1 Petro 2 - Sukuma New Testament 2000

Iwe ipanga n'ihanga isolwa

¹ Hūna lūūlū lekanagi nayo ī yabūbi nī ya būkūng'ūnhi, nū wibeeleja, nū wilu, nū būsīgani bo mbika jose, ū bo kwisondagūla mu mbisīla.

² Bizagi gītī baana beleele, mukūmbūle no-no-no kūpandīka mabeele masoga, ayo gadūgije kūmugunaana kūkūla ū mu būpīji.

³ Nguno ng'wamalile kūbūloja ū wiza bo ng'wa Seeba;

⁴ ng'washikile ū kūlī we, ūyo alī Iwe ipanga, īlo banhū balīdalahile, alīyo ū kūlī Mulungu isolwa, hangī lya mpango ntaale.

⁵ Na a bing'we ī haha mulī gītī mawe mapanga, ayo gakūzengagwa kūbiza numba ībeejiwe mu kazengele ka ng'wa Moyo, ng'wingīle mu būgabīji wela kūlwa kūntūmamīla Mulungu mu katongeelelwe ka ng'wa Moyo, ako kazunīlījiwe mulī Yesu Kilisto.

⁶ H'ī nguno yene nū mu shandīkwa gūlīhaya gīkī, “Lolagi nalīntūūla ū mu Sayuni, ūyo alī Iwe isolwa na lya mpango ntaale, lya kwīgoloolela ī numba; ūyo ūnsanya atūding'wa minala na hado yaya.”

⁷ Hūna lūūlū, ū kū bing'we a bazunya alī wa mpango ntaale, alīyo ū kū banhū abo batī bazunya, “Ī Liwe īlo līdalahilwe na bazengi, lyabizile lya kwīgoloolela ī numba.

⁸ Hangī nīyo ū wei alī Iwe lya kwipamya, na shiganga sha kūgwisha.” Bakwipamaga nguno batatogilwe ū kūgūlondeela ū mhayo, īkī batūūlilwe ho kūlwa mhayo gwenūyo!

⁹ Alīyo a bing'we mulī būbyīle būsolwa, būgabīji bo nyatemi, ihanga lyeela, banhū bakwe ba wikomangīle, kūlwa kūkumūcha wiza bokwe ūyo wang'witana kūfuma mu giiti kwingīla ng'wisana lyakwe īlo līlī na wiza būkīlanīgije.

¹⁰ A bing'we ī kale ng'walī mutī banhū, alīyo ī haha mulī banhū ba ng'wa Mulungu; ng'walī mutachīlilwe shigongo, alīyo ī haha muchīlilwe shigongo.

Nhūngwa ja batūmami ba ng'wa Mulungu

¹¹ Batogwa nalīng'wikūmbīlīja gītī bashimīzi na bageni, īpeelagi pyī ī mihayo ya kwikūmva kwa mīlī, īyo īkwilwishaga na ngholó jing'we.

¹² Bizagi na kashimīzīle kawiza ū kū būtongi bo banhū abo batamanile Mulungu, ībize nūūlū balīmuhaya kībi gīkī mulī bīīti ba mihayo yabūbi, alīyo ū mu kūshibona ī shītwa shing'we ī shawiza balankumīlīje Mulungu, ū mu lūshikū lo kūsangwa.

¹³ Hūna lūūlū, bizagi bidohya ū kū būtongeeji bo mbika jose ūbo būtūūlilwe na banhū, kūlwa nguno ya ng'wa Seeba; ū ntemi nkūjagi īkī munhū ntaale.

¹⁴ Na a basugi a bangī bakūjagi, īkī balagīlilwe kūmala shiilī kūlwa bakenaagūji, na kūbakumīlīja a batūngīlīja.

¹⁵ Nguno ū būtogwa bo ng'wa Mulungu būlī kwīta yawiza; ū mu gīko būkūhuumūjiwa ū būchilū-chilū bo banhū abo batī na būmani.

¹⁶ Shimīzagi gītī banhū abo balī mu wiyabī, alīyo ū wiyabī wing'we yaya ū kūbūtūmamīla kūbisa yabūbi; ū mu shīmīle shing'we iyoolechagi gīkī mulī batūmami ba ng'wa Mulungu.

¹⁷ Bakūjagi pye a banhū, būtogagwi ū būdūgū, ng'ogohagi ū Mulungu, ū ntemi nkūjagi.

Kwilanga mu nzīla ya būluhi bo ng'wa Kilisto

¹⁸ A bing'we batūmami bizagi bidohya mu logohano lose ū kū banhū abo mukūbatūmamīlaga, ītī kū bawiza na balyehu dūhū, alīyo nū kū biboneeji.

¹⁹ Nguno gūlī mhayo gwa kūkumīlījiwa ūlū munhū wiyūmīlīja mu makoye aho akūluhiagwa mu kwiboneelwa, alīyo alīnsanya Mulungu.

²⁰ Angū, ī gīsī būlīho wiza kī ū kwiyūmīlīja ūlū mulītūlwa mapī kūlwa nguno ya būkenaagūji? Alīyo ūlū ng'wiyūmīlīja ū mu būluhiwa ūbo mukūluhiagwa kūlwa nguno ya kwīta yawiza, ū mhayo gwenūyo gūlī gwa kūlūmbīlījiwa ū kūlī Mulungu.

²¹ A bing'we ng'witanwa kūlwa mhayo gwenūyo, īkī nū Kilisto nanghwe akaluha kūlwa nguno ying'we; ūmulekela būlolelo, mulondeele a kashimīzīle kakwe.

²² Ū wei atīītile shibi shose-shose, nūūlū būlomolomo būtafumile ū mu nomo gokwe.

²³ Akasondagūlwa, alīyo atashokije mhayo gose-gose gwa būsondagūji. Nūūlū aho waluhiagwa nahene atahayile mihayo ya kogohya, alīyo akiyinha kūlī we ū Namuji Ntūngīlīja.

²⁴ Wei ng'wenekīlī akashibūūcha ī shibi shise mu mīlī gokwe ha līntī, gīkī tūche ū mu shibi, alīyo ū mu būtūngīlīja tūbize bapanga; mukūpījiagwa mu nzīla ya magulagīje gakwe.

²⁵ Nguno ī kwandya ng'walī gītī ngholo jijimīīlile; alīyo ī haha ng'wanshokelile ū Ndīīmi, ūyo hangī alī Nanghani wa būpanga wing'we.