1 Batesalonike 3 - Sukuma New Testament 2000

¹ Nose īkī tūkalemeelwa ū kwiyūmīlīja, tūkabona īlī hambū-hambū nūūlū kūlekwa iyene ī Atene.

² H'ī nguno yene tūkantūma ū ndūgū wise ū Timoteo, ūyo alī ntūmami wa ng'wa Mulungu kūlwa Nghūlū Jawiza ja ng'wa Kilisto, ize ko amujaamye na kūmulūngūja ū mu kūzunya kwing'we;

³ atizigela nūūlū ūmò wing'we wa kūtala kūlwa būluhiwa wenūbū. Nguno a bing'we benekīlī mumanile hape gīkī shitwigeleelilwe kūluhiwa.

⁴ H'ūmo tūkamuwīla kūfuma haho wandījo aho twalī ning'we, gīkī tūlī hihī kwingīla mu būluhiwa; na nghana īkaja chene gīt'ūmo mumanīlile.

⁵ Hūna lūūlū ū nene īkī nakaduuma ū kwiyūmīlīja, nakabona natūme munhū, namane ūmo mulījīla ū mu kūzunya kwing'we; atizūbiza wamugemile ū ngemi, gūbize gwachile mpandagīlo ū nīmo gwise.

⁶ Alīyo ī haha ū Timoteo wamalile kūshoka kūfuma ū kū bing'we, ī nghūlū ja būzunya nū būtogwa wing'we ījo watwenhelile jilī jawiza no, nīyo ūtūwīla nū gwa gīkī būlī gwa mukūtwizūkagwa; na hangī mulī na nghūmbū ja kūtūbona gīt'ūmo na a bise tūlī na nghūmbū ja kūmubona a bing'we.

⁷ Nose badūgū, aho twajiigwa ī mhola ja kūzunya kwing'we twalūngūjiwe no ū mu būpīna wise, na a makoye ayo gakatūgwīla kūlwa nguno ying'we.

⁸ Īkī ī haha hū tūlī bapanga, ūlū ng'ūhandatīla kwīmīīla ū mulī Seeba.

⁹ Nguno hīmba tūkūnūmba na kalūmbīle kī ū Mulungu wise, ū mu būyegi ūbo tūlī nabo kū būtongi bokwe kūlwa nguno ying'we!

¹⁰ Līīmi na būjikū tūkūlombaga na būjangīīzu būtaale gīkī tūmubone ū būshū wing'we, tūmugoloolele īyo īligoma-goma ū mu kūzunya kwing'we.

¹¹ Ali lūūlū ī haha ū Mulungu Sīswe ng'wenekīlī, nū Yesu Seeba wise, leka atūtonge ī nzīla ya kwiza ūko mulī.

¹² Na a bing'we, ū Seeba ang'winhe kūbiza na būtogwa wingī bo kūseesekela na kūseesekela, ng'witogwe a bing'we benekīlī, pye na a banhū a bangī, gīt'ūmo tūkwītīlaga a bise ū kū bing'we.

¹³ Amushikanye ū mu ngholó jing'we, ū ng'wikanza lya kwiza kwa ng'wa Seeba wise Yesu hamò na beela bakwe bose, musangwe mulī beela mutī na shilingo ū kū būtongi bo ng'wa Mulungu Sīswe.