2 Batesalonike 3 - Sukuma New Testament 2000

Kūkomelejiwa kūlomba

¹ Ū gwa kūmalīja badūgū, tūlombelagi, ū mhayo go ng'wa Seeba gūsambaale wangū, hangī gwinhwe ikūjo gīt'ūmo īkūjīlaga kū bing'we.

² Na gīkī tūpījiwe ū kū banhū a bibonya na a bahūnga; nguno a banhū batī bazunya pye a bose.

³ Alīyo ū Seeba īkī nsanyiwa, akūmuguzuhya na kūmulanghana a bing'we ū kūlī ng'wanishi.

⁴ Tūlīnsanya Seeba gīkī īyo tūlīmukomeleja yenīyī mukwīyīta, na hangī mukwīta na kūtinda ho.

⁵ Nanghwe ū Seeba leki ajitongeele ī ngholó jing'we mu būtogwa bo ng'wa Mulungu na mu wiyūmīlīja bo ng'wa Kilisto.

Būhūgūji kūlwa boolo

⁶ Hama tūlīmukomeleja badūgū mu lina lya ng'wa Seeba Yesu Kilisto gīkī, lekanagi nanghwe būlī ndūgū ūyo alī na nhūngwa ja boolo, ūyo atūshimīzīlaga mu malange ayo ng'waganukūla kūfuma kū bise.

⁷ Nguno a bing'we benekīlī mumanile gīkī shing'wigelile kūtūlondeela, īkī twalī tūtī boolo aho twalī hamò ning'we.

⁸ Tūtanukūlile shilīwa sha dalali kūfuma kūlī munhū ose-ose, alīyo līīmi na būjikū twalwishaga milīmo midito, nguno twalī tūtatogilwe kūmuna nūūlū ūmò wing'we.

⁹ Twītaga gīko ītī kūlwa kūbiza tūtī na būdūla bo kūlagīja, alīyo kūlwa nguno ya kwitūūla a bise kūbiza būlolelo wing'we, gīkī ning'we muyīta gīt'ūmo tūkwītīlaga a bise.

¹⁰ Nguno na a haho twalī hamò ning'we tūkamuwīla gīkī, ūlū munhū atatogilwe kūtūmama milīmo, nū kūlya atizagūlya!

¹¹ Twandije kwigwa gīkī bamò na bamò ū mu bing'we bakūjaga būsīngīja mu kaya ja banhū, ndūhū nūūlū kūtūmama nīmo; batī na gwabo gete ūlū ītī kūja bakwishatya-shatyaga dūhū!

¹² Na lūūlū a banhū ba mbika yenīyo tūlībakomeleja na kūbahūgūla mulī Seeba Yesu Kilisto balembeele, batūmame milīmo yabo; nabo bayipandīkīla shilīwa shabo benekīlī.

¹³ Alīyo a bing'we badūgū, yaya ū kūgwa ngholó ū kwīta ī yawiza.

¹⁴ Ūlū aligele wa kūlema kūgwigwa ū mhayo gwise ūyo tūlīng'wandīkīla, mpambūkagi ū munhū ng'wenūyo, yaya nū kwisangīja nanghwe, ading'we minala.

¹⁵ Kwike yaya ū kūnola gītī ng'wanishi, ng'ūnghūgūla gītī ndūgū.

Mihayo ya kūmalīja

¹⁶ Hūna lūūlū ū Seeba wa mhola ang'winhe mhola mu yose gwa-gwa-gwa. Seeba abize hamò ning'we bose.

¹⁷ Ūbū wene būgīsha mu nkono gwane nene Paulo ng'wenekīlī, hū lūmengho ūlo nakūtūūlaga mu nyalūba jose; h'ūmo nakwandīkīlaga.

¹⁸ Shigongo sha ng'wa Seeba wise Yesu Kilisto shibize hamò ning'we bose pye: Alichene.