1 Timoteo 5 - Sukuma New Testament 2000

Mihayo īyo shiigelile kūbīītīla banhū

¹ Ū munhū ūlū namhala, ntongage mu kwidohya n'ikūjo gītī so. A basūmba lūngalūngaga nabo gītī baana bang'wing'we.

² A bagikūlū gītī banoko, lelo a bashīke gītī balūmbūyo mu wela bose.

³ A bachīlwa abo batī na munhū wa kūbagunaana, ūbagunaana.

⁴ Ū nchīlwa ūlū alī na baana nūūlū bizūkūlū, a benaba ni bilangage tame kūjīītīla yawiza ī kaya jabo, bayūbīītīla yawiza a bataale babo, nguno ū mhayo gwenūyū gūzunīlījiwe nū Mulungu.

⁵ Alīyo ū nchīlwa ūyo atī na wa kūngunaana gete, ū ng'wenūyo antūūlīlile Mulungu pyī ū kwisagīlwa kwakwe makanza gose; līīmi na būjikū akadīlaga mu kūlomba na kūlombela.

⁶ Kwike ū nchīlwa ūlū akikalaga mu mihayo ya kūyeja mīlī gokwe dūhū, ū ng'wenūyo achīle nūūlū īkī akweshemaga!

⁷ Nī yenīyī balangage, batizūgwa mu būbi.

⁸ Hama ūlū alīho munhū atabalonjaga a banhū bakwe, ī no-no-no a ba mu kaya yakwe, ū munhū ng'wenūyo abūdalahile ū būzunya bokwe, nīyo alī wabūbi kūtinda ūyo atī nzunya.

⁹ Ū nchīlwa atizūtūūlwa ū mu shitabo sha bachīlwa ūlū ataalī kūshisha myaka makūmi atandatū, nīyo abize walī nke wa ngosha ūmò dūhū.

¹⁰ Hangī nīyo ū nchīlwa abize akūkaanīlagwa gīkī alī na shītwa shawiza mu mihayo gītī ya kūlela baana, kūgunaana bageni, kooja mhambala ja beela, kūgunaana baluhi; abize nondeeji wa būlī mhayo gwawiza.

¹¹ Alīyo a bachīlwa abo bataalī bashīke, balemage a benabo; nguno ū kwikūmva kwabo ūlū kūbaheeba bashikile kwīnga ū mu kwifunya kwabo ū kūlī Kilisto, bikūmva būtoolwa.

¹² Ū mu gīko bakūgwa mu nsango, kūlwa nguno ya kūlekana nū kūzunya kwabo ū kwa kwandya.

¹³ Nguno nīyo ū mu gīko bakwilanga boolo, būyikala bakūsīngījaga mu kaya ja banhū. Hama batūgelela ha mhayo gwa boolo dūhū, alīyo bakūbiza basīgani na bishatya-shatya, hangī bakalomo-njoocho.

¹⁴ Hūna lūūlū natogilwe a bachīlwa a bashīke bayūtoolwa, babize banisaale, babyale baana. Yaya ū kūng'winha ng'wanya gwa kūtūsondagūla ū ng'wanishi.

¹⁵ Nguno nīyo nī haha balīho bamò bamala kūgalūka būbiza balondeeji ba ng'wa Shetani.

¹⁶ Ūlū alīho nshīke alī na bachīlwa ni abagunaanage, atizīseseja nigo ī kanisa. Ī kanisa ībagunaane a bachīlwa abo batī na wa kūbagunaana.

¹⁷ A banamhala, abo bamanile kūsuga, shiigelile binhwe ikūjo idito ho, ī no-no-no abo bakwītaga nīmo gwa kūlomeela na kūlanga.

¹⁸ Nguno ī shandīkwa shihayile gīkī, “Ī ng'ombe ūlū īlīīta nīmo gwa kūtūla būsīga, yaya ū kwītunga ū kū nomo gwayo” na gīkī, “Ū ntūmami shing'wigelile kūpandīka mheela yakwe.”

¹⁹ Yaya ū kwanukūla būbūūlwa bo namhala, ūlū batigelile bakaanīji babīlī nūūlū badatū.

²⁰ Ūbahūgūla hape-hape abo balī mu nhūngwa ja shibi, babize na logohano a bangī.

²¹ Nalīkūtonga mu welwa-ngholó kū būtongi bo ng'wa Mulungu na bo ng'wa Kilisto Yesu, na kū būtongi bo bamalaika basolwa; balangage chiza ī mihayo yenīyī, hama yaya ū kūfumaasī wafunyaga būlamuji, na hangī yaya ū kūbiza na būsolanhya.

²² Hama yaya ū kūtūūlīla makono munhū wangū-wangū, nīyo yaya ū bebe ū kwisangīja mu shibi sha banhū; alīyo ilanghanage wikale ūlī ng'wela.

²³ Oyaga ū kūgelela kūng'wa minzī dūhū, bizagūng'wa na divai ya malīngīīla, kūlwa nguno ya makoye gako ga mu nda, pye na a gangī ayo gakikalaga gūkūshokela gwa-gwa-gwa būlī makanza.

²⁴ Ī shibi sha banhū bamò shilī ha ng'wape, nīyo shibatongeelile ū kūja ū mu nsango; alīyo ī sha bangī shilīho a ha numa yabo shibalondeelile.

²⁵ H'ūmo īlī nū mu milīmo ī yawiza, nayo īlī ha ng'wape, nī yīyo ītaalī ū kūmanīka nayo ītikala ībisilwe makanza gose.