2 Bakolinto 6 - Sukuma New Testament 2000

¹ Nose a bise īkī tūlī batūmami biye ba ng'wa Mulungu, tūlīng'wikūmbīlīja mutizūshanukūla mu būtūdīlīla ī shigongo sha ng'wa Mulungu.

² Nguno alīhaya gīkī, “Naakwigwile ng'wikanza īlo līzunīlījiwe, hama nūkūgunaana mu lūshikū lo būpīji.” Ali lūūlū managi gīkī, ī lyenīlī h'ī likanza īlo līzunīlījiwe, mumane gete gīkī ū lwenūlū hū lūshikū lwa būpīji.

³ A bise tūtūchaamīkaga ishikī lya mbika yose-yose lya kwipamya, nguno tūtatogilwe gūsondagūlwe ū nīmo gwise.

⁴ Alīyo mu būlī mhayo tūkwiyoolechaga mu wiyūmīlīja būtaale gīkī tūlī batūmami ba ng'wa Mulungu; ībize mu būluhi, mu būgehelwa, nūūlū mu būpīna.

⁵ Ībize mu kūtūlwa, mu kūtungwa, nūūlū mu kwītīlwa nsambo; ībize mu milīmo midito, mu kūkeyula būjikū pye na kūlaala yaya, nūūlū mu kūdīla nzala.

⁶ Mu wela, mu witegeleja, mu wigimīlīja, nūūlū mu wiza-ngholó. Mulī Moyo Ng'wela, mu būtogwa bo nghana,

⁷ mu mhayo gwa nghana, nūūlū mu būdūla bo ng'wa Mulungu. Pye nūūlū mu kūtūmamīla shilanga sha būtūngīlīja sha kū nkono gwa būlyo na gwa lūmoso.

⁸ Ībize mu kūkumīlījiwa na mu kūdalahījiwa, mu kūsondagūlwa na mu kūhayiwa chiza, nūūlū mu kūbalwa gīkī tūlī balomolomo, alīyo tūlī batūngīlīja.

⁹ Mu kūbiza gītī tūtamanīkile alīyo tūmanilwe chiza no, mu kūbalwa gītī tūchile alīyo mulībona tūlī bapanga, gītī tūkūtūlagwa mu kūhūgūlwa alīyo yaya ū kūbūlagwa.

¹⁰ Gītī tūlī bapīna alīyo tūlī na būyegi gwa-gwa-gwa, gītī tūlī bahabī alīyo tūkūsabyaga banhū, gītī tūlī bagayiwa alīyo pyī ī shikolo shilī shise.

¹¹ Bing'we Bakolinto, twalūngalūngile ning'we bo hape-hape, nī ngholó jise jilugūkile ū kū bing'we.

¹² Ū mu bise gūtīho mhayo gose-gose gwa kūng'wīngīja ū wiyabī wing'we; a bing'we hū mubūgugīle ū būtogwa wing'we?

¹³ Leki namuwīle gītī munhū alīganīla baana bakwe; galīhagi ning'we ū mu ngholó, mufunye gīt'ūmo mukwanukūlīlaga a bing'we!

Hekalu ya ng'wa Mulungu Mpanga

¹⁴ Yaya ū kūtunganījiwa h'ijoki līmò na banhū abo batī bazunya; nguno ū būtūngīlīja būlī na būsangī kī nū būkenaagūji? Nūūlū ī lisana līlī na būsangī kī nī giiti?

¹⁵ Na hangī īlīho long'we kī a ha gatī ya ng'wa Kilisto na Belieli? Nūūlū ū munhū ū nzunya alī na ngabo kī nū yūyo atī nzunya?

¹⁶ Ī hekalu ya ng'wa Mulungu nayo īlī na widomanīja kī na shiikolile sha kūlamiwa? Nguno a bise tūlī hekalu ya ng'wa Mulungu mpanga; gīt'ūmo ahayīlile ū Mulungu ng'wenekīlī; gīkī, “Nakwikala hamò nabo, na nakūshimīza hamò nabo, nīyo nakūbiza Mulungu wabo, nabo bakūbiza banhū bane.

¹⁷ Hūna lūūlū īngagi mo, lekanagi nabo,” alīhaya Seeba; “hama yaya ū kūkuumya shikolo shisoso, hūna nakūng'wanukūla.

¹⁸ Nakūbiza Sīng'we, na a bing'we mukūbiza bitūnja bane na bashīke bane; alīhaya Seeba wa būdūla bose.”