1 Bakolinto 9 - Sukuma New Testament 2000

Īyo īng'wigeleelilwe ntūng'wa

¹ Ī gīsī ū nene natī ntungūlwa? Nūūlū natī ntūng'wa? Ū nene natamonile ū Yesu Seeba wise? A bing'we mutī nīmo gwane ū mulī Seeba?

² Nūūlū nakabiza natī ntūng'wa ū kū bangī, alīyo ū kū bing'we h'ūmo nalī, nguno a bing'we mulī lūmengho lwa nīmo gwa būtūng'wa bone ū mulī Seeba.

³ Ī lyenīlī h'ī lishosho lyane ū kū banhū abo bakūnibūgīlījaga.

⁴ Angū, a bise tūtī nabo ū būdūla bo kūlya na kūng'wa?

⁵ Tūtadūgije kūtoola nkīma nzunya wa kūja nanghwe būlī kwene, gīt'ūmo bakwītīlaga a batūng'wa a bangī, na a bazunaye ba ng'wa Seeba, pyī nū Kefa?

⁶ Nūūlū hamo nalī nene na Balinaba dūhū abo tūtī nabo ū būdūla bo kūleka kūtūmama?

⁷ Ī gīsī nshilikale kī ūyo akilishaga wei ng'wenekīlī ikanza lyose-lyose? Nūūlū munhū kī ūyo akahambaga nzabibu alīyo ūleka ū kūlya a matwajo gago? Na hangī nani ūyo akadīīmaga mitugo alīyo a mabeele yaya ū kūgang'wa?

⁸ Nūūlū hamo ī yenīyī nalihayīla nene dūhū kūlwa būmunhū bone? Tūhaya nī shilagīlo h'ūmo shihayīlile?

⁹ Nguno ū mu shilagīlo sha ng'wa Musa handīkilwe gīkī, “Ī ng'ombe ūlū īlītūmama nīmo gwa kūtūla būsīga, yaya ū kwītunga ū kū nomo gwayo.” Hū kūhaya ū Mulungu akūdīlīlaga mihayo ya ng'ombe,

¹⁰ nūūlū alīhaya kūlwa nguno yise? Īlī kūlwa nguno yise, īkī ū nīmi shing'wigeleelilwe alīme mu kwisagīlwa kwa kūpandīka matwajo; pyī nū ntūji wa būsīga nanghwe gīko.

¹¹ A bise ūlū tūkahamba shikolo sha shiimoyo ū mu bing'we, gūlīkūla no ū gwa kūpandīka shikolo sha mīlī ū kūfuma ū kū bing'we?

¹² Ūlū īlīdūlīkana a bangī kūpandīka ngabo ū kūfuma ū kū bing'we, nibūlī a bise tūtizūpandīka na kūtinda ho? Kwike dūhū ū būdūla wenūbo tūtabūtūmamīlile, tūkwiyūmīlījaga mu mihayo yose, gīkī tūtizūntūūlīla munhū ose-ose mhayo gwa kūng'wipamya ū kū Nghūlū Jawiza ja ng'wa Kilisto.

¹³ Mutamanile gīkī abo bakatūmamaga mu hekalu bakalyaga sha mu hekalu? Nī gīkī abo bakatūmamaga ha ng'walīlo nabo bakapandīkīlaga ha ng'walīlo henaho?

¹⁴ H'ūmo ahelelile ū Seeba nū kū balomeeji ba Nghūlū Jawiza, gīkī nabo bayūpandīkīla ng'wenūmo ī shiigunaanīlo sha mu būpanga wabo.

¹⁵ Alīyo ū nene nataalī ū kwītūmamīla nūūlū kamò ī mihayo yenīyo. Hama nī yenīyī natūyandīkaga gīkī ng'wandye kūnīītīla ī mihayo yenīyo, nguno īlī hambū-hambū ū nene nache kūtinda munhū ose-ose kūgūkenaagūla ū mhayo ūyo nagūyegelile gwenūyū.

¹⁶ Ū nene natī na gwa kwikumīlīgīja ū mu nīmo gwa kūjilomeela ī Nghūlū Jawiza; nguno nahadīkilwe. Ūlū nūleka ū kūjilomeela ī Nghūlū Jawiza nakūgwīlwa makoye ū nene ng'wenekīlī!

¹⁷ Nguno ūlū nūjilomeela kūlwa kūtogwa nene ng'wenekīlī numho nalī na mheela, alīyo ūlū ītī kūlwa būtogwa bone, numho hū kūhaya nabilisīlilwe sabo ya bangī.

¹⁸ Ali lūūlū ī mheela yane īlī kī? Īlī gīkī, ū mu kūjilomeela ī Nghūlū Jawiza najifunye dalali, natizūtūmama mu kwisagīlwa kwanukūla shikolo īsho nigeleelilwe kūshanukūla kūlwago ū nīmo gwa kūjilomeela ī Nghūlū Jawiza.

¹⁹ Ū nene nghana ī chene nalī mu wiyabī kū banhū bose ūmo bagelelile, alīyo nitūūla ha sīlīlī ya būsese wa banhū bose, gīkī nabapandīke banhū bingī.

²⁰ Ū kū Bayudaya nalī gītī Nyudaya, gīkī nabapandīke a Bayudaya. Ū kū banhū abo balī ha sīlīlī ya shilagīlo, nakūbizaga gītī nalī ha sīlīlī ya shilagīlo, gīkī nabapandīke abo basugilwe na shilagīlo; (nūūlū īkī ū nene ng'wenekīlī natasugilwe na shilagīlo).

²¹ Nū kū banhū abo batī na shilagīlo, nakūbizaga gītī natī na shilagīlo, gīkī nabapandīke abo batī na shilagīlo, (alīyo h'ītī gīkī natī na shilagīlo ū kūlī Mulungu, ū nene ng'wenekīlī nalī ha sīlīlī ya shilagīlo sha ng'wa Kilisto).

²² Ū kū bagokolo nakūbizaga ngokolo, gīkī nabapandīke a bagokolo; nakūbizaga mu mbika jose kū banhū bose, gīkī bamò na bamò nabapandīke.

²³ Pyī ī yose yenīyī nakwīyītaga kūlwa nguno ya Nghūlū Jawiza, gīkī nane nabize na būsangī ū mu nīmo gwenūyo.

²⁴ Ī gīsī mutamanile gīkī abo bakapeelaga mu wishiganhīlwa bakapeelaga pye a bose, alīyo ūyo akapandīkaga mheela akabizaga ūmò dūhū? Na a bing'we peelagi gīko mupandīke.

²⁵ Hama hangī būlī munhū ūyo alī mu tagambī ya wishiganhīji akilanghanaga mu yose. A bene bakīītaga gīko kūlwa kwanukūla ngikili īyo īdūgije kūkenaagūka; alīyo a bise ītī ya kūkenaagūka.

²⁶ Nū nene nakūpeelaga gīko, kwike h'ītī gīkī natamanile īsho nakwītaga; nakūlwaga bo ngumī, alīyo h'ītī gīkī nakūtūlaga lūyaga.

²⁷ Nakūgūluhyaga ū mīlī gwane, nakūgūtūūlaga mu būsese ītizūbiza gīkī, ūlū namala ū kūbalomeela a bangī, ū nene ng'wenekīlī nabize o kūleng'wa.