Ng'wela ūyo akwikalaga mu bise.

¹⁵ Ūmanile gīkī pye a bana Asia banipeelile, a ba Figelo na Helimogene balī bamò babo!

¹⁶ Ū Seeba ni īchīlage shigongo ī kaya ya ng'wa Onesifolo, nguno nghangala ningī walūniifuujaga, hama nū būtungwa bone atabūbonelile minala.

¹⁷ Nguno na a haho wiza Lumi akashikīla kūnikooba mu būkomeezu, kūshisha ūnipandīka.

¹⁸ Ū Seeba ni ang'winhage kūchīlwa shigongo ū kū būtongi bo ng'wa Seeba ū mu lūshikū lwenūlo. Nīyo nū bebe wīmanile ī mihayo īyo wanibeegejaga ī Efeso.