1 Bakolinto 5 - Sukuma New Testament 2000

Ūyo atatogilwe kūlekana na shibi

¹ Hangī gwakumūkile na gwa gīkī būlīho būjingi ū mu bing'we; nīyo būjingi ūbo būtīmo nūūlū ū mu banhū abo bataamanile Mulungu, gīkī munhū kūnsola nina ng'wīnga!

² Nibūlī mukwikumīlījaga, aho yalī īng'wigeleelilwe kūpīnīhala, na kūnkīndīka ū munhū ūyo wagwītile ū mhayo gwenūyo?

³ Ū nene nghana ī chene ū mu mīlī natī hamò ning'we ū kwenūko, alīyo ū mu moyo nalī hamò ning'we; hūna lūūlū ū munhū ūyo wagwītile ū mhayo gwenūyo naamalile kūnamula gītī gīkī nalī hamò ning'we.

⁴ Ū mhayo gwenūyo gwigasījagi hamò mu lina lya ng'wa Seeba Yesu, nū nene nakūbiza ning'we ū mu moyo, nū būdūla bo ng'wa Seeba wise ū Yesu.

⁵ Ū munhū ūyo alī gīko ntūūlagi kūlī Shetani, gūkenaagūlwe ū mīlī gwa shibi, ū moyo gūlapījiwe ū mu lūshikū lo ng'wa Seeba.

⁶ Ū wikumīlīja wing'we būtī būsoga; mutamanile gīkī ī shibimbya nūūlū shikabiza shigehu na ginehe shikadudumyaga būsu h'ūmo būkwīlīle ūlū shūlubanījiwa mo?

⁷ Shīnjagi ī shibimbya sha kale, mubize būsu būpya būlubilwe, ūbo būtaalī kūduduma. Nguno ū Kilisto, ūyo alī pasaka yise wamalile kūfunyiwa kūbiza shitambo.

⁸ Hūna lūūlū tūshiyegelagi ī shigukulu; kwike ītī mu shibimbya sha kale, nūūlū sha būkenaagūji na būbi; alīyo mu būtūbiza na shibimbya, mu nghana na mu būtūngīlīja.

⁹ Naalī nang'wandīkīlile nyalūba ya kūmuwīla gīkī, yaya ū kūbiza na būsangī nabo a bajingi.

¹⁰ Natamuwīlile mihayo ya bajingi ba mu sī, nūūlū bikūmvi, nūūlū banyeecha, nūūlū balamya ba shiikolile; nguno ūlū ng'wīta gīko, numho a bing'we īkūng'wigeleelwa kūsaama ū mu sī!

¹¹ Alīyo ī haha nalīng'wandīkīla gīkī, yaya ū kūbiza na būsangī na munhū ose-ose ūyo akwitanagwa ndūgū, alīyo ū kūnū njingi, nūūlū ng'wikūmvi, nūūlū namya wa shiikolile. Nūūlū akabiza ndūkani, nūūlū nkolwa-walwa, pyī nūūlū nyeecha: ū munhū ūyo alī gīko, yaya nūūlū kūlya nanghwe!

¹² Ī gīsī ū nene nalī na nguno kī nago ū mhayo gwa kūbalamula abo balī hanze? Alīyo a bing'we, ītang'wigeleelilwe ū kūbalamula abo balī mu kaya?

¹³ Nguno abo balī hanze akūbalamula Mulungu, a bing'we nsūngūlagi ū wabūbi mung'wīnje ū mu bing'we.