1 Yohana 1 - Sukuma New Testament 2000

Mhayo gwa būpanga

¹ Ī jenīji nghūlū ja Mhayo gwa būpanga, ūyo gūlīho kūfuma haho wandījo, ūyo twagwigwile nū kūgūbona tūgūbona na miso gise, nīyo tūgwiloleela; na a makono gise gūgūkuumya.

² Ū būpanga boolechiwe tūbūbona. Hūna lūūlū, a bise tūlī bakaanīji abo tūlīng'wigwīlīja ī ya būpanga bo welelo na welelo, ūbo twamalile koolekejiwa kūfuma kūlī Sīswe.

³ Tūlīng'wigwīlīja ūyo twagūbonile na kūgwigwa, nguno tūtogilwe ning'we mubize na būsangī nise; nīyo ū būsangī wise būlī hamò na Sīswe, nū Ng'wana wakwe ū Yesu Kilisto.

⁴ Hūna lūūlū tūlīng'wandīkīla ī yenīyī gīkī ū būyegi wise būshikane.

Mulungu ng'wene Isana

⁵ Ī nghūlū ījo twajiigwile kūfumīīla kūlī wei h'ījo tūlīng'wigwīlīja ning'we; gīkī, ū Mulungu alī Isana, ū mulī we shitīmo giiti nūūlū shido.

⁶ Ūlū tūhaya gīkī tūlī na būsangī nanghwe, alīyo ū kūnū tūkūshimīzīlaga mu giiti, tūkūbiza balomolomo, numho tūtītaga ya nghana.

⁷ Alīyo ūlū tūshimīzīla ng'wisana gīt'ūmo wei alī ng'wisana, tūkūbiza na būsangī bise benekīlī na benekīlī, hūna a mininga ga Ng'wana wakwe ū Yesu Kilisto gakūtweja twīnge ū mu shibi shise pyī ī shose.

⁸ Ūlū tūhaya gīkī tūtī na shibi, tūkūbiza tūlilemba bise benekīlī na benekīlī, hama numho nī nghana ītīmo ū mu bise!

⁹ Ūlū tūshitambūūla ī shibi shise, ū wei ng'wene nsanyiwa, hangī ntūngīlīja, akūtūlekeja ī shibi shise na kūtweja gete twīnge ū mu būhūbi wise.

¹⁰ Ūlū tūhaya gīkī tūtaalī kwīta shibi, tūkūbiza tūlīnsola ū Mulungu būlomolomo; nīyo numho ū mhayo gokwe gūtīmo ū mu bise.