1 Timoteo 6 - Sukuma New Testament 2000

¹ A basese ni babisaabage a basaabo-būgonzo gīkī bigeleelilwe ikūjo lyose, lītizūdalahwa ī lina lya ng'wa Mulungu, nū būlangi wise.

² Abo balī na basaabo-būgonzo bazunya, yaya ū kūbibengeleja īkī balī badūgū, alīyo ni babatūmamīlage chiza kūtinda. Nguno a bazunya abo bakatūmamaga chiza, bakabizaga na būsangī ū mu solobo īyo īkigelaga, īkī balī baganja. Balangage ī mihayo yenīyī, nīyo ūbakomeleja gete.

Būhūgūji kūlwa malange

³ Ūlū munhū ose-ose wandya kūlanga mihayo yīngī nayo, ūlema kūdimana nayo īyo yideebelile na ya ng'wa Seeba wise Yesu Kilisto, akūbiza wagalemaga a malange a meela.

⁴ Ū ng'wenūyo ndalahi, na atamanile mhayo gose-gose. Alī na makoye ga būhalalī na būyombi bo mihayo īyo īkenhelejaga wilu, wilemeelwa, būgayīlīja, kwitīng'wa kwabūbi,

⁵ na wiyugagūji bo shikū jose ū mu banhū abo bahūganile masala, abo baamala kwījimīīja ī nghana, nose bakiganikaga gīkī ū wela īlī nzīla ya kūpandīkīla solobo!

⁶ Na nghana ī chene ū mu wela īlīmo solobo nhaale, ūlū munhū ūzunya kwigelwa nī shikolo īsho alī nasho.

⁷ Nguno ū mu sī ūmu tūtizile na shikolo, nose tūtīko kwīnga na shose-shose.

⁸ Alīyo ūlū tūpandīka shilīwa na shizwalo, tūkūbiza twapandīkaga īsho shitwigelile.

⁹ Īkī abo bakakoobaga būsabi bakagwīlaga mu būgeng'wa na mu mbeto, na mu kwikūmva kwa nyachilū-chilū kwa būlī mbika ja nyakenaagūji, mihayo īyo īkabenhelejaga banhū kūjimīlīla mu kwihīga kūtaale, nose kūshika mu kūyagala!

¹⁰ Nguno ū kūtogwa sabo īlī mbūūkī ya mihayo ya būbi wa būlī mbika, bangī balīho bakwīngaga ū mu kūzunya kūlwa kūgūhahaalīla ū mhayo gwenūyo, nose bakwiyenhelejaga kūkenaagūka, kūlwa kūgwīla mu makoye mingī ga kūpīnīhaja!

Kalwīīle ka nyazunya

¹¹ Alīyo ū bebe munhū o ng'wa Mulungu, īpeelage ī yenīyo; londeelaga būtūngīlīja, wela, kūzunya, būtogwa, wiyūmīlīja na būfula.

¹² Lwaga kalwīīle kawiza ka mu kūzunya; būlanghanage ū būpanga bo welelo na welelo ūbo ūkitanīlwa aho ūkafunya būkaanīji būsoga kū būtongi wa banhū bingī.

¹³ Nalīkūkomeleja kū būtongi bo ng'wa Mulungu, ūyo alī ng'winhi wa būpanga kū shose īsho shilī na būpanga; na kū būtongi bo ng'wa Kilisto Yesu, ūyo akafunya būkaanīji wawiza kū būtongi bo ng'wa Pontio Pilato.

¹⁴ Shihandatīlage ī shilagīlo shenīshi, yaya gete ū kūshileka nūūlū hado. Ūtizūbiza na shilingo, kūshisha līshike ī likanza lya kwilonga kwa ng'wa Seeba wise Yesu Kilisto.

¹⁵ Ū mhayo gwa kwilonga kwakwe akūgūshikīlīja ng'wikanza īlo līhelilwe na Mulungu, ūyo we wike alī nkumīlījiwa wa būdūla bose; Ntemi wa batemi na Seeba wa baseeba.

¹⁶ Hū ng'wene ūmò we wike, ūyo atī wa kūcha, na apīndiwe būng'weku ūbo būtī bo kwegeelwa. Ataalī kūbonwa na munhū nūūlū ūmò, na hangī atīho wa kūmona na hado yaya. Ikūjo na būdūla shibize kūlī we welelo na welelo: Alichene.

¹⁷ A basabi ba ng'wikanza īlī bahūgūlage batizūdoosa, nūūlū batizūtūūla kwisagīlwa kwabo ha būsabi ūbo būtī wa kūshinga ho; alīyo bang'wisagīlwe Mulungu, ūyo akatwinhaga shikolo shose mu wila gīkī tūshiyegele.

¹⁸ Baganikīlage babize bīīti ba mihayo yawiza, babize basabi mu shītwa shawiza, bazunye kūyūgabīla na bangī ī shikolo; babize biza-ngholó.

¹⁹ Ū mu kwīta gīko bakūbiza balibīkīla sabo boi benekīlī, bakūbiza balītūūla nsingi gwawiza kūlwa shikū ījo jiliza kū būtongi, balanukūle būpanga bo nghana.

²⁰ Bebe Timoteo, shilanghanage gete īsho ūbīkījiwe; lekanaga nayo ī mihayo ya malofu, ī midūhū na ya halalī; īyo īkakumīlījiagwa gīkī ya nyamani, alīyo gūtīmo nū gwa kūsola.

²¹ Balīho bangī bakūtalaga bīnga ū mu kūzunya bayūshimīzīla muyo. Shigongo shibize hamò nangho: Alichene.