1 Batesalonike 4 - Sukuma New Testament 2000

Nhūngwa ījo jinyegije Mulungu

¹ Hūna lūūlū badūgū, ū gwa kūmalīja gūlī gīkī, tūlīmulomba na kūng'wikūmbīlīja mulī Seeba Yesu, mushimīzīle mu nhūngwa ja kūnyeja Mulungu, gīt'ūmo mukanukūlīla kūfuma kū bise. Shimīzagi gīko, nīyo jangīīlagi no-no-no.

² Mukamanile a kahūgūlīle ako tūkang'winha mulī Seeba Yesu.

³ Nguno ū būtogwa bo ng'wa Mulungu būlī gīkī ng'wejiwe, ng'wīnge ū mu būjingi.

⁴ Būlī ūmò wing'we amane ū kūgūlanghana ū mīlī gokwe mu wela n'ikūjo.

⁵ Ītī mu kwikūmva kwa nyahahaalīzu gīt'ūmo balī banhū ba mahanga, abo bataamanile Mulungu.

⁶ Atizigela munhū wa kūnghūnga ng'wiye ū mu mhayo gwenūyo, nguno ū maji wa shiilī ū mu yose yenīyī alī Seeba, gīt'ūmo tūkamuwīlīla hape kūfuma haho wandījo.

⁷ Īkī ū Mulungu atatwitanile a bise gīkī twingīle mu būsoso, alīyo kwingīla mu wela.

⁸ Hūna lūūlū ūyo alayīleme ī yenīyī atūlemaga ya ng'wa munhū, alīlema ya ng'wa Mulungu ūyo wang'winha a bing'we Moyo Ng'wela wakwe.

⁹ Kwike ī mihayo ya kitogelwe ka nyadūgū, natī na nguno ya kūng'wandīkīla ī yene, nguno a bing'we benekīlī ng'wamala kūlangwa na Mulungu ū kwitogwa.

¹⁰ Īkī ī mihayo yenīyo mukūbīītīlaga na kale pye a badūgū ba mu Makedonia ī yose; kwike badūgū tūlīng'wikūmbīlīja ng'ongeje na kūtinda ho.

¹¹ Hangī gemagi no-no-no ū kwilanghana, būlī munhū ayūbeeja milīmo yakwe, ng'ūtūmama na makono ging'we gīt'ūmo tūkamuwīlīla.

¹² Ū mu gīko hū mukūdūla kūgoloola a kashimīzīle ū kū banhū abo balī hanze ya kūzunya; nīyo mutūgwa nū mu makoye ga būgayiwa.

Kwiza kwa ng'wa Seeba

¹³ Ali lūūlū badūgū, tūtatogilwe ng'wikale mutīmanile ī mihayo ya banhū abo balaalile, nguno tūtatogilwe mupīnīhale gīt'ūmo balī a bangī, abo batī na kwisagīlwa.

¹⁴ Īkī tūzunije gīkī ū Yesu akacha na kūjūūka, h'ūmo akūbīītīla ū Mulungu na a babo balaalile mulī Yesu, akūbenha hamò nanghwe.

¹⁵ Leki tūmuwīle ūmo gūlī gete ū mhayo go ng'wa Seeba ng'wenekīlī; gīkī, a bise abo tūkūsangwa tūlīho a h'ikanza lya kwiza kwa ng'wa Seeba, tūtūbatanga abo balaalile.

¹⁶ Nguno ū Seeba ng'wenekīlī akwiza kūfuma ng'wigūlū n'ilaka itaale lya kūlagīla, ilaka lya ng'wa malaika ntaale, n'ipembe lya ng'wa Mulungu; hūna abo baachīla mulī Kilisto bakūtonga ū kūjūūka.

¹⁷ Ha numa nise abo tūkūsangwa tūtaalī tūlī bapanga, tūkūhwehulwa hamò nabo tūje mu malunde kūjūmanhīja kwigūlya nū Seeba. Hūna tūkwikala nanghwe ū Seeba welelo bose.

¹⁸ Na lūūlū ng'wilūngūja mu mihayo yenīyī.