2 Bakolinto 4 - Sukuma New Testament 2000

Sabo mu shiseme sha malongo

¹ Nose īkī ū būtūmami wenūbū tūlī nabo kūlwa kūchīlwa shigongo, tūtīko kūgwa ngholó.

² Alīyo tūkwīlemaga ī mihayo ya minala, ī ya nyaguukuubi; pye na a kashimīzīle ka nyasala-sala. Yaya nūūlū ni kūgūtūmamīla ū mhayo go ng'wa Mulungu kwipandīkīla nīīlo. Ī nghana tūkwīyoolechaga ha ng'wape, na a bise benekīlī tūkwiyoolechaga ha ng'wape, būlī munhū atūkaanīle mu būgololoku bo moyo gokwe kū būtongi bo ng'wa Mulungu.

³ Hūna lūūlū, ī Nghūlū Jawiza jise ūlū jibize jibisilwe, numho jibisilwe kū banhū abo bajile mu kūyagala dūhū.

⁴ Nguno a bene ū mulungu wa mu sī wagabbokuja a maganiko gabo batizūzunya; ī Nghūlū Jawiza jitizūbatiimīla bakalībona ī likūjo lya ng'wa Kilisto, ūyo alī suso ya ng'wa Mulungu.

⁵ A bise tūtī balomeeji ba mihayo yise ya benekīlī, alīyo ya ng'wa Kilisto Yesu, gīkī alī Seeba; lelo a bise bene tūlī batūmami bing'we kūlwa ng'wa Yesu.

⁶ Nguno ū Mulungu ūyo akahaya gīkī, “Isana lyake kūfuma mu giiti,” hū ng'wene ūyo akaaka ū mu ngholó jise, ūtwinha isana gīkī tūdūle kūlīmana ī likūjo lya ng'wa Mulungu mu nzīla ya būshū bo ng'wa Kilisto.

⁷ Kwike ī sabo yenīyī tūlī nayo mu shiseme sha malongo, ū būdūla ū būtaale būbize bo ng'wa Mulungu, būtizūfuma kū bise.

⁸ Tūkūshitelejiagwa kūfuma mhandī jose, alīyo yaya ū kūkaba; tūlī mu makoye, alīyo yaya ū kūgwa ngholó.

⁹ Tūkūluhiagwa, alīyo yaya ū kūlekanījiwa; tūkūtaalīkagwa ha sī, alīyo yaya ū kūcha.

¹⁰ Būlī gwa tūkūbūūchaga kūcha kwa ng'wa Yesu ū mu mīlī, ū būpanga bo ng'wa Yesu nabo boolechiwe ū mu mīlī gwise.

¹¹ Nguno a bise nūūlū īkī tūlī bapanga, alīyo tūkūfunyiagwa būlī shikū jose na jose gīkī tūbūlagwe kūlwa nguno ya ng'wa Yesu; ū būpanga bo ng'wa Yesu nabo boolechiwe hape ū mu mīlī gwise ū gwa kūcha.

¹² Nose hū kūhaya gīkī, kūcha kūkūtūmamaga ū mu bise, lelo ū mu bing'we būpanga.

¹³ Hūna lūūlū īkī tūlī na moyo gwa kūzunya gīt'ūmo gwandīkilwe gīkī, “Nakazunya h'ī nguno yene nakayomba;” na a bise tūzunije, h'ī nguno yene tūkūyombaga.

¹⁴ Tūmanile gīkī ūyo akanjūūcha Seeba Yesu na a bise akūtūjūūcha hamò nanhgwe ū Yesu, atwīmīlīje hamò ning'we kū būtongi bokwe.

¹⁵ Pyī ī shikolo shilīho kūlwa nguno ying'we, ībize gīkī ī shigongo shibapandīke banhū bingī no-no-no, hama bongeje kūkwīla būlūmbi kūlwa nguno y'ikūjo lya ng'wa Mulungu.

Nhūngwa ījo jibigeleelilwe bazunya

¹⁶ Na nghana ī mibīlī yise īkūjaga yongeja kūgogoloha, alīyo tūtīko ū kūgwa ngholó, īkī ū būmunhū wise ū bo mu gatī būkwītagwa kūbiza būpya būlī lūshikū.

¹⁷ Nguno ū būluhi bo haha būlī būbbūpu no, hama būkūtūbeegejaga ikūjo lya būja na būja, īlo līlī na mpango ntaale kūtinda.

¹⁸ Nose tūtūshikalalīlaga ī shikolo ī sha kūbonwa, alīyo īsho shitī sha kūbonwa. Nguno ī sha kūbonwa shilī sh'ikanza dūhū, alīyo īsho shitī sha kūbonwa shilī sha būja na būja.