1 Batesalonike 2 - Sukuma New Testament 2000

Nīmo go ng'wa Paulo mu Tesalonike

¹ Nguno a bing'we badūgū mumanile gīkī ū kwiza kwise ū kū bing'we kūtagelelile kūbiza kwa dalali.

² Mumanile gīkī aho twalī mu Filipi twalī na makoye no, na gīkī twasondagūlagwa kībi no. Alīyo nahene nūūlū īkī twalī mu makoye mingī, twalī na būshisha-ngholó kūfuma kūlī Mulungu wise; h'ī nguno yene tūkamulomeela ū mhayo gokwe.

³ Nguno ū būganikīji wise būtī mu nyalemba-lembi nūūlū mu būsoso, nūūlū mu nyasala-sala.

⁴ Alīyo īkī ū Mulungu akatūbona gīkī twigeleelilwe kwinhwa nīmo gwa kūlomeela Nghūlū Jawiza, h'ūmo tūkūhayīlaga. Ītī gītī bayeja ba banhū, alīyo ba kūnyeja Mulungu, ūyo akabonaga mu ngholó jise.

⁵ Nguno a bing'we mumanile gete, nīyo nū Mulungu nkaanīji wise, gīkī aho twalī kū bing'we tūtatūmamīlile mihayo ya kūlaalīkīja banhū, nūūlū tūtikūmbilwe shikolo shose-shose mu mbisīla.

⁶ Twalī tūtakoobaga ikūjo kūfuma kū banhū, ībize kūfuma kū bing'we nūūlū kū bangī.

⁷ Na nghana twalī tūdūgije kūmubuna, nguno tūlī batūng'wa ba ng'wa Kilisto. Alīyo twalī bidohya ū kū bing'we gīt'ūmo neji akadīlīlaga baana bakwe.

⁸ Hūna lūūlū īkī twalī tūmusaatilwe no-no-no gīko, tūkayega ū kūng'winha, ītī Nghūlū Jawiza ja ng'wa Mulungu dūhū, alīyo nū būpanga wise gete, īkī mukabiza batogwa bise.

⁹ Nguno badūgū izūkagwi ūmo twatūmamīlaga, nū mumo twanogelaga; twatūmamaga līīmi na būjikū, gīkī tūtizūmuna nūūlū ūmò wing'we, ū ng'wikanza lya kūmulomeela ī Nghūlū Jawiza ja ng'wa Mulungu.

¹⁰ A bing'we benekīlī mulī bakaanīji, nū Mulungu nkaanīji, gīkī ī shimīzīle yise ū kū bing'we a bazunya yalī ya banhū beela na batūngīlīja, abo batī na shilingo.

¹¹ Mumanile gīkī kū būlī ng'wene ū mu bing'we twalī gītī munhū na baana bakwe.

¹² Twamuganikīlaga na kūmutimbya ngholó na kūmuhūgūla, gīkī mushimīze gītī banhū abo bigeleelilwe koolecha ikūjo lya ng'wa Mulungu, ūyo wang'witana kwingīla ng'wikūjo na mu būtemi bokwe.

¹³ Hūna lūūlū a bise nise tūtaalī ū koya ū kūnkumīlīja ū Mulungu. Nguno aho mukagwanukūla ū mhayo go ng'wa Mulungu ūyo mukagwigwa kūfuma kū bise, mutagwanukūlile gītī mhayo gwa banhū, alīyo mukagwanukūla gīt'ūmo gūlī nghana, mhayo go ng'wa Mulungu. Ū mhayo gwenūyo h'ūyo gūkūtūmamaga ū mu bing'we abo mulī bazunya.

¹⁴ Nguno a bing'we badūgū yang'wilongelile īyo īkūbilongelaga ba mu kanisa ja ng'wa Mulungu, ījo jilī mulī Kilisto Yesu, ī ja mu sī ya Būyudaya. Nguno na a bing'we mukaluhiwa na banhū b'ihanga ling'we, mu mihayo gītī īyo bakūluhiagwa nabo ū ng'wihanga lya Bayudaya;

¹⁵ abo bakamūlaga Seeba Yesu na bahangi, nīyo na a bise bakūjaga būtwayīga būlī kwene. Batī na gwa kūnyeja Mulungu, na hangī batī na būsangī na banhū bose.

¹⁶ Batatogilwe tūje tūkūbalomeelaga a banhū ba mahanga, nguno batatogilwe bapījiwe. Bakūshishikīlījaga gwa ī shibi shabo; kwike nose ū būpelanu bo ng'wa Mulungu wabidīkīlile.

Paulo kūkūmbūla kūbabona hangī

¹⁷ Alīyo badūgū, a bise aho twalekanyiwa ning'we ikanza ido ū mu mīlī, ītī mu ngholó, tūkabiza na nghūmbū ningī no ja kūmubona ū būshū wing'we.

¹⁸ H'ī nguno yene tūkakooba no-no-no kwiza ūko mulī; nīyo ū nene Paulo ng'wenekīlī nakashisha nghangala ja kūshika ibīlī gīko nalīgema, alīyo ū Shetani akatūhangīja.

¹⁹ Ī gīsī ūlū ītī bing'we, numho ū kwisagīlwa kwise kūkūfuma he hangī, nū būyegi wise nī ngikili ya kūyegela ū kū būtongi bo ng'wa Seeba wise Yesu ūlū ūshoka?

²⁰ Nguno a bing'we hū mul'ikūjo lise, na būyegi wise.