2 Bakolinto 13 - Sukuma New Testament 2000

Būhūgūji bo kūmalīja na būgīsha

¹ Ūlū nalize koi, lūkūbiza lūkangala lo kadatū ū lwenūlū; būlī mhayo shiigelile goolechiwe na bakaanīji babīlī nūūlū badatū, hū gūmanīke ū būnghana wago.

² Naamalile kūmuwīla, nī haha nūūlū īkī natīko koi, nalīhaya gīt'ūmo naalī naalekile nūmuwīla aho naalī nizile koi ū lūkangala lo kabīlī; nalībamanya nghana-nghana abo bakwītaga shibi, pye na a bangī, gīkī ūlū nalize ī hangī, natikūmbīlījaga.

³ Īkī mukūkoobaga shimanīkījo sha gīkī ū Kilisto akūyombaga kūbītīla mulī nene, managi gīkī, atī ngokolo na hado yaya ū kū bing'we, alīyo alī na būdūla ū mu bing'we.

⁴ Na nghana akakong'wa ha nsalaba mu būgokolo, alīyo ī haha alī mpanga kūlwa būdūla bo ng'wa Mulungu; hama īlī nghana gīkī ū mulī wei tūlī bagokolo, alīyo ū kū bing'we tūkūbiza bapanga hamò nanghwe kūlwa būdūla bo ng'wa Mulungu.

⁵ Igīsīlījagi bing'we benekīlī mubone ūlū mulīmo ū mu kūzunya; hamo mutamanile gīkī ū Kilisto alīmo ū mu bing'we? Numho jibize jimulemeelile ī nzīla jakwe!

⁶ Alīyo nalisagīlwa mukūdeeba gīkī, a bise jitatūlemeelile ī nzīla jakwe.

⁷ Ī haha tūlīnomba ū Mulungu mutizīīta mhayo gose-gose gwabūbi; ītī kūlwa gīkī a bise tūbonwe tūdūgije kūshimīzīla ū mu nzīla jakwe, alīyo a bing'we ītagi dūhū ī yawiza, nūūlū tūkabonekana a bise gīkī jitūlemeelile ī nzīla jakwe!

⁸ Nguno a bise tūtīko kwīta mhayo gose-gose ūyo gwipūganije nayo ī nghana, tūkīītaga īyo yīmīīlile ha nghana dūhū.

⁹ A bise tūkūyega nūūlū tūgogoloha, shitange a bing'we mubize na būdūla; nīyo ū būlombi wise būlī gīkī mubize bashikanu.

¹⁰ H'ī nguno yene ī haha aho natīko koi nalīng'wandīkīla ī mihayo yenīyī, gīkī ūlū nalize natizūbūtūmamīla mu būkalī ū būdūla ūbo Seeba waninha; nguno waninha kūlwa kūzenga, ītī kūsambagūla.

¹¹ Ū gwa kūmalīja bang'wise ikalagi mhola, ikondelagi, nīyo ng'wihūgūla; bizagi na būsangī ū mu maganiko, na mubize banhū ba mhola. Ū Mulungu wa būtogwa na mhola akūbiza hamò ning'we.

¹² Igīshagi bing'we kū bing'we mu kwibbipa kwela.

¹³ Pye a beela balīmugīsha.

¹⁴ Shigongo sha ng'wa Seeba Yesu Kilisto, nū būtogwa bo ng'wa Mulungu, hamò nū būsangī bo ng'wa Moyo Ng'wela, shibize hamò ning'we bose: Alichene.