2 Bakolinto 5 - Sukuma New Testament 2000

¹ Nguno tūmanile gīkī, ī numba yise ī ya mu sī ūlū yūsambagūlwa, tūlī na numba ya kūfuma kūlī Mulungu; numba ya ng'wigūlū ya būja na būja, īyo ītī ya kūbeejiwa na makono.

² Īkī ūmo tūlī ī haha tūkūganghīlaga, tūlī na nghūmbū ningī no ja kūzwalīchiwa nzengo gwise mpya, ū gwa ng'wigūlū.

³ Nguno ūlū tūzwalīchiwa, tūtūbonekana tūlī dūūhū.

⁴ Na nghana aho tūlī ū mu numba ya kwengemekeja īyī, tūkūlīlaga kūlwa nguno ya makoye; ītī gīkī tūtogilwe kūzuula, alīyo tūtogilwe kūzwalīla, ū mīlī gwa kūcha gūmilwe na būpanga.

⁵ Mulungu ng'wenekīlī h'ūyo atūlonja-longegije ū mhayo gwenūyū, ūtwinha na Moyo Ng'wela kūlwa koolecha gīkī tūlī bakwe.

⁶ Hūna lūūlū tūlī bashisha-ngholó, īkī tūmanile gīkī aho tūtaalī tūlī mu mīlī tūtī hamò nū Seeba.

⁷ Nguno ū mu kashimīzīle kise tūkatongeelagwa kūzunya, ītī kūbona.

⁸ Na nghana tūlī bashisha-ngholó, kwike tūkūbonaga gīkī, īlī hambū-hambū twīnge ū mu mīlī tūje kaya kūlī Seeba.

⁹ Na lūūlū, nūūlū tūbize tūlī kaya, nūūlū tūtī kaya, ī nghūmbū jise jilī kūnyeja we.

¹⁰ Nguno a bose pye shitwigeleelilwe kwīmīīla kū būtongi w'isumbī lya kūlamulīla lya ng'wa Kilisto; būlī ng'wene anukūle mheela ya kūlenganīla nī yīyo akwītaga aho ataalī mu mīlī, ībize yawiza, nūūlū yabūbi.

Nīmo gwa būsangīja

¹¹ Nose īkī tūlūmanile ū logohano ūlo lwigeleelilwe kūlī Seeba, tūkūbahūgūlaga a banhū. A bise tūmanīkile hape ū kūlī Mulungu, hama nalisagīlwa gīkī nū mu wiyangūji wa mu ngholó jing'we tūmanīkile hape.

¹² Tūtatogilwe kwandya kwihaya hangī ū kū bing'we, alīyo tūlīng'winha nzīla ya kwikumīlīgīja ning'we kūlwa nguno yise; mupandīke ya kūyūbashokeja abo basendamīlile mihayo ya higūlya-gūlya: ītī ya mu ngholó.

¹³ A bise nūūlū tūkabiza twahūganile, nahene īlī kūlwa nguno ya ng'wa Mulungu; hama ūlū tūbiza tūlī batengeke, īlī kūlwa nguno ying'we.

¹⁴ Nguno ū būtogwa bo ng'wa Kilisto būkūtūkomelejaga tūfunye būlamuji būlī gīkī, ūmò akacha kūlwa nguno ya bose, hūna lūūlū pye a bose būūcha!

¹⁵ Akacha kūlwa nguno ya bose, gīkī a bapanga batizūbiza bapanga hangī kūlwa nguno yabo; alīyo kūlwa nguno yakwe ūyo akabachīlīla, hama ūjūūka.

¹⁶ Ali lūūlū, kūfuma haha a bise tūtatogilwe kūng'witegeleja munhū nūūlū ūmò mu nhūngwa ja mīlī; nūūlū īkī ū Kilisto twalī tūmanile mu mbika ya mīlī ī kwandya, alīyo ī haha tūtang'witegelegije mu gīko hangī.

¹⁷ Hūna lūūlū, munhū ose-ose ūlū alī mulī Kilisto, alī shiseeng'wa shipya; ī ya kale yamalaga kūbīta, ī haha īlīho mipya.

¹⁸ Ī yose īyī īfumile kūlī Mulungu, ūyo wamala kūtūsangīja hamò nanghwe wei ng'wenekīlī mu nzīla ya ng'wa Kilisto; hūna na a bise ūtwinha nīmo gwa būsangīja.

¹⁹ Nguno gīt'ūmo ū mulī Kilisto ū Mulungu walī na nīmo gwa kūbasangīja a ba mu sī hamò nanghwe, kūlwa kūleka kūbabalīla ū būkenaagūji wabo, na a bise watwinha mhayo gwa kūtūūla būsangī.

²⁰ Nose a bise tūlī batūmami ha ng'wanya go ng'wa Kilisto, hū kūhaya ū Mulungu alībiza gītī alikūmbīlīja kūbītīla mu bise. Ali lūūlū, tūlīng'wikūmbīlīja kūlwa ng'wa Kilisto, bizagi na būsangī nanghwe ū Mulungu.

²¹ Nguno ū wei akang'wīta kūbiza shibi ūyo walī atamanile shibi, kūlwa nguno yise; gīkī a bise tūbize būtūngīlīja wa ng'wa Mulungu mu nzīla yakwe.