1 Yohana 4 - Sukuma New Testament 2000

Kwīchagūka myoyo

¹ Batogwa, yaya ū kwizunīlīja na būlī munhū ūyo akūhayaga gīkī alī na moyo gwa kūfuma kūlī Mulungu; alīyo ng'wīgema ī myoyo ng'wabona ūlū īfumile kūlī Mulungu. Nguno ū mu sī baakwīlile no a bahangi a balomolomo.

² Ū moyo ūyo gūfumile kūlī Mulungu mukūgūmana, nguno ū moyo ūyo gūzunije gīkī ū Yesu Kilisto wamala kwiza mu mīlī, h'ūyo gūfumile kūlī Mulungu.

³ Būlī moyo ūyo gūtanzunije ū Yesu gūtafumile kūlī Mulungu; ū gwenūyo gwene gwa Ng'wilwisha wa ng'wa Kilisto, ūyo ng'wang'wigwa kūfuma kale gīkī akwilonga Ng'wilwisha wa ng'wa Kilisto, na nghana ī haha alīho ū mu sī.

⁴ Bing'we baana, a bing'we mulī ba ng'wa Mulungu; nīyo mulī bapyeni nguno ūyo alī hamò ning'we ng'wene ntaale kūtinda ūyo alī mu sī.

⁵ A bene ba mu sī, h'ī chene ī sī īkabadegelekaga, ūlū bayomba ī ya mu sī.

⁶ A bise tūlī ba ng'wa Mulungu; nose ūyo aamanile Mulungu akatwigwaga, alīyo ūyo atī wa ng'wa Mulungu atīko ū kūtwigwa! Ū mu mhayo gwenūyū hū tūkang'witegelejaga ū Moyo wa nghana, nū moyo ū nemba-lembi.

Mulungu ng'wene būtogwa

⁷ Batogwa twitogagwi, nguno ū būtogwa būfumile kūlī Mulungu. Nīyo būlī ng'wene ūyo alī na būtogwa abyalilwe na Mulungu, na hangī aamanile ū Mulungu.

⁸ Ūyo atī na būtogwa ataamanile ū Mulungu, nguno ū Mulungu alī būtogwa.

⁹ Ū Mulungu atoolekegije a bise ū būtogwa bokwe nguno akantūma ū Ng'wana wakwe mu sī, gīkī ū mulī we tūbize bapanga.

¹⁰ Ū wenūbū hū būtogwa, ītī gīkī a bise hū tūntogilwe ū Mulungu, alīyo ū wei h'atūtogilwe a bise; kūshisha nose ūntūma Ng'wana wakwe kwiza kūbiza shitambo kūlwa shibi shise.

¹¹ Badūgū, ū Mulungu ūlū atūtogilwe gīko, na a bise shitwigelilwe kwitogwa benekīlī na benekīlī gīko.

¹² Atīho munhū ūyo wamala kūmona Mulungu ikanza lyose-lyose, alīyo ūlū twitogwa, ū Mulungu akwikala ū mu bise; nū būtogwa bokwe būkūshikīlījiwa ū mu bise.

¹³ Tūmanile gīkī tūkwikalaga mulī we, nū wei ū mu bise, nguno ya ng'wa Moyo wakwe ūyo wamala kūtwinha.

¹⁴ Nīyo tūzunije, na tūkūkaanīlaga gīkī, ū Sīswe wamala kūntūma ū Ng'wana wakwe kūbiza Mpīja wa ba mu sī.

¹⁵ Būlī ng'wene ūyo akūkaanīlaga gīkī ū Yesu alī Ng'wana wa ng'wa Mulungu, ū Mulungu akikalaga mulī we, nū wei ū mulī Mulungu.

¹⁶ A bise tūbūmanile, na tūbūzunije ū būtogwa ūbo Mulungu alī nabo kū bise. Ū Mulungu alī būtogwa. Ū wa kwikala mu būtogwa akwikalaga mulī Mulungu; nū Mulungu akwikalaga mulī we.

¹⁷ Hūna lūūlū ū būtogwa wise a bise būshikanyiwe mu gīko; nose ū mu lūshikū lo kūlamulwa tūtūbiza na booba, nguno ū mu sī tūbizile gīt'ūmo alī ū wei.

¹⁸ Ū mu būtogwa būtīmo booba, alīyo ū būtogwa ūbo būshikanile būkabūpeejaga ū booba, nguno ū booba būlī na nsango, hūna lūūlū ū wa kwikala ogohaga, ū ng'wenūyo ataalī ū kūshikanyiwa ū mu būtogwa.

¹⁹ A bise tūlī na būtogwa, nguno ū Mulungu h'ūyo akandya ū kūtūtogwa a bise.

²⁰ Ūlū munhū ūhaya gīkī, “Nantogilwe ū Mulungu;” alīyo ūbiza ankolilwe ndūgūye, ū ng'wenūyo nomolomo. Nguno ūlū ūlemeelwa kūntogwa ndūgūye ūyo akūmonaga, atūdūla ū kūntogwa ū Mulungu ūyo ataalī kūmona.

²¹ Ī shilagīlo shenīshi twanukūlile kūfuma kūlī we, gīkī ūyo antogilwe Mulungu shiigelile antogwe nū ndūgūye.