1 Timoteo 4 - Sukuma New Testament 2000

Shikū ja kū būkalīkījo

¹ Alīyo ū Moyo akūkaanīlaga hape gīkī, ū kū shikū ja kū būkalīkījo bangī bakūkūleka ū kūzunya, bayūshimīzīla mu malange ga masamva na myoyo ya kūjimīīja,

² mu wibeeleja wa banhū balemba-lembi na bagūnu, abo wiyangūji bo mu ngholó jabo botīndīhala, bobiza gītī būchuumīlījiwe chūma sha moto.

³ Bakūyūlemeja na mihayo gītī ya witooji, nūūlū kūlya shilīwa īsho shibeejiwe na Mulungu, gīkī shanukūlwe mu būyegi na a bazunya abo bayīdeebile ī nghana.

⁴ Nguno būlī shiseeng'wa sha ng'wa Mulungu shilī shawiza; shitīho sha kūponyiwa ū mu shose īsho shikanukūlagwa mu kūlūmba.

⁵ Ī shose shikeejiagwa na mhayo go ng'wa Mulungu na kūlomba.

Ntūmami akūlile mu kūzunya

⁶ Ūlū ūboolekeja a badūgū ī mihayo yenīyī ūkūbiza ntūmami wa ng'wa Kilisto Yesu, ūyo akūlile mu mihayo ya kūzunya na ya malange gawiza, ayo ūkūgalondeelaga.

⁷ Alīyo būlemage pyī ū būsoso, nī ngano ja nyagikūlū; ū bebe imanīlījage mu mihayo ya wela dūhū.

⁸ Nguno nghana ī chene īlīho solobo ū kūgūmanīlīja ū mīlī kūtūmama, kwike ītī nhaale. Alīyo ū wela būlī na solobo mu būlī mhayo, hangī būlī na kwisagīlwa ū mu būpanga bo haha, nū ng'wikanza īlo līliza.

⁹ Ū mhayo gwenūyū gūlī gwa nghana, na gwigeleelilwe kūzunyiwa.

¹⁰ H'ī nguno yene tūkūtūmamaga mu wiyūmīlīja būtaale kūgūlwīlīla, īkī ū kwisagīlwa kwise tūntūūlīlile Mulungu mpanga, ūyo alī mpīja wa banhū bose; ī no-no-no a bazunya.

¹¹ Balagīlage na kūbalanga ī mihayo yenīyī;

¹² atizigela nūūlū ūmò wa kūbūdalaha ū būdinha wako. Ū bebe boolekejage būlolelo a bazunya, ū mu kalūngalūngīle nū mu kashimīzīle, nū mu būtogwa; pye nū mu kūzunya, nū mu wela.

¹³ Gūdīlīlage ū mhayo gwa kūbasomela a banhū ī shandīkwa, ūbakomeleja na kūbalanga kūshisha aho nalize ko.

¹⁴ Yaya ū kūshilekanīja ī shakwinhwa īsho ūlī nasho, īsho ūkinhwa mu nzīla ya būhangi na kūtūūlīlwa makono ga banamhala.

¹⁵ Ī mihayo yenīyī īgoyelage, hangī wifunye gete kūlwa nguno yayo; ūboolekeja hape pye a banhū ī nhūngwa ja kashimīzīle kako.

¹⁶ Hama ū bebe ng'wenekīlī ilanghanage, pyī nī yīyo ūkwīlangaga. Handatīlaga mo ū mu mihayo yenīyo, nguno ūlū wīta gīko hū ūkwipīja ū bebe, pye na a badegeleki bako!