1 Bakolinto 7 - Sukuma New Testament 2000

Mihayo ya batooleke

¹ Ali lūūlū ū mu mihayo īyo ng'wanandīkīlile, īlī hambū-hambū ū munhū atizūtoola nūūlū kūtoolwa.

² Alīyo kūlwa nguno ya kogoha būjingi, būlī ngosha ni abizage na nke wakwe ng'wenekīlī, na a bakīma gīko; nabo būlī ng'wene abize na ngoshi wakwe ng'wenekīlī.

³ Ū ngosha ang'wītīle ū nke gīt'ūmo shiigelile; nū nkīma ang'wītīle chene ū ngoshi wakwe.

⁴ Ū nkīma atī na būsugi ū kū mīlī gokwe, alīyo ngoshi; nū ngosha atī na būsugi ū kū mīlī gokwe, alīyo nke.

⁵ Yaya ū kwilemeja, numho ūlū mu kwizunīlīja makanza malebe dūhū, gīkī mupandīke ng'wanya gwa kūlomba mu būlembeezu; alīyo ishokelagi hangī, ū Shetani atizūmugema kūlwa kūlemeelwa kwilanghana kwing'we.

⁶ Ū mhayo gwenūyū nalīgūhaya mu būganikīji, ītī gītī shilagīlo.

⁷ Ahene ni nayega a banhū pye a bose ūlū ni babiza gīt'ūmo nalī ū nene; kwike būlī munhū alī na kinhīlwe kakwe wei ng'wenekīlī kūfuma kūlī Mulungu; ūyū kinhīlwe aka, nū yūyo kinhīlwe ako.

⁸ Alīyo ū kū banhū abo batī batooleke na a bachīlwa, a bene īkūbeelela ūlū būbiza gīt'ūmo nalī ū nene.

⁹ Kwike ūlū būlemeelwa ū kwilanghana, ni batoolage nūūlū kūtoolwa, nguno īlī chiza ū kūtoola nūūlū kūtoolwa, kūtinda kūminyiwa makoye ga kwikūmva.

¹⁰ Hama a batooleke nalībahūgūla, nīyo natī nene, alīyo Seeba; gīkī ū nkīma atizūlekana nū ngoshi okwe.

¹¹ Alīyo ūlū ūlekana nanghwe ikale atatoolilwe, nūūlū bishokele nū ngoshi; nū ngosha atizūneka ū nke okwe.

¹² Kwike ū kū bangī nalīhaya nene, atī Seeba; ūlū ndūgū alī na nke atī nzunya, alīyo ū nke ng'wenūyo atogilwe ū kwikala nanghwe, atizūneka.

¹³ Nū nkīma ūlū alī na ngoshi atī nzunya, alīyo atogilwe ū kwikala nanghwe, atizūneka ū ngoshi ng'wenūyo.

¹⁴ Nguno ū ngosha ūlū atī nzunya akeejiagwa kūlwa nke, nū nkīma ūyo atī nzunya akeejiagwa kūlwa ngoshi ūyo alī ndūgū; ūlū ītī chene numho a baana bing'we ni batī beela, alīyo ī haha balī beela.

¹⁵ Kwike ūyo atī nzunya ūlū wīnga ni ajage; ū mu mihayo gītī yenīyo ū ndūgū ū ngosha nūūlū ū nkīma atatungilwe, alīyo ū Mulungu atwitanile kūlwa kikalīle ka mhola.

¹⁶ Ī gīsī ū bebe nkīma ūmanile kinehe, hamo ūdūgije kūmpīja ū ngoshi wako; nū bebe ngosha ūmanile kinehe, hamo ūdūgije kūmpīja ū nke wako?

Banhū ba ng'wa Mulungu

¹⁷ Hūna lūūlū, būlī ng'wene shiigelile ashimīze gīt'ūmo agabīlilwe na Seeba, ūmo Mulungu ang'witanīlile. H'ūmo nakūlangīlaga ū mu kanisa pyī ī jose.

¹⁸ Alīho ose-ose ūyo walī asaalilwe aho alitanwa? Atizitūūla mu būtūsaalwa; alīho ose-ose ūyo walī atasaalilwe aho alitanwa? Nanghwe atizūsaalwa.

¹⁹ Nguno ū būsaalwa būtī na solobo, nū būtūsaalwa būtī na solobo; ū mhayo ntaale gūlī kūdima shilagīlo sha ng'wa Mulungu.

²⁰ Būlī ng'wene ni ikalage ūmo walī aho alitanwa.

²¹ Hamo olī nsese aho ūlitanwa? Gūtizūkūkoya ū gwenūyo; kwike ūlū ūlī na būdūla bo kūfuma ū mu būsese, īlī yawiza wīnge mo.

²² Nguno ūyo witanwa kūbiza mulī Seeba ūsangwa alī mu būsese, ū ng'wenūyo ntungūlwa ū mulī Seeba; nū yūyo witanwa ūsangwa alī mu wiyabī nanghwe nsese wa ng'wa Kilisto.

²³ A bing'we mugūlilwe na mpango ntaale, hūna lūūlū yaya ū kūbiza basese ba banhū.

²⁴ Badūgū bane, būlī ng'wene ni ikalage hamò na Mulungu ū mu kikalīle ako witanīlwa.

Būganikīji mu mihayo ya witooji

²⁵ Ū kū banhya, natī na būhūgūji kwīngīīla kūlī Seeba, alīyo nalīng'winha būganikīji bone, nguno ū Seeba akanichīla shigongo ūnibona gīkī nashikile kūsanyiwa.

²⁶ Hūna lūūlū kūlwa nguno ya wilwisha ūbo būlīho ī shikū jenīji, ū nene nalībona īlī yawiza ū munhū ikale gīt'ūmo alī.

²⁷ Hamo ūtoolile? Yaya ū kūkooba kūbūlaga kaya; hamo wamala kūlekana na nkīma? Yaya ū kūkooba ūngī.

²⁸ Kwike ahene nūūlū ūtoola hangī, ūtūbiza wīta gwabūbi. Pyī nū munhya ūlū ūtoolwa atūbiza wahūba; alīyo ī chene ū nene natogilwe kūmupīja mutizingīla mu makoye ga mīlī, ayo gakabakoyaga batooleke.

²⁹ Ū mhayo ūyo nalīgūhaya badūgū bane gūlī gīkī, ī haha ī likanza lyagubbīnghaga; īlo lyasaagaga ho abo batoolile ni babizage gītī batatoolile.

³⁰ Abo bakūlīlaga babize gītī batūlīlaga, na a babo balī mu būyegi babize gītī batī mu būyegi, na a babo bakūgūlaga babize gītī batī na shikolo.

³¹ Na a babo bakūshitūmamīlaga ī sha mu sī, nabo baleke ū kūshitūmamīla būyaga-būyaga; nguno ī mihayo ya mu sī īlībīta.

³² Hūna lūūlū, a bing'we natatogilwe mubize ba kwikala ng'ūkoya-koya, nguno ūyo atatoolile akateeganaga na mihayo ya ng'wa Seeba, akakoobaga ūmo alanyegeje ū Seeba.

³³ Lelo ūyo atoolile ū ng'wene akateeganaga na ya mu sī, akakoobaga ūmo alanyegeje ū nke;

³⁴ nose hū kūhaya ū ng'wenūyo agabanīkile. Nū nkīma ūyo atatoolilwe, pyī nū munhya; nanghwe akateeganīlaga ya ng'wa Seeba, gīkī abize ng'wela ū mu mīlī nū mu moyo. Alīyo ū nkīma ūyo atoolilwe, ū ng'wene akateeganaga kūlwa mihayo ya mu sī, ūmo alanyegeje ū ngoshi.

³⁵ Ū gwenūyū nalīmuwīla kūlwa solobo ying'we, natūmuwīlaga gīkī namuchaamīkīle ishikī lya kūmuhangīja, muleke kūsunanghīla kūja kū būtongi; alīyo natogilwe mubize na kashimīzīle kasoga, muntūmamīle ū Seeba mutī na sha kūng'wipamya.

³⁶ Kwike ūlū munhū imanile na munhya nebe hūna ūbona gīkī alīheewa na kwikūmva kūlwa nguno yakwe, hama ū munhya ng'wenūyo alījīlīīla mu nyakūlīji, ū munhū ng'wenūyo ni abītīlage mu nzīla īyo īzunīlīgije, agwīte ūyo atogilwe kūgwīta; akūbiza atūhūbaga, ni bitoolage dūhū.

³⁷ Alīyo ū wa kūtimbya ngholó ūhandatīla mu būtūhadīkījiwa, ūsola wei ng'wenekīlī mu ngholó yakwe gwa kūleka kūntoola ū munhya ng'wenūyo, hama ūbiza na būdūla bo kūgasuga a maganiko gakwe, akūbiza alīīta gwawiza.

³⁸ Nose hū kūhaya gīkī ūyo alantoole ū munhya akūtūngīlīja, alīyo ū wa kūleka, ū ng'wene akūbiza wīta gwawiza kūtinda.

³⁹ Ū nkīma atungilwe kūlī ngoshi pyī ī likanza aho ngoshi ataalī mpanga, alīyo ūlū ūcha ū ngoshi akūbiza watungūlīlagwa, ni atoolagwe na munhū ose-ose ūyo alantogwe; kwike mulī Seeba dūhū.

⁴⁰ Alīyo ū mu kūbona kwane nalībona gīkī, ūlū wikala gīko akūbiza na būyegi kūtinda: ū nene nalībona gīkī, nane nalī nanghwe ū Moyo wa ng'wa Mulungu.