2 Bakolinto 3 - Sukuma New Testament 2000

Batūmami b'ilagane ipya

¹ Kolaga hamo tūlandya kwikumīlīja hangī shi? Nūūlū tūgonge nyalūba ja kūkumīlīja jize ū kū bing'we, nūūlū jifume ū kū bing'we, gīt'ūmo bakīītīlaga bangī?

² A bise ī nyalūba yise īlī bing'we benekīlī; yandīkilwe mu myoyo ying'we, pye a banhū bīmanile nguno bakwīsomaga.

³ A bing'we ng'wigeleelilwe gete koolecha gīkī mulī nīmo gwise, mulī nyalūba ya ng'wa Kilisto īyo ītandīkilwe na wino, yandīkilwe na Moyo wa ng'wa Mulungu mpanga, hama ītī ha mabalala ga mawe, alīyo mu ngholó ja banhū.

⁴ Ū gwenūyū hū kūsanya kwise ū kūlī Mulungu, kūlwa nguno ya ng'wa Kilisto.

⁵ Ītī gīkī a bise twigeleelilwe kūbalīlwa mhayo gose-gose gīkī gūlī gwise gwa benekīlī; ū būdūla wise būfumile kūlī Mulungu.

⁶ Hū ng'wene ūyo akatwīta kūbiza batūmami b'ilagane ipya, īlo lītandīkilwe bo nuguta, alīyo lya ng'wa Moyo; nguno ū wandīke būkabūlagaga, alīyo ū Moyo akinhaga būpanga.

⁷ Hūna lūūlū, ū nīmo ūyo gwalī gwandīkilwe ha mawe na gwenhelejaga icha, ūlū gwalī n'ikūjo itaale, kūshisha nose a Baisilaeli būyūlemeelwa ū kūbūlola ū būshū bo ng'wa Musa nguno y'ikūjo īlo lyashilaga,

⁸ al'ū nīmo gwa kwītwa mu nguzu ja ng'wa Moyo gūtūbiza n'ikūjo itaale kūtinda?

⁹ Īkī ū nīmo gwa kwenheleja nsango ūlū gwalī n'ikūjo, hū kūhaya ū gwa kwinha banhū kūbalīlwa būtūngīlīja gūlī n'ikūjo itaale kūtinda!

¹⁰ Nguno īsho shalī n'ikūjo a makanza genayo, ī haha shitī n'ikūjo, ū kūlenganījiwa nū būtaale w'ikūjo īlo līlīho!

¹¹ Īkī ūlū shalī n'ikūjo ī sha kūshila, hū kūhaya ī sha kūshinga ho shilī n'ikūjo itaale kūtinda!

¹² Hūna lūūlū, īkī ū kwenūkū hū kwisagīlwa kwise, tūlī mu kwisandaala kūtaale no.

¹³ A bise tūtī na nguno ya kwīta ūmo wītīlaga Musa, ūmo wabūkundīkījaga līng'wenda ū būshū bokwe, gīkī a Baisilaeli batizūliiloleela ī likūjo īlo lyashilaga.

¹⁴ A maganiko gabo gakaganghanala, kūshisha nī lelo yenīyī lītaalī ho ī līng'wenda lyenīlo, līkashīkījaga ūlū lyasong'wa ī Lilagano lya Kale. Bataalī ū kūkundūlīlwa gīkī ū mulī Kilisto lyamala ū nīmo.

¹⁵ Nī lelo yene ūlū wasong'wa ū Musa ī līng'wenda lyenīlo līkashīkījaga a ha ngholó jabo.

¹⁶ Alīyo ose-ose ūyo ūngalūkīla Seeba, ī līng'wenda lyenīlo līkīnjiagwa

¹⁷ Ū Seeba alī Moyo, hūna lūūlū aho alī ū Moyo wa ng'wa Seeba, būlīho wiyabī.

¹⁸ Pye a bise abo tūkūlīlolaga ī likūjo lya ng'wa Seeba gītī kūlola ng'wilole na būshū būtakundīkīgije, tūkūgalūchiagwa twabiza mu suso yakwe, twayūng'weka-ng'weka kūlw'ikūjo īlo līkongejaga kūkwīla, kūfuma kūlī Seeba ūyo alī Moyo.