2 Bakolinto 11 - Sukuma New Testament 2000

Paulo na batūng'wa ba nyalomolomo

¹ Nalīmulomba mugeme ho hangī hado ū kwiyūmīlīja nabo ū būchilū-chilū bone, gīt'ūmo mukīītīlaga na kale!

² Ū nene nalī na wilu bo ng'wa Mulungu kūlwa nguno ying'we, nguno nakamulūnja kūlwa ngosha ūmò, gīkī namufunye kūlī Kilisto gītī kūng'winha munhya nsūhya, ūyo atī na shilingo nūūlū hado.

³ Alīyo nandije kogoha, mutizūbiza ng'wahūmbūūlilwe a maganiko ging'we ng'wīnga ū mu nghana, nū mu wela bo ng'wa Kilisto, gīt'ūmo nzoka īkanemba-lembela Eva mu nyasala-sala!

⁴ Namanile gīkī mushikile kwiyūmīlīja nūūlū munhū akiza alīmulomeela ya ng'wa Yesu ūngī, ūyo tūtamulomeelile bise, nūūlū ya ng'wa moyo ūngī ūyo ng'walī mutang'wanukūlile, nūūlū mbika yīngī ya nghūlū jawiza ījo tūtamulomeelile a bise.

⁵ Alīyo nalībona gīkī, a batūng'wa a bataale batanilebije mhayo gose-gose nū nene.

⁶ Īkī nūūlū nakabiza nagehelilwe būdūla mu kalūngalūngīle, alīyo ītī gīko ū mu witegeleja; nguno h'ūmo twang'oolekegije mu yose.

⁷ Nūūlū hamo nakahūba ū kūmulomeela dalali ī Nghūlū Jawiza ja ng'wa Mulungu? Ū nene nidohyaga gīkī mugūngūhiwe a bing'we.

⁸ Ī mheela īyo nanukūlaga kūlwa kūmutūmamīla bing'we, napandīkaga kūfuma kū banhū ba kanisa jingī!

⁹ Nūūlū ū mu kūgehelwa aho naalī hamò ning'we, nahene natabizile nigo kūlī munhū ose-ose, nguno ū būgehelwa bone būkamalwa na badūgū abo bakiza kūfuma Makedonia. Nilanghanaga natizūbiza nigo ū kū bing'we; nīyo nī haha nataalī nilanghanile.

¹⁰ Ūmo nghana ya ng'wa Kilisto īlī mulī nene, ū wikumīlīja bone wenūbū atīho wa kūbūhuumūja nūūlū hado ū mu sī ya Akaya.

¹¹ Ī gīsī nibūlī? Kolaga hamo muliganika natamutogilwe a bing'we? Ū Mulungu amanile ūmo namutogelilwe.

¹² Alīyo nakongeja kwīta ūmo nakwītīlaga na kale, nabahuumūje a bigīmba-gīmbi; bagayiwe ī nzīla ya koolecha gīkī īyo bakwītaga īlenganīlile nū mumo tūkwītīlaga a bise.

¹³ Nguno a bene batūng'wa ba kwigīmbīja, balomolomo ba balomolomo; bakwiyītaga kūbiza batūng'wa ba ng'wa Kilisto.

¹⁴ Kwike ū mhayo gwenūyū gūtī gwa kūkumya, nguno nū Shetani ng'wenekīlī akiyītaga kūbiza malaika w'isana!

¹⁵ Hū kūhaya gūtī ntaale no ū gwa batūng'wa bakwe nabo ū kwiyīta kūbiza gītī batūmami ba nghana; alīyo ī nghalīlo yabo īkūbiza gītī h'ūmo īlī ī nghalīlo ya milīmo yabo!

Kūluha kūlwa nguno ya nīmo gwa būtūng'wa

¹⁶ Leki nahaye hangī gīkī, atizigela munhū ose-ose wa kūniganikīla ū nene gīkī nalī nchilū-chilū; kwike nahene nūūlū mubize mukūniganikīlaga gīko, nanukūlagi gīt'ūmo nalī, nane nabonele ho mhayo gwa kwihaya, nūūlū gwa malīngīīla!

¹⁷ Īyo nalīyīhaya yenīyī ītī gīt'ūmo Seeba atogelilwe; nalīhaya ya nyachilū-chilū mu wikumīlīja bo nyagimu.

¹⁸ Alīyo īkī bingī bakwikumīlījaga kūlwa mihayo ya mu mīlī, nū nene leki nikumīlīje,

¹⁹ nguno mulī biyūmīlīja nū kū bachilū-chilū, īkī mulī na masala.

²⁰ A bing'we mukiyūmīlījaga nūūlū munhū ūmutūūla mu būsese, nūūlū ūlya sabo jing'we; nūūlū ūng'wiboneela, nūūlū ūmudoosa, nūūlū ayūmupaala mapī!

²¹ Leki nahaye nūūlū īkī nalīcha soni; gashi ī gete a bise tūkabiza babbomheezu no īkī tūkaleka ū kwīyīta ī yenīyo! Kwike ūlū munhū akwibonaga gīkī alī ngimu, leki nahaye gītī nalī nchilū-chilū; nū nene h'ūmo nalī.

²² Angū, a boi Bahebulania? Nū nene h'ūmo nalī. Hamo Baisilaeli? Nū nene chene. Balī ba lūganda lo ng'wa Abulahamu? Nū nene nalī chene.

²³ Balī batūmami ba ng'wa Kilisto? Nahaye gītī natīnīkile ntwe: ū nene na kūkīla ho a henaho! Nghangala ningī no nakūbizaga mu milīmo midito, nū kūtungwa mu jeela naho hingī, nū kūtūlwa naho hingī dūhū, pyī nū kūbiza mu nhabaala ja kūcha!

²⁴ Nghangala itanò nalītūlwa mbooko makūmi adatū na kenda kūfuma kū Bayudaya.

²⁵ Ū kūtūlwa ī milangha nghangala idatū, hama nakapondwa mawe kamò, ū kūtubīla mu nyanza nashisha kadatū. Lūkangala lūngī nakashinga mu būjiba bo nyanza būjikū pe na līīmi tole!

²⁶ Natamalaga ī ng'endo, hama nīyo nghangala ningī nakūbizaga mu kwihīga: kwihīga kūlwa myongo, kwihīga kūlwa biibi, kwihīga kūfuma kū banhū bane, kwihīga kūfuma kū banhū ba mahanga. Pye a hose kwihīga dūhū, ībize mu mizengo, nūūlū kū matogolo, nūūlū mu nyanza, nūūlū kūfuma kū badūgū ba nyalomolomo!

²⁷ Hama nī milīmo īyo nakūtūmamaga nayo midito, nīyo mu makoye mataale. Nghangala ningī būjikū pe, na mu kūkoyiwa notà, hamò na būtuubu kūlwa kūdīla nzala. Nū gwa kūzuuka na kūgayiwa myenda mu shikū ja mbeho nago gūtī ngeni!

²⁸ Hama a higūlya ya mihayo īyo īdūgije kūbonwa yenīyo, nakūsheedekejiagwa nigo gwa kūjilanghana pyī ī kanisa.

²⁹ Nani ūyo alakoyiwe būgokolo nane naleke kūkoya? Nani ūyo alipamiwe nane naleke kūpīnīhala?

³⁰ Ū nene ūlū yūnigeleelwa kwikumīlīja, nakwikumīlīja kūlwa būgokolo bone.

³¹ Ū Mulungu ū Nkumīlījiwa wa welelo na welelo, ū Ise wa ng'wa Seeba wise Yesu Kilisto, amanile gete gīkī natūlomalomaga.

³² Ū mu Damasko nū ng'wene ū ntwale akalagījiwa na ntemi Aleta kūgūlanghana ū nzengo gīkī anidime.

³³ Alīyo nūpīla, nguno nakatūūlwa mu shigabbu nūbītījiwa ng'widilisha lya mu ndugu nichiwa, nūbiza napūlūgūka ū mu makono gakwe.